(សៀមរាប)៖ កម្មវិធី «តោះជិះកង់ដើម្បីសហគមន៍» ឆ្នាំ២០១៩ ប្រមូលបានថវិកាហូតដល់ប្រមាណ ២ម៉ឺនដុល្លារ និងបរិច្ចាគទាំងស្រុងដល់ មន្ទីរពេទ្យគុន្ធបុប្ផាខេត្តសៀមរាប។ មានការចូលរួមពីអ្នកជិះកង់ប្រមាណជាង ១០០០នាក់ ហើយកម្មវិធីជិះកង់ដើម្បីសហគមន៍ បានប្រារព្ធឡើងនៅព្រឹកថ្ងៃទី២៦ ខែឧសភា ឆ្នាំ២០១៩ ក្រោមការរៀបចំដោយសមាគមន៍ អ្នកជិះកង់ខេត្តសៀមរាប ឧបត្ថម្ភធំដោយក្រុមហ៊ុនទឹកពិសា វីតាល់ ។
លោក អ៊ុ វណ្ណៈ ប្រធានផ្នែកទំនាក់ទំនងទីផ្សារ នៃក្រុមហ៊ុនវីតាល់ បានថ្លែងថា នេះជាឆ្នាំទី ៥ហើយ ដែលវីតាល់បានចូលរួមឧបត្ថម្ភដល់កម្មវិធីជិះកង់នេះ។ ផ្អែកលើទស្សនវិស្ស័យ រួមគ្នាគឺការជួយដល់សង្គម និងពង្រឹងសកម្មភាពមនុស្សធម៌ វីតាល់ រីករាយនឹងបន្ត និងគាំទ្រដល់សមាគមន៍ជិះកង់កម្ពុជា ក្នុងការរៀបចំកម្មវិធីជិះកង់សប្បុរស ដើម្បីមន្ទីរពេទ្យគុន្ធបុប្ផា ដែលកំពុងត្រូវការជាចាំបាច់ ក្នុងការជួយសង្គ្រោះជីវីតកុមារ រាប់ពាន់អ្នកជារៀងរាល់ថ្ងៃ។ ពីក្រោយភាពជោគជ័យរបស់កម្មវិធី វីតាល់ មើលឃើញថា ក្រុមការងារបានខិតខំប្រឹងប្រែងយ៉ាងខ្លាំង ដើម្បីប្រារព្ធកម្មវិធីមួយដ៏ល្អ សម្រាប់សង្គមជាតិ និងវិស័យកីឡាផងដែលបញ្ជាក់ច្បាស់ពីសាមគ្គីភាព។
វីតាល់ក៏រំពឹងថា នឹងបន្តសកម្មភាពនេះ បន្តបន្ទាប់ទៀតរៀង រាល់ឆ្នាំបើសិនជានៅតែមានការគាំទ្រខ្លាំង ពីសំណាក់បងប្អូនប្រជាពលរដ្ឋ។ លោក គឹម ប៊ុនថាន់ ស្ថាបនិក នៃសមាគមអ្នកជិះកង់ ដើម្បីសហគមន៍ បានបន្ថែមថា «កម្មវិធីឆ្នាំនេះពិតជាកាន់តែពិសេសខ្លាំងមែនទែន ដោយមានការគាំទ្រ និងចូលរួមយ៉ាងច្រើនកុះករពីសំណាក់អ្នកជិះកង់ច្រើនជាងមុន ថែមទាំងទទួលបានការ ឧបត្ថម្ភជាច្រើនពីស្ថាប័នផ្សេងៗ ជាពិសេសក្នុងនោះ មានការឧបត្ថម្ភធំជាងគេ ពីក្រុមហ៊ុនទឹកពិសាវីតាល់ ដែលអាចធ្វើឱ្យកំណើនមូលនិធិឆ្នាំនេះ កើនឡើងគួរឱ្យកត់សម្គាល់។ អ្វីដែលកាន់តែរំភើបទៅទៀតនោះគឺ សំបុត្រចូលរួមត្រូវបានលក់ អស់តាំង ពីថ្ងៃចាប់បើកលក់ក្នុងអាទិត្យដំបូង ហើយចំនួនក៏បន្តកើនឡើងជាលំដាប់ ដែលការនេះបានបង្កើន ទឹកចិត្តក្រុមការងារទាំងអស់ផងដែរ។
លោក ប៊ុន ថាន់ ក៏បានថ្លែងអំណរគុណ ដល់វីតាល់ចំពោះការចូលរួមចំណែកឧបត្ថម្ភ និងរៀបចំកម្មវិធីឲ្យមានភាព កាន់តែអធិកអធម។ «តោះជិះកង់ដើម្បីសហគមន៍ឆ្នាំទី ៦» បានបញ្ចប់ទៅដោយក្តីរីករាយ ស្នាមញញឹម មិត្តភាព និងអនុស្សាវរីយ៍ដែលមិនអាចបំភ្លេចបាន។ គ្រប់គ្នារំពឹងយ៉ាងមុតមាំថា កម្មវិធីនេះនេះនឹងបន្តស្ថិតស្ថេរជារៀងរាល់ឆ្នាំ ក្រុមហ៊ុនវីតាល់នឹង គាំទ្រយ៉ាងពេញទំហឹងបន្ថែមទៀត ដើម្បីក្តីរំភើបប្រជាពលរដ្ឋ និងកុមារកម្ពុជាទូទាំងប្រទេស៕
