(ភ្នំពេញ)៖ នៅព្រឹកថ្ងៃទី២៣ ខែឧសភា ឆ្នាំ២០១៩ ស្អែកនេះ ឧត្តមក្រុមប្រឹក្សាពិគ្រោះ និងផ្តល់យោបល់ នឹងស្តាប់ការធ្វើបទបង្ហាញរបស់ ក្រសួងរ៉ែ និងថាមពល និងអគ្គិសនីកម្ពុជា ពាក់ព័ន្ធនឹងបញ្ហាមួយចំនួន ក្នុងការបំពេញការងាររបស់អង្គភាពទាំងពីរ។ បទបង្ហាញនេះ នឹងធ្វើឡើងនៅទីស្តីការគណៈរដ្ឋមន្រ្តី។

លោក ស៊ុយ សែម រដ្ឋមន្ត្រីក្រសួងរ៉ែ នឹងថាមពល និង លោក កែវ រតនៈ ប្រតិភូអមនាយករដ្ឋមន្ត្រី ទទួលបន្ទុកអគ្គិសនីកម្ពុជា នឹងដឹកនាំមន្រ្តីជំនាញរបស់ខ្លួន ចូលបំភ្លឺជូនឧត្តមក្រុមប្រឹក្សាពិគ្រោះ និងផ្តល់យោបល់។

បើតាមលោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកក្រុមប្រឹក្សាពិគ្រោះ និងផ្តល់យោបល់ បានបញ្ជាក់ប្រាប់បណ្តាញព័ត៌មាន Fresh News នៅថ្ងៃទី២២ ខែឧសភា ឆ្នាំ២០១៩នេះថា លោកនឹងលើកយកប្រធានបទចំនួន៣ ដើម្បីជជែកជាមួយ លោក ស៊ុយ សែម និងលោក កែវ រតនៈ ក្នុងនោះរួមមាន ទី១៖ ករណីលក់ភ្នំ, ទី២៖ ករណីលក់ខ្សាច់ និងក្រុមហ៊ុនទ្រីភាព និងទី៣៖ ករណីដីរបស់ក្រសួងពាក់ព័ន្ធ និងដីប្រជាពលរដ្ឋផងដែរ។

បើតាម លោក ឈឹម ផលវរុណ អគ្គលេខាធិការ នៃឧត្តមក្រុមប្រឹក្សាពិគ្រោះ និងផ្តល់យោបល់ បានឱ្យដឹងថា សម្រាប់សមាសភាពដែលនឹងចូលរួមក្នុងកិច្ចពិភាក្សា នៅថ្ងៃស្អែកនេះ នឹងមានចំនួន៤៩រូប ដែលមកពីក្រសួងរ៉ែ និងថាមពល និងអគ្គសនីកម្ពុជា៕