(ភ្នំពេញ)៖ រយៈពេលមួយឆមាស (៦ខែ) ឆ្នាំ២០១៩ កម្ពុជាប្រមូលពន្ធ និងអាករពីការនាំចូលទំនិញពីបណ្តាប្រទេសផ្សេងៗ បានជាង ៥.៩ទ្រីលានរៀល ស្មើនឹងប្រមាណ ១,៤៧៥លានដុល្លារអាមេរិក។ ថវិកានេះ កើនឡើង ២៥.៥% ស្មើនឹងប្រមាណ ៣០០លានដុល្លារអាមេរិក បើធៀបរយៈពេលដូចគ្នាក្នុងឆ្នាំ២០១៨។ លទ្ធផលចំណូលនេះ ត្រូវប្រមាណជា ៦៥% នៃផែនការប្រចាំឆ្នាំ ដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ២០១៩។

របាយការណ៍ស្តីពីការប្រមូលចំណូលពីពន្ធ និងអាករលើទំនិញនាំចូលនេះ ត្រូវបានបង្ហាញនៅថ្ងៃពុធ ០៨រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៤ ខែកក្កដា ឆ្នាំ២០១៩នេះ ក្នុងកិច្ចប្រជុំបូកសរុបការងារគយ និងរដ្ឋាករប្រចាំឆមាសទី១ ឆ្នាំ២០១៩ ក្រោមអធិបតីភាពលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ។

កិច្ចប្រជុំនេះ ក៏មានការអញ្ជើញចូលរួមពីសំណាក់ថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ និងថ្នាក់ដឹកនាំ នៃអគ្គនាយកដ្ឋានពន្ធដារ ព្រមទាំងថ្នាក់ដឹកនាំគ្រប់ជាន់ថ្នាក់នៃអគ្គនាយកដ្ឋានគយ និងរដ្ឋាករកម្ពុជាផងដែរ។

របាយការណ៍ចំណូលពន្ធគយ ដែលបង្ហាញដោយលោកបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយដ្ឋានគយនិងរដ្ឋាករកម្ពុជា បានបង្ហាញថា បើប្រៀបធៀបនឹងរយៈពេលដូចគ្នាក្នុងឆ្នាំ២០១៨ លទ្ធផលចំណូលតាមប្រភេទពន្ធ និងអាករសំខាន់ៗដែលប្រមូលដោយគយមានកំណើនគួរឲ្យកត់សម្គាល់។ ក្នុងនោះ ពន្ធគយ (ពន្ធនាំចូល) មានកំណើនជាង ៣៣.៨%, អាករពិសេសកើន ៣១.១% និងអាករលើតម្លៃបន្ថែម (VAT) កើន ២៨.៦%។

លោក គុណ ញឹម បានឱ្យដឹងថា មុខទំនិញជាប្រភពចំណូលសំខាន់ៗរួមមាន៖ ១. យានយន្ត និងគ្រឿងចក្រគ្របដណ្តប់ប្រមាណជាង ៥២% នៃចំណូលសរុប, ២. ប្រេងឥន្ធនៈ និងថាមពលប្រមាណ ១៧.១% នៃចំណូលសរុប និង៣. ទំនិញចម្រុះ និងគ្រឿងសំណង់មានប្រមាណ ២៩.៥% នៃចំណូលសរុប។

លោកអគ្គនាយក បានលើកឡើងថា លទ្ធផលដ៏ល្អប្រសើរនេះ បានមកពីសុខសន្តិភាព និងស្ថេរិភាពនយោបាយដែលកំពុងគ្របដណ្តប់លើផ្ទៃប្រទេសកម្ពុជា និងការកែទម្រង់មុតស្រួចរបស់រាជរដ្ឋាភិបាល។ ជាពិសេសការពង្រឹងនូវអភិបាលកិច្ចផ្ទៃក្នុងរបស់អង្គភាពគយ និងការរីកចម្រើនផ្នែកសមត្ថភាពធនធានមនុស្ស។

