(ភ្នំពេញ)៖ ឧកញ៉ា ស្រី ចាន់ថន អគ្គនាយក ក្រុមហ៊ុនស្កាយលែន 7NG វិហារសួគ៌ បានចូលរួមឧបត្ថម្ភថវិកា៤លានរៀល ជួយដល់មន្ត្រីនគរបាលម្នាក់ ដែលរងគ្រោះដោយសារអគ្គិភ័យ កាលពីថ្ងៃទី១៤ ខែសីហាម្សិលមិញ ក្នុងប្រតិបត្តិការពន្លត់អគ្គិភ័យ នៅក្នុងខេត្តសៀមរាប។

ដោយសារតែរងរបួសធ្ងន់ពេក មន្ត្រីនគរបាលដែលរលាកពេញខ្លួននោះ ត្រូវបានបញ្ជូនទៅសង្គ្រោះនៅប្រទេសថៃ។

សូមបញ្ជាក់ថា នៅវេលាម៉ោងប្រមាណ ១រសៀលថ្ងៃទី១៤ ខែសីហា ឆ្នាំ២០១៩ នេះ មានគ្រោះអគ្គីភ័យបណ្តាលមកពីផ្ទុះធុងហ្គាសនៅហាងបញ្ចូលហ្គាសមួយកន្លែង តាមបណ្តោយផ្លូវលោកតាណឺយ ស្ថិតក្នុងភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប។ គ្រោះអគ្គិភ័យនេះ បណ្តាលឱ្យរបួសមនុស្ស ១២នាក់ ធ្ងន់ ៦នាក់ ស្រ្តីបរទេសជាគ្រូបង្រៀន ២នាក់។

លោក ហួត មុនីពិសាខ មន្ត្រីនគរបាលនៅផ្នែកអន្តរាគមន៍ ដែលបានចូលរួមក្នុងប្រតិបត្តិការពន្លត់អគ្គិភ័យ និងសង្រ្គោះជនរងគ្រោះក្នុងករណីនេះ ត្រូវបានភ្លើងឆាបឆេះរោលរាលពេញខ្លួនប្រាណ ខណៈពេលលោកកំពុងចុះជួយអន្តរាគមន៍បញ្ចៀសប្រជាពលរដ្ឋចេញពីកន្លែងកើតហេតុ។

ស្នងការនគរបាលខេត្តសៀមរាប ឧត្តមសេនីយ៍ទោ ទិត្យ ណារ៉ុង បានឱ្យអង្គភាពព័ត៌មាន Fresh News ដឹងថា ក្នុងពេលកំពុងបំពេញភារកិច្ចនៅកន្លែងកើតគ្រោះអគ្គិភ័យនោះ លោក ហួត មុនីពិសាខ ត្រូវអណ្តាតភ្លើងកើតពីការផ្ទុះធុងហ្គាសជះមកលើខ្លួនលោក បណ្តាលឱ្យឆេះរោលរាលពេញខ្លួនប្រាណតែម្តង។

បើតាមលោកស្នងការ បច្ចុប្បន្ននេះមន្ត្រីនគរបាលរូបនេះ ត្រូវបានក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យក្នុងខេត្តអ៊ូប៊ុន ប្រទេសថៃ៕