(ភ្នំពេញ)៖ សណ្ឋាគារ Savills Hotel បានរៀបចំកម្មវិធី «ជំនួបជាមួយជំនាញការ» របស់ខ្លួន នៅថ្ងៃទី១២ ខែកញ្ញា ឆ្នាំ ២០១៩ នៅសណ្ឋាគារសូហ្វីតែល ភ្នំពេញ ភូគីត្រា​ ដោយមានអ្នកជំនាញការផ្នែកបដិសណ្ឋារកិច្ចជាច្រើនរូប ត្រូវបានអញ្ជើញឱ្យចូលរួម ដើម្បីចែករំលែកចក្ខុវិស័យរបស់ខ្លួនពាក់ព័ន្ធទៅនឹង «និន្នាការបដិសណ្ឋារកិច្ច និងការវិនិយោគ នៅក្នុងប្រទេសកម្ពុជា»។

កម្មវិធីដែលប្រារព្ធធ្វើឡើងនៅខែកញ្ញានេះ ត្រូវបានបែងចែកជាពីរវគ្គ ដែលធ្វើបទបង្ហាញដោយវាគ្មិនចំនួនបួនរូប ​គឺលោក Hui Seila អគ្គនាយករងនៃក្រសួងទេសចរណ៍ បានធ្វើបទបង្ហាញ អំពីកាលានុវត្តភាពទេសចរណ៍និងវិនិយោគ នៅក្នុងប្រទេសកម្ពុជា។ លោក Bernard Kee នាយកប្រចាំតំបន់ នៃក្រុមហ៊ុន SEA របស់ STR បានផ្ដល់នូវបច្ចុប្បន្នភាព នៃការអនុវត្តន៍ទីផ្សារ បដិសណ្ឋារកិច្ចក្នុងតំបន់ចំណែកលោក Mauro Gasparotti នាយកគ្រប់គ្រងសណ្ឋារគារ Savills Hotel ​APAC បានពិភាក្សាអំពីប្រភេទ​នៃផលិតផលបដិសណ្ឋារកិច្ចថ្មីៗ និងប្រភេទនៃទេសចរណ៍ថ្មីៗផងដែរ។

លោក Christian Pucher អ្នកគ្រប់គ្រងជាន់ខ្ពស់នៃធនាគារអភិវឌ្ឍន៍អាស៊ី (Development Asia) មកពីក្រុមហ៊ុនបដិសណ្ឋារកិច្ចសាកល Hilton Worldwide បានចែករំលែកនូវចក្ខុវិស័យរបស់លោកអំពី ការអភិវឌ្ឍន៍ចម្រុះ។ កម្មវីធីនេះក៏បានផ្ដល់នូវកិច្ចពិភាក្សាជាក្រុមដ៏គួរឱ្យចាប់អារម្មណ៍អំពីកាលានុវត្តភាព និងបញ្ហាប្រឈមនៃទីផ្សារកម្ពុជា។

នៅក្នុងអំឡុងពេលកម្មវិធី លោក Mauro Gasparotti បានផ្ដល់មតិយោបល់ថា «យើងបានឃើញចំណាប់អារម្មណ៍ជាច្រើនពីសំណាក់អ្នកអភិវឌ្ឍន៍អន្តរជាតិ និងវិនិយោគិនចំពោះប្រទេសកម្ពុជា។ ប្រទេសនេះ គឺជាប្រទេសគោលដៅទេសចរណ៍ ដោយសារតែប្រទេសនេះសម្បូរទៅដោយប្រវត្តិសាស្ត្រដ៏អស្ចារ្យ ឆ្នេរសមុទ្រដ៏ស្រស់ស្អាត និងវប្បធម៌ដ៏ចំណាស់។ ទេសចរណ៍កម្ពុជាបានប្រែក្លាយពីភាពទំនេរ ទៅជាទេសចរណ៍ដែលពោរពេញដោយបទពិសោធន៍ ព្រមទាំងបានបើកចំហចំពោះទេសចរណ៍បែបជំនួញ ក្រុមទេសចរធំៗ និងក្រុមទេសចរថ្មីៗ ដូចជា​ទេសចរបែបសុខុមាលភាព និងទេសចរដែលជាអ្នកមានស្ដុកស្ដម្ភ។ ឱកាសដ៏ល្អៗជាច្រើនគឺបានបើកផ្លូវឱ្យអ្នកអភិវឌ្ឍន៍ និងវិនិយោគិនដែលយល់ដឹង អំពីការប្រែប្រួលនាពេលអនាគត។ ទោះជាយ៉ាងនេះក្ដី នៅពេលដែលមានកំណើនកើនឡើង ការអភិវឌ្ឍន៍ និងទេសចរណ៍ហួសកម្រិត នឹងក្លាយជាបញ្ហាប្រឈមមួយ។ ដូចនេះ យើងត្រូវតែរក្សាឱ្យបាននូវតុល្យភាពរវាងកំណើន និងនិរន្តរភាព»។

