(ស្វាយរៀង)៖ លោកវេជ្ជបណ្ឌិត កែ រដ្ឋា ប្រធានមន្ទីរសុខាភិបាល ខេត្តស្វាយរៀង នៅព្រឹកថ្ងៃទី៣០ ខែឧសភា ឆ្នាំ២១០៩នេះ បានដឹកនាំកិច្ចប្រជុំសេចក្តីណែនាំ ការអនុវត្តកម្មវិធីឧបត្ថម្ភសាច់ប្រាក់ ជូនស្ត្រីមានផ្ទៃពោះ និងកូនអាយុក្រោម២ឆ្នាំ នៃគ្រួសារមានប័ណ្ណសមធម៌ ឬប័ណ្ណអាទិភាព។ ពិធីនេះ មានការចូលរួមពីលោក លោកស្រី ដែលប្រធានការិយាល័យសុខាភិបាលស្រុកក្រុង និងប្រធានមន្ទីពេទ្យ និងប្រធានមណ្ឌលសុខភាព ផងដែរ។
លោកវេជ្ជបណ្ឌិត កែ រដ្ឋា បានថ្លែងថា ការបង្កើតឲ្យមានកម្មវិធីឧបត្ថម្ភសាច់ប្រាក់ ជូនស្ត្រីមានផ្ទៃពោះ និងកូនអាយុក្រោម២ឆ្នាំ នៃគ្រួសារមានប័ណ្ណសមធម៌នេះ ក្នុងគោលបំណងលើកកម្ពស់សុខមាលភាពមាតា និងទារក ព្រមទាំងចូលរួមចំណែកកាត់បន្ថយអាត្រាឈឺនិងស្លាប់ របស់មាតានិងទារក និងស្លាប់របស់មាតា និងទារក និងកង្វះអាហារូបត្ថម្ភ របស់កុមារក្នុងគ្រួសារក្រីក្រ ចាប់តាំងពីកូនក្នុងផ្ទៃរហូតដល់អាយុ២ឆ្នាំ និងជំរុញការលូតលាស់ទាំងកាយសម្បទា និងបញ្ញាស្មារតី ស្របតាមយុទ្ធសាស្ត្រចតុកោណដំណាក់ទី៤ របស់រាជរដ្ឋាភិបាល។
លោក កែ រដ្ឋា បានបញ្ជាក់ថា កម្មវិធីឧបត្ថម្ភសាច់ប្រាក់នេះ នឹងអនុវត្តចាប់ពីថ្ងៃទី០១ ខែមិថុនា ឆ្នាំ២០១៩តទៅ ដោយយោងតាមការប្រកាសអន្តរក្រសួងលេខ៥២៤ សហវ.ប្រកថ្ងៃទី២១ ខែឧសភា ឆ្នាំ២០១៩ របស់ក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាល។
លោកប្រធានមន្ទីរ បានឲ្យដឹងទៀតថា ការកំណត់បានជាអត្តសញ្ញាណស្ត្រីក្រីក្រ មានផ្ទៃពោះ ដើម្បីទទួលបានប័ណ្ណត្រូវអនុវត្តន៍ ដូចកម្មវិធីសមធម៌សម្រាប់ស្រី្តក្រីក្រ គឺអនុញ្ញាតឲ្យខាងមណ្ឌល សុខភាពវាយតម្លៃកំណត់ អត្តសញ្ញាណស្ត្រីក្រីក្រផ្តល់ប័ណ្ណអាទិភាព។
ដោយអនុវត្តន៍តាមយន្តការឧបករណ៍ វាយតម្លៃដូចកម្មវិធីសមធម៌សម្រាប់ស្ត្រីក្រីក្រ នៅមន្ទីរពេទ្យបង្អែក។ ក្នុងនោះ គណៈកម្មការកំណត់អត្តសញ្ញាណខាងលើ មានបីរូប គឺប្រធានមណ្ឌលចំនួនមួយរូប និងបុគ្គលិកចំនួន២រូបទៀត។ ដោយប័ណ្ណនីមួយៗ មានសុពលភាពរយៈពេល២ឆ្នាំ។
លោក កែ រដ្ឋា បានបន្តថា កម្មវិធីឧបត្ថម្ភសាច់ប្រាក់ខាងលើ នឹងដំណើរការដោយកម្មវិធីគ្រប់គ្រងទិន្នន័យ តាមរយៈប្រព័ន្ធទូរស័ព្ទដៃ និងកុំព្យុទ័របន្ទាប់ពីស្ត្រី និងកូនអាយុ២ឆ្នាំ បានទទួលសេវាថែទាំសុខភាពរួចរាល់ ហើយនឹង ទទួលបានសេវាសាធារណៈនោះ មន្ត្រីទទួលបន្ទុក នឹងផ្តល់កាតគណនេយ្យវីង សម្រាប់បើកសាច់ប្រាក់ដោយផ្ទាល់ នៅតាមសាខាភ្នាក់ងារវីង ទូទាំងប្រទេស។
សូមបញ្ជាក់ថា តាមប្រកាស អន្តរក្រសួង ស្តីពី ការអនុវត្តកម្មវិធីឧបត្ថម្ភសាច់ប្រាក់ជូនស្ត្រី មានផ្ទៃពោះ និងកូនអាយុក្រោម២ឆ្នាំ នៃគ្រួសារ មានប័ណ្ណសមធម៌ ឬប័ណ្ណអាទិភាព គឺស្ត្រីមានផ្ទៃពោះមកទទួលសេវានៅមូលដ្ឋាន សុខាភិបាលសាធារណៈតាមដំណាក់កាល ដូចតទៅ ទី១៖ ផ្តល់ចំនួន៤០,០០០រៀលម្តង សម្រាប់ការមកទទួលសេវាពិនិត្យផ្ទៃពោះ ដែលផ្តល់ជាអតិបរមាចំនួនបួនដង មុនពេលសម្រាលកូន។
ដំណាក់កាល ទី២ ផ្តល់ការឧបត្ថម្ភចំនួន២០០,០០០រៀលម្តងគត់ នៅពេលសម្រាលកូន និងដំណាក់កាលទី៣ ផ្តល់ចំនួន៤០,០០០រៀលក្នុងម្តង ដែលផ្តល់ជាអតិបរមាចំនួន១០ដង។ ក្នុងនោះ បីដង នៅពេលមកទទួល សេវាពិនិត្យសុខភាព ក្រោយពេល សម្រាលកូន និងប្រាំពីរដង នៅពេលយកកូនមកទទួលថ្នាំបង្ការ រហូតដល់កូនអាយុ២ឆ្នាំ។
នៅមានប្រការជាច្រើនករណីផ្សេងទៀត ដូចជាករណីរលូតកូន ករណីកូនស្លាប់ពេលសម្រាលជាដើម គឺសូមទំនាក់ទំនងទទួលព័ត៌មាន ទៅកាន់មន្ត្រីជាគ្រូពេទ្យ នៅតាមមណ្ឌលសុខភាព នៅជិតលំនៅដ្ឋាននោះ៕
