(ប៉េកាំង)៖ ក្នុងអំឡុងពេលធ្វើទស្សនកិច្ច នៅប្រទេសចិន១០ថ្ងៃ អ្នកសារព័ត៌មានកម្ពុជា និងអង្គភាពព័ត៌មានមកពី១៧ប្រទេសផ្សេងទៀត នៅរសៀលថ្ងៃទី០៦ ខែកញ្ញា ឆ្នាំ២០១៩នេះ បានទៅទស្សនាសារៈមន្ទីររាជវាំងចិន (Palace Museum) ឬគេហៅថា Forbidden City of China ។
ដើមកំណើតនៃ Forbidden City ចាប់ផ្ដើមឡើងនៅក្នុងសតវត្សទី១៥ គឺនៅពេលដែលវាត្រូវបានកសាងជារាជវាំងរបស់ស្ដេចមីង (Ming) ដែលមានទីតាំងនៅភាគកណ្ដាលនៃទីក្រុងប៉េកាំង។ វាត្រូវបានក្លាយជារាជវាំងស្ដេចចិន ចាប់តាំងពីជំនាន់រាជវង្សមីង នៅឆ្នាំ១៤២០ រហូតដល់រាជវង្សឈីង (Qing) នៅឆ្នាំ១៩១២។
កសាងនៅឆ្នាំ១៤៦០ ដល់ឆ្នាំ១៤២០, រាជវាំងនេះបានផ្លាស់ប្ដូររូបរាងច្រើនណាស់។ បន្ទាប់ពីក្លាយជារាជវាំងអស់រយៈពេលជាង ៥០០ឆ្នាំមក, Forbidden City បានក្លាយជាសារមន្ទីរមានឈ្មោះថា Palace Museum នៅឆ្នាំ១៩២៥ ហើយវាត្រូវបានប្រកាសឲ្យក្លាយជាតំបន់បេតិកភណ្ឌពិភពលោក ដោយ UNESCO នៅឆ្នាំ១៩៨៧។
សូមបញ្ជាក់ថា គណៈកម្មការភាពជាអ្នកជិតខាងល្អ មិត្តភាព និងកិច្ចសហប្រតិបត្តិការ នៃអង្គការកិច្ចសហប្រតិបត្តិការសៀងហៃ (GNFCC SCO) ដោយបានអញ្ជើញអ្នកសារព័ត៌មានកម្ពុជា និងអង្គភាពព័ត៌មាន មកពី១៧ប្រទេសផ្សេងទៀត ឱ្យធ្វើទស្សនកិច្ច នៅប្រទេសចិន ចំនួន១០ថ្ងៃ ចាប់ពីថ្ងៃទី០៤ ដល់ថ្ងៃទី១៤ ខែសីហា ឆ្នាំ២០១៩។ លោក កែវ ពិសិដ្ឋ អ្នកយកព័ត៌មានផ្នែកនយោបាយ និងសង្គម នៃអង្គភាពព័ត៌មាន Fresh News ត្រូវបានចាត់តាំងឱ្យចូលរួម ដើម្បីតបតាមការអញ្ជើញនេះ។
ក្រៅពីកម្ពុជា មាន១៧ប្រទេសទៀត ដែលមកធ្វើទស្សនកិច្ចនៅប្រទេសចិន ក្រោមប្រធានបទ Medea Delegation របស់ SCO។ ប្រទេសទាំងនោះ រួមមាន ចិន (អ្នករៀបចំកម្មវិធី) ឥណ្ឌា កាហ្សាក់ស្ថាន Kyrgy ប៉ាគីស្ថាន រុស្ស៊ី តាជីគីស្ថាន Uzbekistan អាហ្វកានីស្ថាន បេឡារុស អ៉ីរ៉ង ម៉ុងហ្គោលី អាហ្សេបេហ្សង់ អាមេនី នេប៉ាល់ តួកគី ស្រីឡាងកា។
ក្នុងនាមជាអនុស្ថាប័ន ដែលជាផ្នែកមួយនៃ ក្រសួងការបរទេស, GNFCC បានប្តេជ្ញាពង្រីកបណ្តាញផ្លាស់ប្តូរ និងកិច្ចសហប្រតិបត្តិការ ប្រកបដោយភាពស្និទ្ធស្នាល ក្នុងចំណោមប្រទេស SCO និងរួមចំណែក ដល់ការលើកកម្ពស់សន្តិភាព និងការអភិវឌ្ឍក្នុងតំបន់។ SCO ត្រូវបានប្រកាសឡើងដោយ កតិកាសញ្ញាមួយ នៅឆ្នាំ២០០១ ក្រោមគំនិតផ្តួចផ្ដើមរបស់ ប្រធានាធិបតីចិន លោក ស៉ី ជិនពីង និងត្រូវបានចុះហត្ថលេខានៅឆ្នាំ២០០២ ហើយត្រូវបានចូលជាធរមាន នៅឆ្នាំ២០០៣។
បច្ចុប្បន្ននេះ SCO មានប្រទេសជាសមាជិកចំនួន៨ រួមមាន ចិន ឥណ្ឌា កាហ្សាក់ស្ថាន Kyrgyzstan ប៉ាគីស្ថាន រុស្ស៊ី តាជីគីស្ថាន និង Uzbekistan។ ប្រទេសជាអ្នកសង្កេតការណ៍មាន៤ រួមមាន អាហ្វកានីស្ថាន បេឡារុស អ៉ីរ៉ង និងម៉ុងហ្គោលីចំណែកឯ ប្រទេស ដែលជាដៃគូសន្ទនាមាន៦ រួមមាន កម្ពុជា អាហ្សេបេហ្សង់ អាមេនី នេប៉ាល់ តួកគី និងស្រីឡាំងកា៕
