(ប៉ៃលិន)៖ ប្រតិភូខេត្តប៉ៃលិនដឹកនាំដោយ លោក ផាន់ ចាន់ធុល អភិបាលខេត្តប៉ៃលិន អមដំណើរដោយលោក ចេង ញ៉ាន់ អភិបាលរងខេត្ត ព្រមទាំងថ្នាក់ដឹកនាំមន្ទីរអង្គភាព និងស្ថាប័នជំនាញក្នុងខេត្ត បានពិភាក្សាការងារជាមួយរដ្ឋបាលខេត្តចាន់បុរី ប្រទេសថៃ ដើម្បីពង្រឹងចំណងមិត្តភាព និងកិច្ចសហប្រតិបត្តិការ រវាងខេត្តនៅជាប់ព្រំដែននៃប្រទេសទាំង២ (ប៉ៃលិន+ចាន់បុរី) ឱ្យបានកាន់តែល្អប្រសើរឡើងថែមទៀត។
ជំនួបនេះ ត្រូវបានធ្វើឡើងនៅសាលាខេត្តចាន់បុរី ប្រទេសថៃ នាថ្ងៃទី២៦-២៧ ខែកក្កដា ឆ្នាំ២០១៩។
លោក ផាន់ ចាន់ធុល បានថ្លែងអំណរគុណចំពោះ រដ្ឋបាលខេត្តចាន់បុរី ដែលបានទទួលស្វាគមន៍យ៉ាងកក់ក្រៅ ចំពោះគណៈប្រតិភូខេត្តប៉ៃលិន មកជួបសម្តែងការគួរសម និងពិភាក្សាការងារ ពីកិច្ចសហប្រតិបត្តិការ នៅតាមព្រំដែនរវាងប្រទេសទាំង២ ក្នុងការរឹតចំណងសាមគ្គីភាព មិត្តភាពដ៏ល្អជាមួយគ្នា ក្នុងការពង្រឹងកិច្ចសហប្រតិបត្តិការលើគ្រប់វិស័យ ជាពិសេសវិស័យពាណិជ្ជកម្ម ឧស្សាហកម្ម និងពលករ នៅតាមបណ្តោយព្រំដែន រវាងព្រះរាជាណាចក្រកម្ពុជា-ថៃ ឱ្យកាន់តែល្អប្រសើរបន្ថែមទៀត។
នៅក្នុងឱកាសនោះផងដែរ លោក ផាន់ ចាន់ធុល ក៏បានសំណូមពរដល់ភាគីថៃ បន្តសហប្រតិបត្តិការនូវបញ្ហាមួយចំនួនដូចជា៖ ពន្លឿនការកសាងស្ពានឆ្លងព្រំដែន បញ្ហាពលករខ្មែរឆ្លងដែនខុសច្បាប់ ព្រមទាំងបទល្មើសឆ្លងដែននានា និងការនាំចេញកសិផល និងការធ្វើពាណិជកម្មឆ្លងដែន រវាងខេត្តចាន់បុរី-ប៉ៃលិន ជាពិសេសជួយសម្រួល ដល់ការនាំចេញស្វាយកែវល្មៀត និងផ្លែមៀនប៉ៃលិនទៅកាន់ប្រទេសថៃ។
ជាការឆ្លើយតបលោក វីធូរ៉ាត់ ស្រ៊ីណាម អភិបាលខេត្តចាន់បុរី ព្រះរាជាណាចក្រថៃ បានសន្យាខិតខំសហប្រតិបត្តិការ និងដោះស្រាយនូវរាល់សំណូមពរ របស់រដ្ឋបាលខេត្តប៉ៃលិន ក្នុងក្របខ័ណ្ឌសមត្ថកិច្ចរបស់ខេត្ត ចំណែកបញ្ហា១ចំនួនទៀត លោកបានសន្យាថានឹងនាំយក នូវរាល់សំណូមពរទាំងអស់នេះ ធ្វើការពិភាក្សាជាមួយមន្ត្រីជំនាញពាក់ព័ន្ធ និងថ្នាក់ដឹកនាំ ព្រមទាំងរាជរដ្ឋាភិបាលថៃ ដើម្បីរកលទ្ធភាព និងដំណោះស្រាយ ក្នុងការបង្កើនកិច្ចសហប្រតិបត្តិកា ររវាងប្រទេសទាំង២ ឱ្យបានកាន់តែល្អប្រសើឡើង។
ក្នុងឱកាសនោះលោកវីធូរ៉ាត់ ស្រ៊ីណាម ក៏បានកោតសសើរដល់រដ្ឋបាលខេត្តប៉ៃលិន ដែលកន្លងមកបានខិតខំពង្រឹង កិច្ចសហប្រតិបត្តិការជាមួយខេត្ត ជាប់ព្រំដែននៃប្រទេសទាំង២ ដើម្បីរក្សាឱ្យបាននូវសន្តិសុខ សណ្តាប់ធ្នាប់តាមបណ្តោយព្រំដែន និងបម្រើឱ្យផលប្រយោជន៍របស់ប្រជាជន និងប្រទេសទាំង២ ដោយស្មើភាព និងស្មោះត្រង់។
សូមបញ្ជាក់ថា កសិផលរបស់ប្រជាកសិករនៅខេត្តប៉ៃលិន ដូចជា៖ ដំឡូង ពោត ស្វាយកែវល្មៀត និងផ្លែមៀនប៉ៃលិន ជាដើម គឺពឹងផ្អែកទៅលើទីផ្សារប្រទេសថៃ ហើយតែងតែមានបញ្ហាចំពោះតម្លៃ នៅពេលប្រមូលផលម្តងៗ ដែលបញ្ហានេះ គឺជាកង្វល់របស់អាជ្ញាធរខេត្ត៕
