(ភ្នំពេញ)៖ លោក ថេង សុថុល និងភរិយា បានដឹកនាំមន្រ្តីនៅសាលាខណ្ឌចំការមន នៅថ្ងៃទី០៩ ខែកក្កដា ឆ្នាំ២០១៩នេះ បាននាំយកទៀនវស្សា ទេយ្យទាន គ្រឿងឧបភោគ បរិភោគ សម្ភារបរិក្ខា និងបច្ច័យមួយចំនួន ទៅប្រគេនដល់ព្រះសង្ឃដែលគង់ចាំព្រះវស្សាអស់កាលត្រីមាស ដល់វត្តចំនួន៤ ក្នុងខណ្ឌចំការមន រាជធានីភ្នំពេញ។
វត្តទាំង៤ ដែលលោកអភិបាលខណ្ឌ នាំយកទៀនវស្សា និងទេយ្យទានទៅប្រគេនដល់ព្រះសង្ឃរួមមាន៖ វត្តទួលទំពូង, វត្តប្រយូវង្ស, វត្តថាន់, និងវត្តស្វាយពពែ ដែលក្នុង១វត្តៗទទួលបានទទួលបានទៀនព្រះវស្សា០១គូរ, សាដក២កញ្ចប់, ស្ករស១បាវ, ទឹកដោះគោ១កេស, ទឹកក្រូច៣កេស ទឹកសុទ្ធ១០កេស, មី០១កេសធំ, ត្រីខមួយកេស និងបច្ច័យ៥០ម៉ឺនរៀល។
នៅក្នុងឱកាសនេះដែរលោក ថេង សុថុល បានលើកឡើង អំពីប្រពៃណីព្រះពុទ្ធសាសនា ដែលនៅក្នុងពិធីបុណ្យចូលព្រះវស្សាពុទ្ធបរិស័ទតែងតែ នាំយកទៀនវស្សា គ្រឿងឧបភោគបរិភោគ និងសម្ភារបរិក្ខាជាច្រើនទៀត ទៅប្រគេនព្រះសង្ឃនៅតាមបណ្តាលវត្តនានា ដើម្បីផ្គត់ផ្គង់ដល់ព្រះសង្ឃ ព្រោះនេះជារដូវវស្សាដែលជារដូវមួយសម្បូរទឹកភ្លៀង ដែលព្រះសង្ឃមានការលំបាកនិមន្តបិណ្ឌបាត្រ និងម៉្យាងទៀតរដូវនេះ ក៏ជាពេលវេលាមួយដែលព្រះសង្ឃគង់នៅក្នុងវត្ត ដើម្បីសិក្សារៀនសូត្រព្រះធម៌។
លោកអភិបាលខណ្ឌ និងក្រុមគ្រួសារ រួមនឹងមន្រ្តីក្នុងសាលាខណ្ឌ តែងតែនាំយកនៅទៀនវស្សា ទេយ្យទាន និងសម្ភារបរិក្ខាមួយចំនួន ទៅប្រគេនតាមបណ្តាលវត្តនានា នៅក្នុងខណ្ឌដើម្បីរួមចំណែកសម្រាលការខ្វះខាតរបស់ព្រះសង្ឃ ក្នុងវត្តជារៀងរាល់ឆ្នាំ។
ជាមួយគ្នាលោកអភិបាលខណ្ឌ ក៏បានលើកឡើងពីការអភិវឌ្ឍរីកចម្រើនឥតឈប់ឈរ របស់ប្រទេសជាតិក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី ហើយការរីកចម្រើននេះ គឺមិនអាចកាត់ផ្តាច់បានពីវិស័យពុទ្ធចក្រ ដែលជានិច្ចកាលវិស័ពុទ្ធចក្រ និងអាណាចក្រ ត្រូវដើរទន្ទឹមគ្នា ដើម្បីកសាងប្រទេសជាតិឱ្យបានរីកចម្រើនជាលំដាប់។
ព្រះគ្រូចៅអធិការវត្តថាន់ ក្នុងនាមព្រះសង្ឃគណៈកម្មាធិការវត្ត និងពុទ្ធិបរិស័ទ ចំណុះជើងវត្តទាំង៤ បានថ្លែងអំណរគុណយ៉ាងជ្រាលជ្រៅ ចំពោះលោកអភិបាលខណ្ឌ និងមន្តី្រសាលាខណ្ឌ ដែលបាននាំយកអំណោយ មកផ្គត់ផ្គង់ដល់ព្រះសង្ឃនាពេលនេះ។ នេះគឺជាការចូលរួមចំណែកមួយយ៉ាងសំខាន់ ក្នុងការជួយសម្រួលដល់ព្រះសង្ឃ សម្រាប់គង់ស្នាក់នៅសិក្សារៀនសូត្រធម៌ក្នុងរដូវចូលព្រះវស្សា អស់កាលត្រីមាស ក្នុងពុទ្ធសីមា តាមពុទ្ធានុញ្ញាតិ៕