ក្រៅពីបង្ហាញនូវចំណូលពន្ធគយ និងអាករហើយនោះ លោកបណ្ឌិត គុណ ញឹម ក៏បានបង្ហាញសមិទ្ធផលផ្សេងទៀត ដែលអគ្គនាយកដ្ឋានគយ និងរដ្ឋាករសម្រេចបានផងដែរ។ សមិទ្ធផលនោះដូចជាការចូលរួមកសាងបទប្បញ្ញ្តត្តិ និងគោលនយោបាយពាក់ព័ន្ធនឹងគយ, ការធ្វើវិចារណកម្មអត្រាពន្ធគយលើទំនិញមួយចំនួន, ការពង្រឹងការងារបង្ការនិងបង្រ្កាបអំពើរត់គេចពន្ធ, ការចូលរួមទប់ស្កាត់ការលាងសម្អាតប្រាក់ និងការលើកកម្ពស់កិច្ចសម្រួលពាណិជ្ជកម្ម តាមរយៈការចូលរួមអនុវត្តវិធានការកែទម្រង់មុតស្រួចរបស់រាជរដ្ឋាភិបាល ពាក់ព័ន្ធនឹងគយ ដូចជាការអនុវត្តកម្រៃផ្លូវការនៃការផ្តល់សេវាសាធារណៈរបស់អគ្គនាយកដ្ឋានគយ និងរដ្ឋាករ, ការកាត់បន្ថយកម្រៃស្កែន និងបរិមាណកុងតែន័រដែលត្រូវឆ្លងកាត់ការត្រួតពិនិត្យដោយម៉ាស៊ីនស្កែន, ការផ្សព្វផ្សាយគោលនយោបាយលើកទឹកចិត្តដល់សហគ្រាសធុនតូចនិងមធ្យម (SMEs) និងការជំរុញយ៉ាងសកម្មការអភិវឌ្ឍន៍ប្រព័ន្ធបញ្ជរតែមួយជាតិ និងប្រព័ន្ធបញ្ជរតែមួយអាស៊ាន ហើយបានដាក់ឲ្យអនុវត្តជំហានដំបូងនៃប្រព័ន្ធទាំងពីរនេះ ចាប់ពីថ្ងៃទី០១ ខែកក្កដា ឆ្នាំ២០១៩ជាដើម។

ក្នុងឱកាសនោះ លោកអគ្គបណ្ឌិតសភាចារ្យ ឧបនាយករដ្ឋមន្ត្រី បានសំដែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងប្រកបដោយមនសិកា និងស្មារតីទទួលខុសត្រូវខ្ពស់របស់មន្ត្រីគយ និងរដ្ឋាករគ្រប់រូប ចំពោះលទ្ធផលប្រកបដោយសុទិដ្ឋិនិយម និងក្ដីរំពឹងខ្ពស់ និងបានណែនាំសម្រាប់ជាទិសដៅអនុវត្តបន្តសម្រាប់ឆមាសទី២ ឆ្នាំ២០១៩ ដោយជំរុញឱ្យយកចិត្តទុកដាក់ទៅលើការងារសំខាន់ៗមួយចំនួនទៀត។

ការដែលអគ្គបណ្ឌិតសភាចារ្យ ជំរុញយកចិត្តទុកដាក់នោះរួមមាន ការបន្តពង្រឹងអភិបាលកិច្ចល្អក្នុងអង្គភាព និងក្រមសីលធម៌វិជ្ជាជីវៈរបស់មន្ត្រីគយនិងរដ្ឋាករ និងត្រូវប្រកាន់ខ្ជាប់អភិក្រម ៤ប្រការ របស់ក្រសួងសេដ្ឋកិច្ចនិងហិរញ្ញវត្ថុ ព្រមទាំងអភិក្រម ៥ ប្រការរបស់សម្ដេចតេជោនាយករដ្ឋមន្ត្រី គឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់។ បន្ថែមពីលើនោះ ត្រូវបន្តអនុវត្តវិធានការកែទម្រង់ស៊ីជម្រៅ និងមុតស្រួចរបស់រាជរដ្ឋាភិបាលឱ្យសកម្ម ក្នុងនោះត្រូវអនុវត្តខ្លឹមសារប្រកាសស្តីពីការផ្តល់សេវាសាធារណៈរបស់អគ្គនាយកដ្ឋានគយ និងរដ្ឋាករ ប្រកបដោយតម្លាភាព គណនេយ្យភាព និងប្រសិទ្ធភាព, ត្រូវបញ្ចប់ឲ្យបានឆាប់ការកែសម្រួលអនុត្រឹត្យ ២០៩, ជំរុញអនុវត្តប្រព័ន្ធបញ្ជរតែមួយជាតិឲ្យគ្របដណ្តប់ក្រសួងស្ថាប័នពាក់ព័ន្ធតាមការគ្រោងទុក, តាមដាននិងវាយតម្លៃអំពីប្រសិទ្ធភាពនៃការកែសម្រួលគោលការណ៍ និងនិតិវិធីនៃការស្កែនកុងតែន័រ, យកចិត្តទុកដាក់អនុវត្ត និងបង្កើនការផ្សព្វផ្សាយខ្លឹមសារអនុក្រឹត្យ និងប្រកាសរបស់ក្រសួងសេដ្ឋកិច្ច និងហិរញ្ញវត្ថុ ពាក់ព័ន្ធនឹងការលើកទឹកចិត្តផ្នែកគយ សម្រាប់ SMEs ជាដើម។

លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ក៏បានជំរុញឱ្យមន្ត្រីអគ្គនាយកដ្ឋានគយ និងរដ្ឋាករបន្តយកចិត្តទុកដាក់អនុវត្តន៍លើងារងារសំខាន់មួយចំនួនទៀត ដើម្បីធ្វើឱ្យការប្រមូលពន្ធ និងអាករលើទំនិញនាំចូលកាន់តែមានភាពប្រសើរ។ ការងារដែលលោកអគ្គបណ្ឌិតសភាចារ្យ បានជំរុញនោះរួមមាន៖
(១). ត្រូវបន្តជំរុញផ្ដល់កិច្ចសម្រួលពាណិជ្ជកម្ម និងបន្តលើកកម្ពស់អនុលោមភាពវិស័យឯកជន,
(២). បន្តពង្រឹងយន្ដការពិគ្រោះយោបល់ជាមួយវិស័យឯកជន ក្នុងការអនុវត្តវិធានការនានារបស់រាជរដ្ឋាភិបាល,
(៣). ត្រូវរក្សាតុល្យភាពនៃការគ្រប់គ្រងរបស់គយ ក្នុងខណៈកិច្ចសម្រួលពាណិជ្ជកម្មកាន់តែទូលំទូលាយ,
(៤). បន្តពង្រឹងការងារបច្ចេកទេស ដូចជាការកំណត់តម្លៃគិតពន្ធគយ, លេខកូដទំនិញ, វិធានដើមកំណើតទំនិញ,
(៥). ជំរុញបញ្ចប់សេចក្តីព្រាងយុទ្ធសាស្ត្រការអនុវត្តច្បាប់ និងយុទ្ធសាស្ត្របច្ចេកវិទ្យាព័ត៌មាន
(៦). អនុវត្តនូវយន្តការបំពេញបែបបទមុនពេលទំនិញមកដល់ (Pre-Arrival Processing) ដែលនឹងជួយសម្រួលបន្ថែមទៀតដល់ធុរជនពាក់ព័ន្ធ សំដៅកាត់បន្ថយការកកស្ទះនៅមាត់ច្រកដើមទី ជាដើម,
(៧). បន្តការចូលរួមការកសាងច្បាប់ស្តីពីវិនិយោគនិងតំបន់សេដ្ឋកិច្ចពិសេស,
(៨). រៀបចំកសាងផែនការសកម្មភាពសម្រាប់ឆ្នាំ២០២០ នៃការងារគយនិងរដ្ឋាករ ដោយឈរលើយុទ្ធសាស្រ្តកៀរគរចំណូល ២០១៩-២០២៣ ឱ្យបានមុនដំណាច់ឆ្នាំ២០១៩,
(៩). ពង្រឹងកិច្ចសហប្រតិបត្តិការជាមួយអគ្គនាយកដ្ឋានពន្ធដារ និងអគ្គនាយកដ្ឋានពាក់ព័ន្ធផ្សេងទៀតក្រោមឱវាទក្រសួងសេដ្ឋកិច្ចនិងហិរញ្ញវត្ថុ លើយន្តការចែករំលែកគ្នាទៅវិញទៅមកនូវទិន្នន័យស្ថិតិដោយស្វ័យប្រវត្តិតាមមធ្យោបាយអេឡិចត្រូនិច
(១០). បង្កើនការយកចិត្តទុកដាក់ការគ្រប់គ្រងចរាចរណ៍រូបិយបណ្ណ ស្របតាមផែនការយុទ្ធសាស្ត្រដើម្បីដកកម្ពុជាចេញពីបញ្ជីប្រផេះ និង
(១១). សហការជាមួយអគ្គនាយកដ្ឋានគោលនយោបាយ ដើម្បីធ្វើការសិក្សាឱ្យបានគ្រប់ជ្រុងជ្រោយលើការឈានទៅកាត់បន្ថយការនាំចូលរថយន្តដែលមានអាយុកាលប្រើប្រាស់ច្រើនឆ្នាំ។

ក្នងកិច្ចប្រជុំនៅថ្ងៃនេះ ដើម្បីជាការលើកទឹកចិត្ត ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏បានបំពាក់គ្រឿងឥស្សរិយយសនិងបណ្ណសរសើរ ជូនដល់មន្ត្រីគយនិងរដ្ឋាករមានស្នាដៃមួយចំនួន៕