(រតនគិរី)៖ ដោយសារតែស្ថានភាពទឹកភ្លៀង បានធ្លាក់ខ្លាំងជាបន្ដបន្ទាប់តាំងពីពាក់កណ្ដាលយប់ រហូតមកដល់ព្រឹកថ្ងៃទី២៩ ខែសីហា ឆ្នាំ២០១៩នេះ បានធ្វើឲ្យទឹកជន់លិចនៅតំបន់មួយចំនួន តាមអូរចាស់ៗ (អូកន្តឹល) ក្នុងក្រុងបានលុង និងអូរកាញ ធ្លាក់ដល់អូរកាទៀង អូរទទឹង ខេត្តរតនគិរី។ នេះបើតាមការជូនដំណឹងរបស់ក្រសួងធនធានទឹក និងឧតុនិយម។

ក្រសួងធនធានទឹក តាមរយៈ Facebook ក៏បានជូនដំណឹងទៀតថា ស្ថានភាពទឹកភ្លៀងនេះ បានធ្លាក់ខ្លាំងកម្រិត២១១មីល្លីម៉ែត្រ ហើយបានធ្វើឲ្យស្លាប់គោ ចំនួន០៣ក្បាល ក្នុងឃុំល្បាំងមួយ ស្រុកលំផាត់ ខេត្ដរតនគិរី។

សូមជម្រាបថា ក្រសួងធនធានទឹក និងឧតុនិយម បានចេញសេចក្តីជូនដំណឹង ស្តីអំពីបញ្ហាអាកាសធាតុនៅកម្ពុជា ចាប់ពីថ្ងៃនេះដល់ថ្ងៃទី០៣ ខែកញ្ញា ឆ្នាំ២០១៩ ដោយបញ្ជាក់ថា នៅរយៈពេលនេះ កម្ពុជានឹងមានភ្លៀងធ្លាក់ពីបង្គួរទៅច្រើន ពិសេសខេត្តជាប់មាត់សមុទ្រ។

ក្រសួងធនធានទឹកបានបញ្ជាក់ថា ដោយសារតែមានឥទ្ធិពលនៃបាតុភូតធម្មជាតិ និងព្យុះទី១២ នឹងធ្វើឲ្យ៖

១៖ បណ្តាខេត្តជាប់មាត់សមុទ្រ មានដូចជាខេត្តកោះកុង និងព្រះសីហនុ នឹងអាចមានភ្លៀងធ្លាក់ច្រើន នៅលើផ្ទៃសមុទ្រមានខ្យល់ និងរលកបក់បោកខ្លាំង។
២៖ ខេត្តកំពត ខេត្តកែប កំពង់ស្ពឺ តាកែវ កណ្តាល និងរាជធានីភ្នំពេញ នឹងអាចមានភ្លៀងធ្លាក់ពីតិចទៅបង្គួរ។
៣៖ បណ្តាលខេត្តដទៃទៀត នឹងអាចមានភ្លៀងធ្លាក់រាយប៉ាយនៅក្នុងបរិមាណពីបង្គួរទៅច្រើន ក្នុងនោះមានផ្នែកមួយចំនួនមានភ្លៀងធ្លាក់ខ្លាំង។

ជាមួយគ្នានេះ ក្រសួងបានអំពាវនាវដល់ប្រជាពលរដ្ឋ សូមមានការប្រុងប្រយ័ត្នខ្ពស់ចំពោះ បាតុភូត ភ្លៀង ខ្យល់ ផ្គរ រន្ទះ និងជំនន់ដែលបណ្តាលមកពីភ្លៀងខ្លាំង ក៏ដូចជាជំនន់នៃទន្លេមេគង្គដែលបន្តហក់ឡើង៕