(ភ្នំពេញ)៖ លោកស្រី អាន ផល្លា ជាពិសី និងលោកស្រី សួស សូលីដា អនុប្រធានកិត្តិយសអនុសាខាកាកបាទក្រហមកម្ពុជា ខណ្ឌឫស្សីកែវ នៅថ្ងៃទី២៤ ខែកក្កដា ឆ្នាំ២០១៩នេះ បានបន្តដឹកនាំសហការី យកគ្រឿងឧបភោគបរិភោគ និងថវិកាមួយចំនួន របស់អនុសាខាខណ្ឌ មកចុះសួរសុខទុក្ខ និងឧបត្ថម្ភជូនពលរដ្ឋ មានជីវភាពខ្វះខាត ជនពិការ មានជំងឺរ៉ាំរ៉ៃ ដែលងាយរងគ្រោះស្ថិតនៅភូមិបឹងសាឡាង សង្កាត់ឫស្សីកែវ ក្រោយពីនាំយកគ្រឿងឧបភោគបរិភោគ ឧបត្ថម្ភជូនពលរដ្ឋស្ថិតនៅភូមិស្វាយប៉ាក សង្កាត់ស្វាយប៉ាក និងស្ថិតនៅភូមិ១ សង្កាត់ច្រាំងចំរេះទី១។
សូមជម្រាបថា លោកស្រី អាន ផល្លា ជា ពិសី និងលោកស្រី សួស សូលីដា អនុប្រធានកិត្តិយសអនុសាខាកាកបាទក្រហមកម្ពុជា ខណ្ឌឫស្សីកែវ កាលពីរសៀលថ្ងៃទី១៨ និងថ្ងៃទី២២ ខែកក្កដា ឆ្នាំ២០១៩ ក៏បានបន្តនាំយកគ្រឿងឧបភោគបរិភោគ និងថវិការបស់អនុសាខាខណ្ឌ មកចុះសួរសុខទុក្ខ និងឧបត្ថម្ភជូនប្រជាពលរដ្ឋមានជីវភាពខ្វះខាត មានជំងឺរ៉ាំរ៉ៃ និងចាស់ជរាគ្មានទីពឹង ដែលងាយរងគ្រោះមួយចំនួន ដើម្បីជួយសម្រួលដល់ជីវភាព ស្ថិតនៅភូមិស្វាយប៉ាក សង្កាត់ស្វាយប៉ាក និងស្ថិតនៅភូមិ១ សង្កាត់ច្រាំងចំរេះទី១។
អំណោយរបស់អនុសាខាកាកបាទក្រហមកម្ពុជាខណ្ឌឫស្សីកែវ រួមមាន៖ អង្ករ១០០គីឡូក្រាម, ឃីត០៥កញ្ចប់, ទឹកស៉ីវអ៉ីវ-ទឹកម្ទេស ចំនួន៥០ដប និងថវិកាមួយចំនួនផងដែរ។
ក្នុងឱកាសនេះ លោកស្រី អាន ផល្លា ជាពិសី បានថ្លែងថា ចំពោះអំណោយមានជាគ្រឿងឧបភោគបរិភោគ និងថវិកាដែលក្រុមការងារ អនុសាខាកាកបាទក្រហមកម្ពុជា ខណ្ឌឫស្សីកែវ បាននាំមកឧបត្ថម្ភជូននៅពេលនេះ គឺសម្រាប់ចែកជូនចំពោះ តែប្រជាពលរដ្ឋក្រីក្រប៉ុណ្ណោះ តាមការផ្ដាំផ្ញើ ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្ដេចតែងតែគិតគូរតាមជាក់ស្ដែង ព្រោះនៅទីណាឲ្យតែមាន ប្រជាពលរដ្ឋងាយរងគ្រោះ ទីនោះតែងតែមានវត្តមានកាកបាទក្រហមកម្ពុជាជានិច្ច។
នាឱកាសប្រគល់ និងទទួលអំណោយមនុស្សធម៌ របស់អនុសាខាកាកបាទក្រហមកម្ពុជាខណ្ឌឫស្សីកែវនេះដែរ ប្រជាពលរដ្ឋ ពិតជាមានទឹកមុខញញឹម សប្បាយរីយរាយ ដោយបានថ្លែងអំណរគុណយ៉ាងជ្រាលជ្រៅបំផុត ជូនចំពោះសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលបានយកចិត្តទុកដាក់ជួយដល់ពួកគាត់ កំពុងជួបបញ្ហាខ្វះខាត ក្នុងជីវភាពរស់នៅប្រចាំថ្ងៃ តាមរយៈលោកស្រី អាន ផល្លា ជា ពិសី និងលោកស្រី សួស សូលីដា អនុប្រធានកិត្តិយសអនុសាខាកាកបាទក្រហមកម្ពុជាខណ្ឌ ព្រមទាំងសហការីផងដែរ៕
