(កំពត)៖ លោក យឹម ហៀង ប្រធានកម្មវិធីប្រយុទ្ធប្រឆាំងជាមួយជំងឺគ្រុនឈាម គ្រុនចាញ់ និងដង្កូវព្រូន នៃមន្ទីរសុខាភិបាលខេត្តកំពត បានបញ្ជាក់ឲ្យដឹងថា គិតត្រឹមខែមិថុនានេះ ខេត្តកំពតមានជំងឺគ្រុនឈាម បានកើនឡើងដល់២៣០ករណី ខណៈរយៈពេលដូចគ្នាឆ្នាំ២០១៨ មានត្រឹមតែ២៨ករណីប៉ុណ្ណោះ។
លោក យឹម ហៀង បានបញ្ជាក់បែបនេះ នៅព្រឹកថ្ងៃទី២៩ ខែមិថុនា ឆ្នាំ២០១៩នេះ ខណៈលោក ញា ប៊ុនថន ប្រធានមន្ទីរសុខាភិបាលខេត្តកំពត បានដឹកនាំមន្ត្រីសុខាភិបាលក្រោមឱវាទ និងមានការចូលរួម ពីសំណាក់អាជ្ញាធរពាក់ព័ន្ធ ធ្វើយុទ្ធនាការលប់បំបាត់ លំនៅជម្រក និងទីតាំង មូសខ្លា ក្នុងភូមិសាស្ត្រនៃក្រុងកំពត។
លោក យឹម ហៀង បញ្ជាក់ថា ដោយយោងតាមរបាយការណ៍ របស់មន្ទីរសុខាភិបាលខេត្តកំពត ក្នុងខែមិថុនា នេះមានករណីគ្រុនឈាម ២៣០ករណី បើធៀបទៅនឹងឆ្នាំ២០១៨ គឺមានតែ ២៨ករណីទេ។ អញ្ចឹងឃើញថា វាមានការកើនឡើងជាង១០ដង ទៅនឹងឆ្នាំ២០១៨ តែករណីស្លាប់មិនទាន់មានទេ។
លោកក៏បានអំពាវនាវ ដល់ពលរដ្ឋទូទៅ ឲ្យយល់អំពីវិធានការការពារ ពាក់ព័ន្ធ ជុំវិញជំងឺគ្រុនឈាមនេះ ត្រូវលុបជម្រកមូស ទីតាំងនៅជុំវិញផ្ទះរបស់ពួកគាត់ ឲ្យមានអនាម័យស្អាត កុំឲ្យមានទឹកដក់ ពីព្រោះមូសខ្លា ជាប្រភពចម្លងដ៏សំខាន់នៃជំងឺគ្រុនឈាម ជាពិសេស បានសំណូមពរដល់អាជ្ញាធរមូលដ្ឋាន ភូមិ ឃុំ សង្កាត់ ឲ្យជួយសហការ អប់រំ ទៅដល់អ្នកធ្វើអជីកម្ម ដែលពាកព័ន្ធ ជុំវិញការផ្ទុកសំបកកង់រថយន្ត ដែលជាប្រភពចម្លងយ៉ាងចម្បងបំផុត អាចជាភ្នាក់ងារចម្លងធំ ដែលបង្កើតជម្រកមូសខ្លា ហើយបង្កើតជាបញ្ហានៃជំងឺគ្រុនឈាមនេះ។
លោក យឹម ហៀង បានលើកឡើងទៀតថា ដោយឆ្នាំនេះ ជាឆ្នាំមួយដែលពាក់ព័ន្ធនឹងជំងឺគ្រុនឈាម រយៈពេលប្រាំឆ្នាំ ដែលវាមានការវិវត្តន៍ខ្លាំង ហើយមានការផ្ទុះខ្លាំង ដោយឡែកនៅខេត្តកំពត ក៏ដូចជាក្នុងស្រុកប្រតិបត្តិទាំងបួនក្នុងខេត្តកំពតទាំងមូល។ ដូច្នេះមន្ទីរសុខាភិបាល ចាំបាច់ត្រូវធ្វើយុទ្ធនាការ ដាក់ថ្នាំ អាបែត ដើម្បីកំចាត់មូសខ្លា និងអប់រំសុខភាពទៅដល់ប្រជាពលរដ្ឋ អំពីជំងឺគ្រុនឈាមឲ្យគាត់ស្គាល់ ពីរោគសញ្ញាជំងឺគ្រុនឈាម គាត់ចេះមានវិធានការការពារ កុំឲ្យមានកើតជំងឺគ្រុនឈាម ទៅដល់កូនចៅរបស់ពួកគាត់។
លោកថ្លែងថា «យើងដឹងហើយថា ជំងឺគ្រុនឈាម មិនត្រឹមតែកើតមាន ចំពោះក្មេងទេ មានកើតទៅដល់មនុស្សចាស់ថែមទៀតផង។ អញ្ចឹងហើយមន្ទីរសុខាភិបាល ដុតដៃដុតជើង ដោយមានការ សហការជាមួយនឹងអាជ្ញាធរពាក់ព័ន្ធ និងក្រុមយុវជនស្រឡាញ់សន្តិភាព ជួយដោយស្ម័គ្រចិត្ត ចុះជួយដាក់ថ្នាំអាបែតតាមកេហដ្ឋាន របស់ពលរដ្ឋ ដោយឡែកនៅតំបន់ក្រុងកំពតនេះ»៕
