(ភ្នំពេញ)៖ សមាគមរោងចក្រកាត់ដេរនៅកម្ពុជា ហៅកាត់ថា GMAC បានក្រើនរំលឹកដល់សមាជិករបស់ខ្លួនទាំងអស់ ឲ្យប្រើប្រាស់សេវារបស់ក្រុមហ៊ុនដឹកជញ្ជូន ប្រើប្រាស់រថយន្តដឹកជញ្ជូនអនុលោមយ៉ាងពេញលេញតាមច្បាប់ស្តីពីចរាចរណ៍ផ្លូវគោក ដើម្បីជៀសវាងការកកស្ទះទំនិញដែលបណ្តាលមកពីការត្រួតពិនិត្យបច្ចេកទេសយានយន្ត។

ការអំពាវនាវរបស់ GMAC បានធ្វើឡើងចំពេលដែលគណៈកម្មាធិការជាតិសុវត្ថិភាពចរាចរណ៍ផ្លូវគោកកំពុងចាត់វិធានការក្តៅក្នុងការត្រួតពិនិត្យរថយន្ត និងបណ្ណបើកបររបស់អ្នកបើកបរនៅតាមកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ។ ប្រតិបត្តិការនេះបានធ្វើឡើងកាលពីថ្ងៃទី១៥ ខែមិថុនា ឆ្នាំ២០១៩។

ប្រតិបត្តិការត្រួតពិនិត្យលក្ខណៈបច្ចេកទេសរថយន្ត និងបណ្ណបើកបររបស់អ្នកបើករថយន្តនេះធ្វើឡើងក្នុងគោលដៅចម្បងរួមចំណែកកាត់បន្ថយអត្រាគ្រោះថ្នាក់ចរាចរណ៍លើដងវិថី ដែលរកឃើញថា បង្កឡើងដោយរថយន្តដឹកទំនិញធំៗក្នុងអត្រាប្រមាណ ២០ភាគរយ។ ប្រតិបត្តិការនេះ ត្រួតពិនិត្យទៅលើបណ្ណបើកបរថតចម្លង, បណ្ណបើកបរខុសពីប្រភេទរថយន្តកំពុងបើកជាក់ស្តែង, ផ្លាកលេខក្លែងក្លាយ, រថយន្តគ្មានលិខិតអនុញ្ញាតអាជីវកម្ម, រថយន្តគ្មានវិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ, យានយន្តកែច្នៃខុស លក្ខណៈបច្ចេកទេស, គ្មានខ្ចៅប៊ូឡុងតាកេគ្រប់គ្រាន់, កន្ទុយស៊ឺមីរ៉ឺម៉ក គ្មានគន្លឹះសុវត្ថិភាពទប់កុងតែណ័រ, សំបកកង់សឹកដល់កម្រិតអាចផ្ទុះបង្កគ្រោះថ្នាក់ និងគ្មានភ្លើងបំភ្លឺពេលយប់ជាដើម។

ប្រតិបត្តិការក្តៅរយៈពេលប្រមាណ ១៥ថ្ងៃកន្លងមកនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានពិនិត្យរថយន្តចំនួន ១,៩៥៤គ្រឿង នៅកំពង់ផែទាំងពីរ ហើយរកឃើញរថយន្តល្មើសច្បាប់ ២២៤គ្រឿង ស្មើនឹង ១១ភាគរយ។

នៅក្នុងលិខិតចំហររបស់ខ្លួននៅថ្ងៃទី០២ ខែកក្កដា ឆ្នាំ២០១៩នេះ សមាគមរោងចក្រកាត់ដេរនៅកម្ពុជា បានសម្តែងការគាំទ្រ ១០០% លើការអនុវត្តច្បាប់របស់គណៈកម្មការជាតិសុវត្ថិភាពចរាចរណ៍ផ្លូវគោក ក្នុងគោលបំណងទប់ស្កាត់ និងកាត់បន្ថយគ្រោះថ្នាក់ចរាចរណ៍ឲ្យបានដល់កម្រិតអតិបរមា។

សមាគមរោងចក្រកាត់ដេរនៅកម្ពុជា ក៏បានអំពាវនាវដល់បណ្តាម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ ជាពិសេសក្រុមហ៊ុនដឹកជញ្ជូនទាំងអស់ដែលបាននិងកំពុងផ្តល់សេវាដឹកជញ្ជូនដល់រោងចក្រកាត់ដេរសម្លៀកបំពាក់ ផលិតស្បែកជើង និងកាបូប (Travel Goods) ឲ្យបង្កើនការយកចិត្តទុកដាក់ និងអនុវត្តឲ្យបានខ្ជាប់ខ្ជួនជាអតិបរមានូវរាល់បទដ្ឋានបច្ចេកទេស និងលក្ខខណ្ឌតម្រូវ ដូចដែលមានចែងនៅក្នុងបទប្បញ្ញត្តិច្បាប់ស្តីពីចរាចរណ៍ផ្លូវគោក ដើម្បីធានានូវសុវត្ថិភាពលើផ្លូវសាធារណៈ និងធានានូវនិរន្តរភាពនៃការផ្តល់សេវាដល់អតិថិជន។

