(ភ្នំពេញ)៖ លោក ពេជ្រ កែវមុនី អភិបាលខណ្ឋមានជ័យ និងជាប្រធានគណៈបញ្ជាការឯកភាពរដ្ឋបាលខណ្ឋមានជ័យ បានជំរុញឲ្យសមត្ថកិច្ច នៅមូលដ្ឋានយកចិត្តទុកដាក់ និងដោះស្រាយលើបញ្ហាល្បែងស៊ីសង, គ្រឿងញៀន, សំរាម និងឡានធំចូលក្រុង។
ការជំរុញរបស់អភិបាលខណ្ឋមានជ័យនាពេលនេះធ្វើឡើងខណៈដែលលោកបានដឹកនាំកិច្ចប្រជុំគណៈបញ្ជាការឯកភាពរដ្ឋបាលខណ្ឋ ដើម្បីត្រួតពិនិត្យការងារដែលបានធ្វើកន្លងមក និងដើម្បីដាក់ផែនការអនុវត្តបន្ត ដែលរៀបចំនៅសាលប្រជុំសាលាខណ្ឋមានជ័យ រាជធានីភ្នំពេញ នារសៀលថ្ងៃទី១២ ខែមិថុនា ឆ្នាំ២០១៩។
លោក ពេជ្រ កែវមុនី បានបន្ថែមថា របៀបវារៈសំខាន់ៗ មាន៤ធំ ក្នុងនោះរួមមាន ល្បែងស៊ីសង គ្រឿងញៀន បញ្ហាសំរាម និងបញ្ហាឡានធំចូលក្រុង។ លោកបន្ថែមថា បញ្ហាទាំងនេះ នៅតែកើតមានឡើង ដែលតម្រូវឲ្យរដ្ឋបាលខណ្ឌ អាជ្ញាធរ និងសមត្ថកិច្ច យកចិត្តទុកដាក់ខ្លាំងដើម្បីដោះស្រាយ និងធ្វើយ៉ាងណាឲ្យមូលដ្ឋានខណ្ឌមានសន្តិសុខ សុវត្ថិភាព ។
ថ្លែងនៅក្នុងឱកាសនោះ អភិបាលខណ្ឋមានជ័យ បានសង្កត់ធ្ងន់ឲ្យអាជ្ញាធរ និងសមត្ថកិច្ចនៅក្នុងមូលដ្ឋាន បន្តយកចិត្តទុកដាក់ និងដោះស្រាយបន្ថែមលើបញ្ហាទាំងអស់ខាងលើ ក្នុងនាមជាអ្នកមើលការខុសត្រូ វក្នុងភូមិសាស្ត្ររបស់ខ្លួន ដើម្បីបម្រើផលប្រយោជន៍ជូនប្រជាពលរដ្ឋ៕
