(ត្បូងឃ្មុំ)៖ លោកវរសេនីយ៍ឯក ឈន សុធន អធិការនគរបាលក្រុងសួង ខេត្តត្បូងឃ្មុំ បានដឹកនាំកម្លាំងនាំយកគ្រឿងឧបភោគ-បរិភោគមួយចំនួន ចែកជូនអតីតយុទ្ធជនចំនួន ៤គ្រួសារ ដែលបានប្ដូរពីក្រុងសួងទៅរស់នៅភូមិសំបូរ ឃុំស្វាយច្រះ ស្រុកស្នួល ខេត្តក្រចេះ ជាមួយនឹងការផ្ដាំផ្ញើសូមឱ្យយកចិត្តទុកដាក់ក្នុងរស់នៅ និងថែរក្សាសុខភាពឱ្យបានល្អ។
សកម្មភាពចុះចែកអំណោយនេះធ្វើឡើងនាថ្ងៃទី០៨ ខែកក្កដា ឆ្នាំ២០១៩ ដោយក្នុងមួយគ្រួសារទទួលបាន៖ អង្ករ ២៥គីឡួក្រាម មី ១កេស ត្រីខ ១យួរ ទឹកត្រី ១យួរ ទឹកស៊ីអ៉ីវ ១យួរ សាច់ជ្រួក ២គីឡូក្រាម។
ក្រៅពីនេះមានកូនដូងចំនួន ៣ដើម ក្រូចឆ្មារ ២ដើម ស្វាយ ៣ដើម ខ្នុរ ៣ដើម សម្រាប់ដាំដុះក្នុងដីរបស់ពួកគាត់។
មិនតែប៉ុណ្ណោះ លោកវរសេនីយ៍ឯក ឈន សុធន ក៏បានឧបត្ថម្ភនូវធុងទឹកចំណុះ២០០លីត្រចំនួន ១ ចង្រ្កានហ្គាសចំនួន ១ ឆ្នាំងចំនួន ២ ឆ្នាំងខ្ទះចំនួន ១ ជ្រុញចំនួន ១ កាធុនចំនួន ១ កាតូស្រះចំនួន ១ កំសៀវទឹកចំនួន ១ កាំបិតចំនួន ២ សូទឹកកកចំនួន ១ បំពង់ទឹកក្តៅចំនួន ១ ខ្នើយម៉ុង កន្ទេល និងសម្ភារផ្ទះបាយមួយចំនួនទៀត៕
