(ត្បូងឃ្មុំ)៖ លោកទេសរដ្ឋមន្ត្រីកិត្តិសេដ្ឋា ចម ប្រសិទ្ធ រដ្ឋមន្ត្រីក្រសួងឧស្សាហកម្មនិងសិប្បកម្ម និងលោក ជាម ច័ន្ទសោភ័ណ អភិបាលខេត្តត្បូងឃ្មុំ នៅថ្ងៃទី១០ ខែកញ្ញា ឆ្នាំ២០១៩ បានអញ្ជើញប្រកាសឲ្យចូលកាន់មុខតំណែងប្រធានមន្ទីរឧស្សាហកម្ម និងសិប្បកម្មខេត្តត្បូងឃ្មុំថ្មី។
ពិធីនេះមានការចូលរួមពី ពីក្រុមប្រឹក្សាខេត្ត អភិបាលក្រុងស្រុក ថ្នាក់ដឹកនាំ មន្រ្តីរាជការ កងកម្លាំង មន្ទីរស្ថាប័នរដ្ឋនានានៅជុំវិញខេត្ត មន្រ្តីមន្ទីរឧស្សាហកម្មនិងសិប្បកម្មជាច្រើនរូបទៀត។
លោក ប៉ិញ វុត្ថា ពីអនុប្រធានមន្ទីរ ត្រូវបានប្រកាសឲ្យចូលកាន់មុខតំណែងជាប្រធានមន្ទីរឧស្សាហកម្ម និងសិប្បកម្មខេត្តត្បូងឃ្មុំថ្មី ជំនួសលោក ប៉ិញ ឈាងហ៊ន់ ដែលត្រូវចូលនិវត្តន៍។
លោក ប៉ិញ វុត្ថា ដែលទើបទទួលការតែងតាំងថ្មី បានឡើងមានចំណាប់អារម្មណ៍ និងប្តេជ្ញាចិត្តដឹកនាំស្ថានប័ននេះ ឱ្យមានប្រសិទ្ធភាពខ្ពស់ មានសាមគ្គីភាពផ្ទៃក្នុងល្អ សហការជាមួយជំនាញនានា និងអាជ្ញាធរខេត្ត ដើម្បីចូលរួមបម្រើសេវាឱ្យបានលឿន រហ័សជូនប្រជាពលរដ្ឋផងដែរ។
លោក ជាម ច័ន្ទសោភ័ណ បានថ្លែងកោតសរសើរចំពោះស្នាដៃ លទ្ធផលការងារ ដែលមន្ទីរសម្រេចបានកន្លងមក និងស្នើឱ្យលោកប្រធានមន្ទីរថ្មី យកគំរូតាមលោកប្រធានមន្ទីរចាស់ ដោយបន្តដឹកនាំសាមគ្គីផ្ទៃក្នុង ជាពិសេសត្រូវធានារក្សាគុណភាពសុវត្ថិភាពអាហារ សម្រាប់សុខភាពជូនប្រជាពលរដ្ឋ។
ក្នុងឱកាសនោះដែរ លោកទេសរដ្ឋមន្រ្តីកិត្តិសេដ្ឋាបណ្ឌិត ចម ប្រសិទ្ធ និងលោក ជាម ច័ន្ទសោភ័ណ បានសង្កត់ធ្ងន់ថា ក្នុងនាមក្រសួងជំនាញ ត្រូវបានពង្រឹងការងារនានា ក្នុងវិស័យឧស្សាហកម្ម និងសិប្បកម្មលើវិស័យឯកជន នៅតាមបណ្តា សិប្បកម្ម សហគ្រាសខ្នាតតូច និងមធ្យមក្នុងខេត្តត្បូងឃ្មុំ ដែលបានផលិតទំនិញគ្រប់ប្រភេទ សូមឱ្យមានការវេចខ្ចប់មានអនាម័យខ្ពស់តាមស្តង់ដា ដែលអាចទទួលយកបានធានាគុណភាព មិនធ្វើឱ្យប៉ះពាល់សុខភាពអ្នកប្រើប្រាស់ឡើយ។
លោកទេសរដ្ឋមន្រ្តី បានបន្តថា ដោយឡែកបណ្តាញទឹកស្អាតវិញ បាននិងកំពុងអនុវត្តជាបន្តបន្ទាប់ ធ្វើឱ្យបានដល់ផ្ទះប្រជាពលរដ្ឋ នៅតាមជនបទនាពេលខាងមុខនេះ។ នៅក្នុងអណត្តិទី៦នេះ រាជរដ្ឋាភិបាលថ្មី បានដាក់ទិសដៅកែទម្រង់ស៊ីជម្រៅលើគ្រប់វិស័យ ដើម្បីគាំពារ និងផ្តល់សេវាសាធារណៈជូនប្រជាពលរដ្ឋយើង នៅគ្រប់ទិសទីទាំងនៅទីក្រុង និងជនបទដើម្បីកាត់បន្ថយការលំបាកចាកចេញពីភាពក្រីក្រ របស់ប្រជាពលរដ្ឋមានជីវភាពកាន់តែប្រសើឡើងតទៅ។
លោកទេសរដ្ឋមន្ត្រី ក៏បានជំរុញធ្វើយ៉ាងណា ឲ្យបណ្ដាញទឹកស្អាតនៅខេត្តត្បូងឃ្មុំ មានស្តង់ដារល្អ ដូចទៅនឹងរាជធានីភ្នំពេញផងដែរ៕
