(កំពត)៖ លោក ជាវ តាយ អភិបាលខេត្តកំពត បានរំលឹកជាថ្មីម្ដងទៀតជំរុញឲ្យ មន្ទីរ អង្គភាព និងអាជ្ញាធរក្រុង ស្រុក យកចិត្តទុកដាក់ចូលរួមព្រមគ្នា លើការរៀបចំសោភ័ណភាព អនាម័យបរិស្ថាន ក្នុងក្រុងកំពត ដើម្បីត្រៀមអបអរពិធីបុណ្យសមុទ្រដែលនឹងប្រព្រឹត្តទៅ ក្នុងអំឡុងចុងឆ្នាំ២០១៩ ដែលឈានជិតចូលមកដល់ខាងមុខនេះ។

ការរំលឹកបែបនេះ ខណៈលោកអភិបាលខេត្ត បានដឹកនាំកិច្ចប្រជុំគណៈអភិបាលខេត្ត ប្រចាំខែសីហា ឆ្នាំ២០១៩ នារសៀលថ្ងៃទី០២ ខែកញ្ញា ឆ្នាំ២០១៩ នៅសាលប្រជុំសាលាខេត្តកំពត ដោយមានការចូលរួមពីសំណាក់ អភិបាលរងខេត្ត អភិបាលរង ស្រុក ក្រុង ប្រធានមន្ទីរ តុលាការ និងមន្ត្រីពាក់ព័ន្ធ សរុបចំនួន ៧២នាក់។

លោកអភិបាលខេត្ត បានលើកបញ្ជាក់បន្តថា ពាក់ព័ន្ធពិធីបុណ្យសមុទ្រ លើកទី៨ ជុំទី២ ដែលខេត្តកំពត ត្រៀមរៀបចំធ្វើជាម្ចាស់ផ្ទះ នៅចុងឆ្នាំ២០១៩នេះ គឺមានពេលវេលាកាន់តែខើចទៅៗ នៅសល់រយៈពេលខ្លី ចាប់ពីខែ៩នេះតទៅ។ ដូច្នេះ ដើម្បីឲ្យពិធីបុណ្យសមុទ្រ ឆ្នាំ២០១៩ នៅខេត្តកំពតបានប្រព្រឹត្តទៅ ប្រកបដោយភាពរលូន និងទទួលបានលទ្ធផល កាន់តែល្អប្រសើរជោគជ័យថែមទៀត ជាងបណ្ដាឆ្នាំកន្លងទៅ ក៏ដូចនៅតាមបណ្ដាខេត្ត ជាប់សមុទ្រទាំងបួននោះ។ ជាការចាំបាច់មន្ទីរ អង្គភាព ជុំវិញខេត្ត នីមួយៗ ត្រូវតែមានការយកចិត្តទុកដាក់ទាំងអស់គ្នា ក្នុងការរៀបចំបណ្ដើរៗធ្វើយ៉ាងណា ឲ្យមានសោភ័ណភាពតាមមន្ទីរអង្គភាព នីមួយៗ ដែលនៅក្នុងក្រុងកំពត ឱ្យមានការល្អប្រសើរឡើង។

លោកអភិបាលខេត្ត ក៏បានបញ្ជាក់ថា តាមរយៈការសង្កេត នៅតាមបណ្ដា មន្ទីរ អង្គភាព នីមួយៗក្នុងខេត្ត នៅមិនទាន់បានអនុវត្តព្រមគ្នានៅឡើយទេ ហើយក៏មានភាពមិនទាន់ល្អស្អាតនៅឡើយដែរ។ ក្នុងនោះដែរ លោកអភិបាលខេត្ត ក៏បានដាក់ជាសំណូមពរ ក៏ដូចជាផែនការណែនាំជាចាំបាច់ ឲ្យមន្ទីរ អង្គភាព អាជ្ញាធរ រួមនិងប្រជាពលរដ្ឋ ត្រូវតែចូលរួមចលនាឲ្យបានផុលផុស មានជាសកម្មភាព និងការផ្សព្វផ្សាយឲ្យបានទូលំទូលាយ សស្រាក់សស្រាំទាំងអស់គ្នា ដោយយកចិត្តទុកដាក់ពីបញ្ហា អនាម័យ សោភ័ណភាព បរិស្ថាន តាមដងផ្លូវ ឬ បរិវេណជុំវិញ មន្ទីរអង្គភាព សួនសាធារណៈ និងលំនៅដ្ឋានប្រជាពលរដ្ឋ ក្នុងក្រុងកំពតជាបន្តបន្ទាប់ ពីពេលឥឡូវនេះតទៅ កុំរង់ចាំដល់ថ្ងៃ ឬពេលមកដល់ ហើយលើកហេតុផលថាគៀកពេលពេកនោះ។

ទន្ទឹមបានលើកថាវាជាមានបានកំពង់បែកនោះដែ លោក ជាវ តាយ ក៏បានលើកការសរសើរ ដល់មន្ទីរ អង្គភាព មួយចំនួន ដែលបានខិតខំ ប្រឹងប្រែង និងបានជំរុញឲ្យមានការខិតខំប្រឹងប្រែង យកចិត្តទុកដាក់ទាំងអស់គ្នា ដើម្បីធ្វើយ៉ាងណាធ្វើឲ្យខេត្តកំពត មានការទទួលគាំទ្រពីសំណាក់ប្រជាពលរដ្ឋ ពិសេស ភ្ញៀវទេសចរណ៍ នៅពេលខាងមុខកាន់តែច្រើនឡើងៗ។

ដោយឡែក លោកអភិបាលខេត្ត ក៏បានលើកឲ្យដឹង ពីភាពប្រែប្រួល រីកចម្រើន ពាក់ព័ន្ធអាជីវកម្មរបស់ខេត្តកំពត នាពេលបច្ចុប្បន្ន ជាច្រើនវិស័យ ដូច្នេះលោកនៅតែទទូចបន្ត ទាំងថ្នាក់ដឹកនាំមន្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ និងប្រជាពលរដ្ឋ ត្រូវខិតខំរួមគ្នាធ្វើឲ្យបានព្រមគ្នា ដើម្បីគោលដៅរួមធ្វើឲ្យខេត្តកំពត កាន់តែល្អប្រពៃថែមទៀត៕