(ត្បូងឃ្មុំ)៖ បណ្ឌិត ប៉ា ម៉េងហុក ទីប្រឹក្សាសម្តេចពញាចក្រី ហេង សំរិន ប្រធានរដ្ឋសភា និងជាប្រធានក្រុមការងារថ្នាក់កណ្តាលចុះជួយឃុំវាលម្លូរ ស្រុកពញាក្រែក ខេត្តត្បូងឃ្មុំ ព្រឹកថ្ងៃទី១៤ កក្កដា នេះ បានប្រគេនទៀនព្រះវស្សាដល់វត្តចំនួន២ ស្ថិតក្នុងឃុំវាលម្លូរ គឺវត្តអណ្តូងស្លែង និងវត្តវាលម្លូរ ដោយក្នុង១វត្តៗទទួលបានទៀនព្រះវស្សា១គូ បច្ច័យ១លានរៀល រួមនិងគ្រឿងឧបភោគ បរិភោគ ចំនួន៣៥មុខផ្សេងទៀត។
ក្នុងឱកាសនេះ ព្រះសង្ឃ គណៈកម្មការវត្ត និងពុទ្ធបរិស័ទចំណុះជើងវត្តទាំង២ បានសម្តែងនូវ អំណរគុណយ៉ាងជ្រាលជ្រៅបំផុតចំពោះ បណ្ឌិត ប៉ា ម៉េងហុក និងលោកស្រី ព្រមទាំងសហការីដែលតែងមានសទ្ធាជ្រះថ្លាក្នុងផ្លូវព្រះពុទ្ធសាសនា តាមរយៈការចូលរួមកសាងនូវសមិទ្ធផលនានា។
ក្នុងពេលកន្លងមក ហើយនៅពេលនេះទៀតសោត លោក និងលោកស្រី ព្រមទាំងសហការី បានប្រគេននូវ ទៀនព្រះវស្សា រួមនឹងគ្រឿងឧបភោគ បរិភោគ ជាច្រើនមុខទៀតសម្រាប់ព្រះសង្ឃ ដែលត្រូវចូលកាន់ រយៈពេល៣ខែនាពេលដ៏ខ្លីខាងមុខនេះ។
ពិធីបុណ្យចូលព្រះវស្សា គឺជាពិធីបុណ្យមួយដែលមានសារៈសំខាន់ក្នុងព្រះពុទ្ធសាសនា ជា ពេលវេលាដ៏សំខាន់សម្រាប់ភិក្ខុសង្ឃ និងសាមណេ ត្រូវគង់ក្នុងព័ទ្ធសីមាវត្តរៀនធម៌ និងវិន័យ តាមពុទ្ធ ឱវាទ ហើយក្នុងវេលានេះ អ្នកមានជំនឿទៅលើព្រះពុទ្ធសាសនា តែងតែនាំគ្នាប្រារព្ធពិធីបុណ្យចូល ព្រះវស្សារយៈពេល៣ខែ ដោយនាំយកជាសាដក គ្រឿងចង្ហាន់ និងរបស់ប្រើប្រាស់ផ្សេងៗ ទៅប្រគេន ព្រះសង្ឃតាមលទ្ធភាព។
ក្នុងឱកាសនេះ លោកបណ្ឌិត ប៉ា ម៉េងហុក បានចែកជូនដល់ យាយជី តាជី ចំនួន ១០០នាក់ នូវក្រណាត់ស សំលៀកបំពាក់ និងថវិកាម្នាក់ៗ ១ម៉ឺនរៀល ព្រមទាំងបានរៀបចំការទទួលទានអាហារ សាមគ្គីរួមគ្នាជាមួយក្រុមប្រឹក្សាឃុំវាលម្លូរ ក្រុមប្រឹក្សាភូមិទាំង៨ នៃឃុំវាលម្លូរ និងបងប្អូនប្រជាពលរដ្ឋក្នុងមូលដ្ឋានប្រមាណជាង២០០នាក់ផងដែរ៕
