(ភ្នំពេញ)៖ នៅថ្ងៃទី០៧ ខែមិថុនា ឆ្នាំ២០១៩នេះ មន្ដ្រីគ្រប់សាខានៅទូទាំងប្រទេសកម្ពុជា បាននិងកំពុងបើកយុទ្ធនាការចុះត្រួតពិនិត្យនំបញ្ចុក ដែលដាក់លក់នៅតាមទីផ្សារ ព្រមទាំងបន្លែជាល្បោយ ដើម្បីរកមើលសារធាតុគីមី មុនទិវាហូបនំបញ្ចុកនៅថ្ងៃទី០៩ ខែមិថុនាខាងមុខ តាមការអំពាវនាវរបស់ប្រមុខនៃរាជរដ្ឋាភិបាល។

លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានកាំកុងត្រូល ក្រសួងពាណិជ្ជកម្ម បានថ្លែងប្រាប់បណ្ដាញព័ត៌មាន Fresh News ឲ្យដឹងថា មន្ដ្រីកាំកុងត្រូលនៅគ្រប់សាខាទូទាំងប្រទេស បានចុះពិនិត្យសារធាតុគីមីនៅលើនំបញ្ចុក និងបន្លែ រកសារធាតុលាយផ្សំផ្សេងៗ មុនទិវាហូបនំបញ្ចុកនៅទូទាំងប្រទេស នៅថ្ងៃទី០៩ ខែមិថុនា ឆ្នាំ២០១៩ខាងមុខនេះ។

បើតាមលោក ម៉ក់ ពេជ្ជរិទ្ធ ក្រៅពីការចុះត្រួតពិនិត្យនំបញ្ចុក និងបន្លែល្បោយនោះ មន្រ្តីកាំកុងត្រូលក៏បានធ្វើការត្រួតពិនិត្យទំនិញផ្សេងៗទៀតផងដែរ ដើម្បីរកសារធាតុគីមី និងខូចគុណភាព តែភាគច្រើនមិនបានរកឃើញនោះទេ។

សូមបញ្ជាក់ថា ឆ្លើយតបទៅនឹងយុទ្ធនាការ «ហូបនំបញ្ចុក» ដែលរៀបចំដោយក្រុមអតីតបក្សប្រឆាំងនៅកម្ពុជានោះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានលើកឡើងថា ការហូរនំបញ្ចុកមិនអាចក្លាយទៅជាការបំបែកបំបាក់ជាតិនោះទេ ហើយសម្ដេចក៏បានណែនាំដល់សមាជិក សមាជិកា គណបក្សប្រជាជនកម្ពុជាទាំងអស់ រួមគ្នារៀបចំកម្មវិធីហូបនំបញ្ចុក នៅថ្ងៃទី០៩ ខែមិថុនា ឆ្នាំ២០១៩ខាងមុខនេះ។

មានប្រសាសន៍ក្នុងពិធីប្រគល់សញ្ញាបត្រ ដល់និស្សិតសាកលវិទ្យាល័យភូមិន្ទភ្នំពេញ (RUPP) ប្រមាណ៣,១៦១នាក់ នៅមជ្ឈមណ្ឌលពិព័រណ៍ និងសន្និបាតកោះពេជ្រ នៅព្រឹកថ្ងៃទី០៣ ខែមិថុនា ឆ្នាំ២០១៩នេះ សម្ដេចតេជោ ហ៊ុន សែន ក៏បានអំពាវនាវឲ្យប្រជាពលរដ្ឋនៅទូទាំងប្រទេសនាំគ្នា «បរិភោគនំបញ្ចុក» ទាំងអស់គ្នា។

ជាមួយគ្នានេះ សម្ដេចតេជោ ហ៊ុន សែន ក៏បានសម្ដែងនូវការងឿងឆ្ងល់ផងដែរ ចំពោះក្រុមអតីតបក្សប្រឆាំង ដែលយករឿងនំបញ្ចុក មកធ្វើជារឿងនយោបាយទៅវិញ រហូតដល់បង្កើតជាកម្មវិធីហូបនំបញ្ចុក ហើយអ្នកដែលទទួលទាននំបញ្ចុកជាអ្នកស្នេហាជាតិ និងគាំទ្រគណបក្សប្រឆាំងដែលស្លាប់ទៅនោះ។

យ៉ាងណាក៏ដោយ ដើម្បីឲ្យប្រជាពលរដ្ឋអស់មន្ទិលសង្ស័យលើករណីនេះ សម្ដេចតេជោនាយករដ្ឋមន្ដ្រី បានអំពាវនាវដល់ប្រជាពលរដ្ឋ ពិសេសអ្នកគាំទ្រគណបក្សប្រជាជនកម្ពុជា នាំគ្នារៀបចំពិធីហូបនំបញ្ចុកទាំងអស់គ្នាតែម្ដង ដើម្បីបង្ហាញអំពីការសាមគ្គីជាតិ មិនមែនជាការបំបែកបំបាក់ជាតិនោះទេ៕

 ខាងក្រោមនេះជាសកម្មភាពរបស់មន្រ្តីតាមសាខាចុះត្រួតពិនិត្យនំបញ្ចុក និងទំនិញនៅតាមផ្សារនានា៖

* សាខាកាំកុងត្រូលខេត្តក្រចេះ ចុះត្រួតពិនិត្យម្ហូបអាហារ បន្លែត្រីសាច់ ក្នុងផ្សារចំនួន២ ក្រុងក្រចេះ ពុំឃើញបន្លែ ឬម្ហូបអាហារមានសារធាតុគីមីនោះទេ

