(ភ្នំពេញ)៖ រដ្ឋលេខាធិការក្រសួងពាណិជ្ជកម្ម លោកស្រី តឹករ៉េត កំរង បានឱ្យដឹងថា កម្ពុជាបានត្រៀមខ្លួនរួចជាស្រេច ដើម្បីអនុវត្តកិច្ចសម្រួលពាណិជ្ជកម្មឆ្លងកាត់ព្រំដែន ដោយគ្មានក្រដាសស្នាម តាមរយៈការចូលជាសមាជិកសន្ធិសញ្ញាអង្គការសហប្រជាជាតិ ស្តីពីប្រតិបត្តិការនេះនៅតំបន់អាស៊ីប៉ាស៊ីហ្វិក, ការបង្កើតគណៈកម្មាធិការបញ្ជរជាតិតែមួយ និងការប្រើប្រាស់ច្បាប់ស្តីពីពាណិជ្ជកម្មអេឡិចត្រូនិក ដែលបច្ចុប្បន្នកំពុងរង់ចាំរដ្ឋសភាជាតិធ្វើការអនុម័ត ដើម្បីដាក់ឱ្យប្រើប្រាស់ជាផ្លូវការ។

លោកស្រីរដ្ឋលេខាធិការ បានលើកឡើងដូច្នេះ នាឱកាសអញ្ជើញជាអធិបតីភាពបើកសិក្ខាសាលាពិគ្រោះយោបល់លើកិច្ចសម្រួលពាណិជ្ជកម្មឆ្លងព្រំដែន ដោយគ្មានក្រដាសស្នាមនៅកម្ពុជា នៅសណ្ឋាគារសាន់វេ នៅថ្ងៃព្រហស្បតិ៍ ទី៥ ខែកញ្ញា ឆ្នាំ២០១៩នេះ ក្រោមវត្តមានចូលរួមពីមន្ត្រីជាន់ខ្ពស់ក្នុងជួររាជរដ្ឋាភិបាលកម្ពុជា មន្ត្រីអន្តរក្រសួង តំណាងដៃគូអភិវឌ្ឍន៍ និងវិស័យឯកជន ប្រមាណ ៥០នាក់។

នៅក្នុងឱកាសនោះ លោកស្រី តឹករ៉េត កំរង បានគូសបញ្ជាក់ពីសក្តានុពល និងសារៈសំខាន់នៃកិច្ចសម្រួលពាណិជ្ជកម្មឆ្លងកាត់ព្រំដែន ដោយគ្មានក្រដាសស្នាម សម្រាប់បម្រើការអភិវឌ្ឍសេដ្ឋកិច្ចឌីជីថលនៅកម្ពុជា និងការជំរុញប្រសិទ្ធភាព គណនេយ្យភាព និងតម្លាភាពនៃលំហូរពាណិជ្ជកម្មនៅតាមប្រទេសក្នុងតំបន់ ដើម្បីបង្កើតភាពសុខដុមនីយកម្មសម្រាប់ពិភពលោក ក្នុងរយៈពេលយូរអង្វែង។

លោកស្រីរដ្ឋលេខាធិការ ក៏មិនភ្លេចជម្រាបជូនអង្គពិធី អំពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការជំរុញពាណិជ្ជកម្មឆ្លងកាត់ព្រំដែន តាមរយៈការកែសម្រួលនីតិវិធីរដ្ឋបាល, ការធ្វើទំនើបកម្មប្រព័ន្ធស្វ័យប្រវត្តកម្មទិន្ន័យគយ ASYCUDA, ការដាក់ចេញនូវកំណែទម្រង់ និងវិធានការសម្រួលពាណិជ្ជកម្មដ៏មុតស្រួច ការធ្វើបច្ចុប្បន្នភាព និងដាក់ឱ្យដំណើរការយុទ្ធសាស្ត្រសមាហរណកម្មពាណិជ្ជកម្ម (CTIS) ឆ្នាំ២០១៩-២០១៣ និងការចងក្រងច្បាប់ស្តីពីពាណិជ្ជកម្មអេឡិចត្រូនិក ជាដើម។

បន្ថែមលើនោះ លោកស្រី តឹករ៉េត កំរង ក៏បានអំពាវនាវឱ្យដៃគូអភិវឌ្ឍន៍ និងមន្ត្រីអន្តរក្រសួង ប្រើប្រាស់វេទិកាថ្ងៃនេះ ធ្វើការត្រួតពិនិត្យ និងពិភាក្សាឱ្យបានផុសផុល ទៅលើរបាយការណ៍សិក្សាចងក្រងឡើងដោយអង្គការ UNESCAP ស្តីពីសេចក្តីព្រាងសកម្មភាពសម្រាប់ពាណិជ្ជកម្មឆ្លងព្រំដែន ដោយគ្មានក្រដាសស្នាម នៅកម្ពុជា ដើម្បីបង្កើតជាផែនការអាទិភាពក្នុងរយៈពេលខ្លី សំដៅកៀងគរប្រភពធនធាន ជាពិសេសជំនួយសម្រាប់ពាណិជ្ជកម្ម (Aid-for-trade) សម្រាប់គាំទ្រការអនុវត្តនាពេលអនាគត។

គួររម្លឹកដែរថា កាលពីថ្ងៃទី២៩ ខែសីហា ឆ្នាំ២០១៧ កម្ពុជាបានចុះហត្ថលេខាលើក្របខ័ណ្ឌកិច្ចព្រមព្រៀង លើកិច្ចសម្រួលពាណិជ្ជកម្មឆ្លងព្រំដែន ដោយគ្មានក្រដាសស្នាមនៅអាស៊ីប៉ាស៊ីហ្វិក ដើម្បីពង្រឹងកិច្ចសហប្រតិបត្តិការពាណិជ្ជកម្មអន្តរជាតិ ប្រកបដោយប្រសិទ្ធភាព និងតម្លាភាព ព្រមទាំងធានាបាននូវការគោរពបទដ្ឋានគតិយុត្ត ដែលនឹងផ្តល់អត្ថប្រយោជន៍រយៈពេលវែងដល់ប្រទេសក្នុងតំបន់៕