(ភ្នំពេញ)៖ គណៈកម្មាធិការជាតិរៀបចំការបោះឆ្នោត (គ.ជ.ប) បានអះអាងថា រយៈពេល ២ (ពីរ) ថ្ងៃ បន្ទាប់ពីថ្ងៃបោះឆ្នោត និងរាប់សន្លឹកឆ្នោត ឬ/និងថ្ងៃបិទផ្សាយលទ្ធផលបណ្តោះអាសន្ន នៃការបោះឆ្នោតនៅការិយាល័យបោះឆ្នោតពាក់ព័ន្ធ គណៈកម្មការរាជធានី ខេត្តរៀបចំការបោះឆ្នោតទាំង ២៥ រាជធានី ខេត្ត គ្មានទទួលពាក្យបណ្តឹងណាមួយឡើយ។

សេចក្តីជូនដំណឹងរបស់គ.ជ.ប ដែលបណ្តាញព័ត៌មាន Fresh News ទទួលបាន បង្ហាញថា ចំពោះពាក្យបណ្តឹងពាក់ព័ន្ធនឹងគ្រប់អំពើបំពានលើបទប្បញ្ញតិ្តនៃជំពូកទី៣ថ្មី (ទោសប្បញ្ញតិ្ត) នៃច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ទាំងនៅថ្នាក់គណៈកម្មការរាជធានី ខេត្តរៀបចំការបោះឆ្នោត ទាំងនៅថ្នាក់ គ.ជ.ប ក៏គ្មានទទួលពាក្យបណ្តឹងណាមួយដែរ។

សូមជម្រាបជូនថា ដំណើរការបោះឆ្នោតជ្រើសរើសក្រុមប្រឹក្សា អាណត្តិទី៣ ដែលបានប្រព្រឹត្តទៅកាលពីថ្ងៃទី២៦ ខែឧសភា ឆ្នាំ២០១៩ បានប្រព្រឹត្តទៅដោយរលូន គ្មានការរាំងស្ទះ គ្មានអំពើហិង្សា គ្មានការគំរាមកំហែង ស្ថិតក្នុងបរិយាកាសសន្តិសុខ និងសណ្តាប់ធ្នាប់ល្អ ៕