(បាត់ដំបង)៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បានផ្តល់របបគោលនយោបាយពិនិត្យ និងថែទាំសុខភាព ជូនជនពិការក្រីក្រតាមសហគមន៍ ចំនួន៣២៨នាក់ នៅស្រុកថ្មគោល ខេត្តបាត់ដំបង នាថ្ងៃទី២៣ ខែកក្កដា ឆ្នាំ២០១៩។
ពិធីប្រគល់ និងផ្តល់នេះ ធ្វើឡើងដោយមានការចូលរួមពីលោក សែម សុខា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា តំណាងរបស់លោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងលោក យី វាសនា សមាជិកក្រុមប្រឹក្សាភិបាលនៃមូលនិធិជនពិការ ក្នុងពិធីបើកផ្តល់របបគោលនយោបាយពិនិត្យថែទាំសុខភាព និងបើកគណនីធនាគារជូន ជនពិការភាពក្រីក្រនៅតាមសហគមន៍ ចំនួន៣២៨នាក់ មកពីស្រុកថ្មគោល ខេត្តបាត់ដំបង ក្នុងបរិវេណសាខាធនាគារអេស៊ីលីដាស្រុកថ្មគោល។
កម្មវិធីនេះមានការចូលរួមពីថ្នាក់ដឹកនាំរបស់មូលនិធិជនពិការ ប្រធាននាយកដ្ឋានសុខុមាលភាពជនពិការ គណៈអភិបាលស្រុកថ្មគោល ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្ត និងបងប្អូនជនពិការជាច្រើនរូបទៀត។
នាឱកាសនោះ លោក សែម សុខា បានលើកឡើងពីការយកចិត្តទុក្ខដាក់របស់រាជរដ្ឋាភិបាលកម្ពុជាលើបងប្អូនជនពិការ ដោយបានដាក់ចេញនូវយន្តការមួយចំនួនសម្រាប់លើកម្ពស់សិទ្ធិ និងសុខុមាលភាពរបស់ជនពិការ ដើម្បីពួកគាត់មានលទ្ធភាពចូលរួមគ្រប់សកម្មភាពរបស់សង្គម។
លោកបាន បន្តថា យោងតាមអនុក្រឹត្យ ១៣៧អនក្រ.បក ចុះថ្ងៃទី២៧ ខែមិថុនា ឆ្នាំ២០១១ ស្តីពីរបបគោលនយោបាយចំពោះជនពិការក្រីក្រនៅតាមសហគមន៍ និងមានការចង្អុលបង្ហាញពី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា គឺកម្មវិធីបើកផ្តល់របបគោលនយោបាយពិនិត្យ និងថែទាំសុខភាព ជូនជនពិការភាពក្រីក្រនៅតាមសហគមន៍នេះ បានចាប់ផ្តើមពីឆ្នាំ ២០១៥មក ដោយគិតមកដល់បច្ចុប្បន្នមូលនិធិជនពិការ បានបើកផ្តល់ប្រាក់ របបគោលនយោបាយនេះបានចំនួន ៥.១១៦នាក់ នៅខេត្តប៉ៃលិន ត្បូងឃ្មុំ ស្វាយរៀង កំពង់ចាម ព្រៃវែង និងកណ្តាល។
លោក ជួរ រតនៈ នាយកមូលនិធិជនពិការ បានបញ្ជាក់ថា កម្មវិធីបើកផ្តល់គោលនយោបាយពិនិត្យថែទាំសុខភាព និងបើកគណនីធនាគារនេះ បានរៀបចំឡើងជាលើកទី២ហើយ ដែលចាប់ផ្តើមពីថ្ងៃទី២២ ដល់ថ្ងៃទី២៦ ខែកក្កដា ឆ្នាំ២០១៩ សម្រាប់ជនពិការក្រីក្រចំនួន៣២៨នាក់ នៅស្រុកថ្មគោល ខេត្តបាត់ដំបង ដែលលើកទី១នោះបានរៀបចំឡើងកាលពីថ្ងៃទី៨ រហូតដល់ថ្ងៃទី១២ ខែកក្កដា ឆ្នាំ២០១៩ សម្រាប់ជនពិការក្រីក្រចំនួន ៤១៩នាក់ ក្នុងចំណោមជនពិការក្រីក្រសរុបចំនួន ២.៤៧៣នាក់ នៃស្រុកថ្មគោល។ ចំពោះជនពិការកម្រិតធ្ងន់ ដែលមិនអាចមកបើកប្រាក់របបគោលនយោបាយនេះបាន សាខាមូលនិធិជនពិការខេត្ត និងសហការជាមួយភាគីពាក់ព័ន្ធនានា នឹងបន្តបើកផ្តល់ដល់លំនៅដ្ឋានរបស់ពួកគាត់។
គូសបញ្ជាក់ថា កម្មវិធីនេះ គ្រោងនឹងរៀបចំឡើងចំនួន៣លើកទៀត ក្នុងស្រុកថ្មគោល ដើម្បីបន្តបើកផ្តល់របបគោលនយោបាយពិនិត្យថែទាំសុខភាព និងបើកគណនីធនាគារជូនជនពិការភាពក្រីក្រនៅតាមសហគមន៍ ដែលនៅសេសសល់៕