លោក Mauro Gasparotti ក៏បានពន្យល់អំពីកម្លាំងជម្រុញ ពីក្រោយការរៀបចំកម្មវិធីនេះផងដែរ ថា «យើងបានរៀបចំកម្មវិធីជាច្រើននៅក្នុងប្រទេសវៀតណាម កម្ពុជា និងប្រទេសថៃ ដើម្បីបណ្ដុះគំនិតអ្នកអភិវឌ្ឍន៍​ទាំងអស់អំពីនិន្នាការ និងផលិតផលថ្មីៗ។ វិស័យបដិសណ្ឋារកិច្ចនៅតែបន្តប្រែប្រួលជាបន្តបន្ទាប់ ហើយយើងសូមលើកទឹកចិត្តឱ្យអ្នកអភិវឌ្ឍន៍ទាំងអស់ បញ្ចូលនូវធាតុទាំងនេះ សម្រាប់គម្រោងអភិវឌ្ឍន៍ថ្មីៗរបស់ខ្លួន។ យើងតែងតែអញ្ជើញជំនាញការ​មកពីវិស័យបដិសណ្ឋារកិច្ច ដើម្បីចែករំលែកនូវបទពិសោធន៍របស់ពួកគាត់ ក្នុងការរៀបចំផែនការ អភិវឌ្ឍន៍ និងធ្វើប្រតិបត្តិការទ្រព្យសកម្មជាមួយនឹងអ្នកអភិវឌ្ឍន៍ក្នុងមូលដ្ឋាន។ ដោយមានការគាំទ្រពីសំណាក់ដៃគូ ក្នុងមូលដ្ឋានរបស់យើង លោក Sunny Soo មកពីក្រុមហ៊ុនប្រឹក្សាយោបល់អចលនវត្ថុ Keystone Property Consultants យើងមានគោលដៅផ្ដល់ជូននូវសេវាប្រឹក្សា យោបល់សណ្ឋាគារដ៏ប្រសើរបំផុតសម្រាប់វិនិយោគិនក្នុងស្រុក និងក្រៅស្រុក សម្រាប់គម្រោងថ្មីៗរបស់ពួកគេ»។

លោក Christian Pucher អ្នកគ្រប់គ្រងជាន់ខ្ពស់នៃធនាគារអភិវឌ្ឍន៍អាស៊ី (Development Asia) មកពីក្រុមហ៊ុនបដិសណ្ឋារកិច្ចសាកល Hilton Worldwide បានថ្លែងថា «ប្រទេសកម្ពុជាដែលកំពុងតែរីកចម្រើនខ្លាំង ក្នុងវិស័យទេសចរណ៍ហើយយើង ក៏បានមើលឃើញការចាប់អារម្មណ៍កាន់តែខ្លាំងពីសំណាក់ អ្នកវិនិយោគិនអន្តរជាតិ ក្នុងការហក់ចូលមកក្នុងទីផ្សារកម្ពុជា ព្រមទាំងលើកទឹកចិត្តដល់កិច្ចខិតខំប្រឹងប្រែង របស់រដ្ឋាភិបាលក្នុងការជំរុញវិស័យទេសចរណ៍របស់ខ្លួនតាមរយៈ ការអភិវឌ្ឍន៍ហេដ្ឋារចនាសម្ព័ន្ធផងដែរ។ ការចុះហត្ថលេខារបស់ Hilton ភ្នំពេញនៅថ្ងៃនេះ ជាមួយដៃគូរបស់យើងគឺក្រុមហ៊ុន GFC Company Limited គឺ​តំណាងពីទំនុកចិត្តរបស់យើង នៅក្នុងប្រទេសកម្ពុជា​ហើយយើងពិតជារីករាយណាស់ ដែលបានចូលរួមជាមួយយីហោ Hilton ដែលគ្រោងនឹងចាប់ដំណើរការនៅឆ្នាំ ២០២២ ខាងមុខនេះ»៕