(កំពង់ធំ)៖ លោកបណ្ឌិត ងួន ញ៉ិល សមាជិកគណៈអចិន្ត្រៃយ៍ គណៈកម្មាធិការកណ្តាលគណបក្សប្រជាជនកម្ពុជា អនុប្រធានទី១ រដ្ឋសភានៃកម្ពុជា និងជាប្រធានក្រុមការងារគណបក្សថ្នាក់កណ្តាល ចុះជួយខេត្តកំពង់ធំ នៅថ្ងៃទី២៥ ខែមិថុនា ឆ្នាំ២០១៩នេះ បានអញ្ជើញប្រគល់អគារសិក្សា១ខ្នង ៦បន្ទប់ សម្រាប់ប្រើប្រាស់ជាបណ្តោះអាសន្ន បន្ទប់ទឹក១កន្លែង ៤បន្ទប់ និងប្រកាសសាងសង់អគារសិក្សា១ខ្នង ៦បន្ទប់បន្ថែមទៀត ជូនវិទ្យាល័យ ហ៊ុន សែន ក្រវ៉ា ស្ថិតក្នុងឃុំក្រវ៉ា ស្រុកបារាយណ៍ ខេត្តកំពង់ធំ គឺជាការចូលរួមជាមួយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។
ក្នុងឱកាសសំណេះសំណាលជាមួយ លោកគ្រូ អ្នកគ្រូ មន្ត្រីរាជការ និងប្រជាពលរដ្ឋ លោកបណ្ឌិត ងួន ញ៉ិល បានលើកឡើងពីអនុសាសន៍របស់ សម្តេចតេជោ ហ៊ុន សែន អំពីការអភិវឌ្ឍន៍វិស័យអប់រំ និងប្រវត្តិ នៃការកកើតវិទ្យាល័យ ហ៊ុន សែន ក្រវ៉ា ដោយមានការផ្តួចផ្តើមគំនិតរបស់ លោកបណ្ឌិតផ្ទាល់ និងជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
ថ្ងៃនេះ ឆ្លើយតបតាមសំណូមពរស្នើសុំពីមាតាបិតាសិស្ស លោកគ្រូ-អ្នកគ្រូ ព្រមទាំងថ្នាក់ ថ្នាក់ដឹកនាំឃុំទាំង៤ គឺឃុំក្រវ៉ា ឃុំគគីរធំ ឃុំចើងដើង និងឃុំបាក់ស្នា ចំណុះស្រុកបារាយណ៍ ខេត្តកំពង់ធំ លោកបណ្ឌិត ងួន ញ៉ិល បានប្រគល់ជូនអគារសិក្សា១ខ្នង ៦បន្ទប់ ដែលទើបនឹងសាងសង់រួចរាល់កាលពីថ្ងៃទី១៦ ខែមិថុនា ឆ្នាំ២០១៩ ប្រកាសផ្តល់ជូន និងចាប់ដំណើរការសាងសង់ អគារសិក្សា១ខ្នង ៦បន្ទប់បន្ថែមទៀត និងធ្វើការជួសជុលផ្នែកខ្លះ នៃអគារដែលមានកន្លងមក តាមសំណូមពររបស់នាយកសាលាចាប់ពីថ្ងៃនេះ ដើម្បីឆ្លើយតបទៅនឹងតម្រូវការសិស្ស នាពេលបច្ចុប្បន្នមានចំនួន៥០០នាក់ ដែលខ្វះបន្ទប់រៀន ក្នុងចំនួនសិស្សានុសិស្សសរុប ដែលបានកើនឡើងចំនួន១,៥៣០នាក់។
អាជ្ញាធរខេត្តកំពង់ធំ ស្រុកបារាយណ៍ ៤ឃុំខាងលើ មាតាបិតាសិស្ស លោកគ្រូ-អ្នកគ្រូ ក្មួយៗសិស្សានុសិស្ស មានសេចក្តីត្រេកអរជាអនេក និងថ្លែងអំណរគុណយ៉ាងជ្រាលជ្រៅបំផុតជូនចំពោះ លោកបណ្ឌិត ងួន ញ៉ិល ដែលបានឆ្លើយតបទាន់ពេលវេលា៕