បើទោះបីជាយ៉ាងណាសមាគមរោងចក្រកាត់ដេរ បានស្នើសុំលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ចូនឲ្យមានវិធានការដំណោះស្រាយបណ្តោះអាសន្ន ចំពោះការរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក។

សមាគមក៏បានស្នើសុំរាជរដ្ឋាភិបាលកម្ពុជា ឲ្យមានដំណោះស្រាយបណ្តោះអាសន្នមួយជាមួយសមាគមដឹកជញ្ជូនកម្ពុជា ពាក់ព័ន្ធការពង្រឹងការអនុវត្តច្បាប់ចរាចរណ៍របស់គណៈកម្មការជាតិសុវត្ថិភាពចរាចរណ៍ផ្លូវគោក។ ក្នុងលិខិតចំហរនេះ សមាគមរោងចក្រកាត់ដេរនៅកម្ពុជា បានលើកឡើងថា សមាជិករបស់សមាគម បាននិងកំពុងក្លាយជាជនរងគ្រោះ នៅក្នុងបញ្ហានេះដោយមិនដឹងខ្លួន។

ក្នុងសន្និសីទព័ត៌មានស្តីពីប្រតិបត្តិការត្រួតពិនិត្យលក្ខណៈបច្ចេកទេសយានយន្ត និងបណ្ណបើកបរនៅថ្ងៃទី០២ ខែកក្កដា ឆ្នាំ២០១៩នេះ លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន បានអះអាងថា ការកកស្ទះនៅតាមកំពង់ផែ កើតឡើងដោយសារតែរថយន្តមិនគោរពច្បាប់។ ក្រុមការងារបានរកឃើញទៀតថា រថយន្តមិនគោរពច្បាប់នេះភាគច្រើនជារបស់ក្រុមហ៊ុនដឹកជញ្ជូន ដែលមានរថយន្តច្រើន។

លោក សេង ឈួន បានអះអាងដូច្នេះ «ដោយសាររថយន្តទាំងអស់នោះ មិនមានឯកសារគ្រប់គ្រាន់។ ដល់អត់មានឯកសារគ្រប់គ្រាន់គាត់មិនហ៊ានចូល អ្នកដែលគេមានឯកសារគ្រប់គ្រាន់គេចូលបាន គេចេញចូលបានអត់មានពិបាកអីទេ។ លើកលែងតែអ្នកអត់មានឯកសារគ្រប់គ្រាន់ទេ ខ្លះខ្វះនេះខ្វះនោះ ខ្វះបណ្ណបើកបរ ខ្វះសៀវភៅឆៀក ខ្វះផ្លាកលេខ មិនត្រូវបច្ចេកទេស។ ខ្លះខ្វះប៊ូឡុង តាកេមិនគ្រប់ ឃ្លីបកុងតឺន័រអត់មានទៀត...។ បានន័យថា វាខ្វះគ្រប់ ខ្វះសព្វ ដល់អ៊ីចឹងអ្នកបើកបរចេះតែគេច ចេះតែចតចោល អត់ព្រមចូល ដល់មានការកកស្ទះកើតឡើងម្ចាស់ក្រុមហ៊ុនថា យើងសមត្ថកិច្ចហ្នឹងធ្វើការផាកពិន័យយកលុយគេ»។

នាយឧត្តមសេនីយ៍ ហឹម យ៉ាន អគ្គស្នងការរងនៃអគ្គស្នងការនគរបាលជាតិ និងជាសមាជិកគណៈកម្មាធិការជាតិសុវត្ថិភាពចរាចរណ៍ផ្លូវគោក បានអះអាងដែរថា ការត្រួតពិនិត្យរថយន្តនៅកំពង់ផែនេះ ចំណាយពេលត្រឹមតែមួយ ទៅពីរនាទីប៉ុណ្ណោះ ប្រសិនបើរថយន្តមានឯកសារ និងលក្ខណៈបច្ចេកទេសគ្រប់គ្រាន់ ពោលមិនធ្វើឱ្យយឺតយ៉ាវនោះឡើយ។

លោក ហឹម យ៉ាន បានបញ្ជាក់យ៉ាងដូច្នេះថា «មិនយឺតយ៉ាវដោយសារការរឹតបន្តឹងនេះទេនិយាយឱ្យចំ យឺតយ៉ាវដោយសារក្រុមហ៊ុនដឹកជញ្ជូនទំនិញ ម្ចាស់យានយន្តមិនគោរពច្បាប់ចរាចរណ៍មិនមែនមកពីសមត្ថកិច្ចទេ។ ឡានដែលគោរពច្បាប់ធានាថា តែមួយនាទី ឬ ពីរនាទីទេ គឺត្រូវតែឆ្លងកាត់ផុតកន្លែងត្រួតពិនិត្យហើយ។ សំណូមពរដល់ក្រុមហ៊ុនដឹកជញ្ជូនទំនិញទាំងអស់ សូមមេត្តាគោរពច្បាប់ចរាចរណ៍ ធានាលក្ខណៈបច្ចេកទេសយានយន្តឱ្យបានត្រឹមត្រូវតាមច្បាប់កំណត់ មានឯកសារគ្រប់គ្រាន់ត្រឹមត្រូវតាមច្បាប់កំណត់»៕