(ភ្នំពេញ)៖ គណៈកម្មាធិការអចិន្រ្តៃយ៍ នៃរដ្ឋសភា នៅព្រឹកថ្ងៃទី០៣ ខែមិថុនា ឆ្នាំ២០១៩នេះ បានបើកកិច្ចប្រជុំមួយ ដើម្បីពិនិត្យសំណើសុំអញ្ជើញ លោក អង្គ វង្ស វឌ្ឍានា រដ្ឋមន្រ្តីក្រសួងយុត្តិធម៌ ចូលបំភ្លឺទៅនឹងសំណួររបស់ លោក ប៉ែន បញ្ញា ប្រធានគណៈកម្មការទី៦។
កិច្ចប្រជុំនេះ បានធ្វើឡើងនៅវិមានរដ្ឋសភា ក្រោមអធិបតីភាព សម្តេច ហេង សំរិន ប្រធានរដ្ឋសភា ដោយមានការចូលរួមពីសមាជិកគណៈកម្មាធិការអចិន្រ្តៃយ៍នានា របស់រដ្ឋសភា។ កិច្ចប្រជុំ ក៏បានពិភាក្សា ដើម្បីកំណត់កាលបរិច្ឆេទ និងរបៀបវារៈ សម្រាប់សម័យប្រជុំរដ្ឋសភា លើកទី២ នាពេលខាងមុខនេះផងដែរ។
សូមបញ្ជាក់ថា រដ្ឋសភា បានធ្វើលិខិតមួយ កោះហៅរដ្ឋមន្រ្តីក្រសួងយុត្តិធម៌ ឱ្យចូលបំភ្លឺនៅក្នុងសម័យប្រជុំរដ្ឋសភា នាថ្ងៃទី០៤ ខែកក្កដា ឆ្នាំ២០១៩ ខាងមុខនេះ ពាក់ព័ន្ធនឹងការពង្រឹងច្បាប់។
លោក ឡេង ប៉េងឡុង បានអះអាងថា ការកោះហៅរដ្ឋមន្រ្តីក្រសួងយុត្តិធម៌ចូលបំភ្លឺ ធ្វើឡើងតាមសំណើរបស់គណៈកម្មការទី៦ នៃរដ្ឋសភា ដែលដឹកនាំដោយ លោកបណ្ឌិត ប៉ែន បញ្ញា។
សូមបញ្ជាក់ថា នេះជាលើកទី១ហើយ ដែលរដ្ឋសភា នីតិកាលទី៦ បានកោះហៅរដ្ឋមន្រ្តី របស់រាជរដ្ឋាភិបាល ទៅឆ្លើយបំភ្លឺពាក់ព័ន្ធនឹងការអនុវត្តការងារ ចាប់តាំងពីចូលកាន់តំណែងសម្រាប់អាណត្តិថ្មី រយៈពេល១ឆ្នាំកន្លងមក៕