* មន្រ្តីកាំកុងត្រូលសាខាខេត្តស្ទឹងត្រែង ចុះអង្កេតទំនិញនៅផ្សារសាមគ្គី ក្រុងស្ទឹងត្រែង ដោយផ្តោតសំខាន់លើនំបញ្ចុក និងបន្លែ តែរកមិនឃើញមានសារធាតុគីមីនោះទេ

* មន្រ្តីកាំកុងត្រូលកំពង់ផែអន្តរជាតិភ្នំពេញ ចុះអង្កេតពិនិត្យទំនិញម្ហូបអាហារនៅផ្សារធំៗ ក្នុងខណ្ឌច្បារអំពៅ, ផ្តោតសំខាន់លើនំបញ្ចុក និងបន្លែ តែរកមិនឃើញមានសារធាតុគីមីឡើយ

* សាខាកាំកុងត្រូលខេត្តសៀមរាប ចុះអង្កេតទំនិញម្ហូបអាហារ នៅផ្សារលើធំថ្មី ផ្តោតសំខាន់លើនំបញ្វុក និងបន្លែ មុនការប្រារព្ធពិធីបរិភោគនំបញ្ចុក តែរកមិនឃើញមានសារធាតុគីមីឡើយ

* មន្រ្តីសាខាកាំកុងត្រូលខេត្តកណ្តាល នាំរថយន្តមន្ទីរពិសោធន៍ចល័ត ទៅពិនិត្យទំនិញនៅផ្សារតាខ្មៅ រកឃើញប្រហុកមានសារធាតុ Formalin កន្ធំថេត និងជីមានសំណល់ថ្នាំកសិកម្ម

* សាខាកាំកុងត្រូលខេត្តកំពង់ឆ្នាំង ចុះពិនិត្យទំនិញនៅផ្សារលើ និងផ្ទះលក់ដូរនៅជុំវិញផ្សារឆ្នាំង ផ្តោតសំខាន់លើនំបញ្ចុក និងបន្លែតែរកមិនឃើញឡើយ

* សាខាកាំកុងត្រូលខេត្តកំពង់ធំ ចុះពិនិត្យទំនិញនៅផ្សារកំពង់ធំ ផ្តោតសំខាន់លើនំបញ្ចុក និងបន្លែ តែរកមិនឃើញឡើយ

* សាខាកាំកុងត្រូលខេត្តរតនគិរី ចុះពិនិត្យទំនិញនៅផ្សារបានលុង ដោយផ្តោតសំខាន់លើនំបញ្ចុក និងបន្លែសាខាកាំកុងត្រូលខេត្តរតនគិរី ចុះពិនិត្យទំនិញនៅផ្សារបានលុង ដោយផ្តោតសំខាន់លើនំបញ្ចុក និងបន្លែ

* មន្ត្រីសាខាកាំកុងត្រូលខេត្តព្រៃវែង ចុះត្រួតពិនិត្យផលិតផលម្ហូបអាហារ (នំបញ្ចុក) នៅផ្សារអ្នកលឿង ដើម្បីរកសារធាតុគីមីហាមឃាត់

* មន្រ្តីកាំកុងត្រូលផែស្ងួតចុងទីភ្នំពេញ ចុះពិនិត្យសុវត្ថិភាពចំណីអាហារនៅផ្សារដើមគ ដើម្បីទប់ស្កាត់នូវទំនិញ ឬចំណីអាហារលួចលាយសារធាតុគីមីហាមឃាត់ និងខូចគុណភាព

 * សាខាកាំកុងត្រូលខេត្តប៉ៃលិន ចុះពិនិត្យទំនិញនៅផ្សារប៉ាហ៊ី ក្នុងក្រុងប៉ៃលិន ដោយផ្តោតសំខាន់លើនំបញ្ចុក និងបន្លែសាខាកាំកុងត្រូលខេត្តប៉ៃលិន ចុះពិនិត្យទំនិញនៅផ្សារប៉ាហ៊ី ក្នុងក្រុងប៉ៃលិន ដោយផ្តោតសំខាន់លើនំបញ្ចុក និងបន្លែ

* ហូបនំបញ្ចុកទាំងអស់គ្នា! កាំកុងត្រូលខេត្តត្បូងឃ្មុំ ចុះត្រួតពិនិត្យម្ហូបអាហារនំបញ្ចុក និងបន្លែ នៅផ្សារនានាក្នុងស្រុកពញាក្រែក, លទ្ធផលគ្មានសារធាតុគីមីនោះឡើយ

* សាខាកាំកុងត្រូលខេត្តឧត្តរមានជ័យ ចុះពិនិត្យទំនិញមួយចំនួន និងគ្រឿងបន្លែល្បោយនំបញ្ចុកនៅផ្សាសំរោង តែរកពុំឃើញមានសារធាតុគីមីទេ

* មន្រ្តីកាំកុងត្រូលខេត្តតាកែវ ចុះពិនិត្យសិប្បកម្មផលិតនំបញ្ចុក នៅក្នុងក្រុងដូនកែវ

* កាំកុងត្រូលខេត្តពោធិ៍សាត់ បន្តចុះត្រួតពិនិត្យទំនិញ នៅផ្សារថ្មីពោធិ៍សាត់ តែរកមិនឃើញសារធាតុគីមីហាមឃាត់ទេ និងបានដកហូតទំនិញហូសកាលបរិច្ឆេទ ២១៣គីឡូក្រាម

 មន្ត្រីកាំកុងត្រូលខេត្តព្រះសីហនុ បន្តចុះរកសារធាតុគីមី ទៅលើនំបញ្ចុក និងគ្រឿងផ្សំមន្ត្រីកាំកុងត្រូលខេត្តព្រះសីហនុ បន្តចុះរកសារធាតុគីមី ទៅលើនំបញ្ចុក និងគ្រឿងផ្សំ