(កែប)៖ ពិធីសម្ភោធឆ្លងព្រះពុទ្ធរូបទ្រង់បិណ្ឌបាត្រចំនួន ១៥៧អង្គ និងព្រះពុទ្ធបដិមាប្រទានអភ័យកម្ពស់ជាង ៦ម៉ែត្រ រួមទាំងសមិទ្ធិផលនានា រាប់បាត្រព្រះសង្ឃ ១០០អង្គ ក្នុងវត្តសត្ថាធម្មវិហារ ស្ថិតក្នុងភូមិ ភ្នំលាវ ឃុំពងទឹក ស្រុកដំណាក់ចង្អើ ខេត្តកែប បានធ្វើឡើងក្រោមអធិបតីភាពលោក កែន សត្ថា អភិបាលខេត្តកែប រួមនឹងមន្រ្ដីសង្ឃគណៈកម្មការអាចារ្យ មន្រ្ដីរាជការ កងកម្លាំងប្រដាប់អាវុធ ប្រជាពលរដ្ឋ និងពុទ្ធបរិស័ទក្នុងឱកាសថ្ងៃប្រារព្ធវិសាខបូជា។
បន្ទាប់ពិធីកាត់ខ្សែបូរសម្ពោធឆ្លងសមទ្ធិផលនានាក្នុងវត្ត លោក កែន សត្ថា និងព្រះគ្រូមហាបុទុម ផាត់ធួក ព្រះចៅអធិការវត្ត បានរៀបចំពិធីបញ្ចុះបឋមសិលាសាងសង់ព្រះពុទ្ធរូប ប្រក់នាគអង្គធំ កម្ពស់១២ម៉ែត្រ និងក្លោងទ្វារវត្ត។
ព្រះគ្រូមហាបុទុម ផាត់ធួក ព្រះចៅអធិការវត្តសត្ថាធម្មវិហារមានថេរៈដិកាឱ្យដឹងថា វត្តនេះកើតតាំងពីខែមករា ឆ្នាំ២០១៧ ដែលមានផ្ទៃដីទំហំ ២ហិកតាកន្លះ នៅលើភ្នំពោន។
បច្ចុប្បន្នវត្តសត្ថាធម្មវិហារភ្នំពោន ទទួលបានសមទ្ធិផលកុដិចំនួន ៣ខ្នង បន្ទប់អនាម័យ កាំជណ្ដើរឡើងភ្នំ ព្រះពុទ្ធបដិមាបិណ្ឌបាត្រ ១៥៧អង្គ មានពុទ្ធស្ថានដូចជា៖ កន្លែងព្រះពុទ្ធប្រោសបញ្ចាង្គី ព្រះពុទ្ធទ្រង់ត្រាស់ដឹង និងព្រះពុទ្ធបដិមាកម្ពស់សរុបជាង ៦ម៉ែត្រ និងកំពុងបានសាងសង់សាលាឆាន់ ដែលមានបណ្ដោយ ៣០ គុណ ១២ម៉ែត្រ បាន២០% ហើយ ក្នុងនោះ អភិបាលខេត្ត មន្រ្តីរាជកាទូទាំងខេត្ត និងពុទ្ធបរិស័ទ ចាប់ផ្ដើមកសាងព្រះពុទ្ធរូបប្រក់នាគ ដែលមានកម្ពស់រហូតដល់ជាង ១៥ម៉ែត្រ។
ក្នុងឱកាសនោះ លោក កែន សត្ថា បានថ្លែងថា ការបង្កើតវត្តនៅលើភ្នំពោននេះឡើង គោលបំណងចង់ឱ្យប្រជាពលរដ្ឋពុទ្ធបរិស័ទជិតឆ្ងាយ បានធ្វើបុណ្យធ្វើទាន ជាពិសេសកូនចៅ និងបានទទួលចំណេះដឹងផ្នែកទស្សនៈព្រះពុទ្ធសាសនាផងដែរ។
លោកអភិបាលខេត្តបានបន្ថែមថា ទិសដៅទៅអនាគតវត្តសត្ថាភ្នំពោន ស្ថិតក្នុងភូមិ ភ្នំលាវ ឃុំពងទឹក ស្រុកដំណាក់ចង្អើ និងប្រែក្លាយទៅជាវត្តរមណីយដ្ឋានពុទ្ធសាសនា ដែលជាកន្លែងទាក់ទាញភ្ញៀវទេសចរណ៍ជាតិ និងអន្ដរជាតិមកថ្វាយបង្គំព្រះពុទ្ធរូបអង្គធំៗ ជាមួយការថតរូបកំសាន្ដលើកំពូលភ្នំដើម្បីផ្ដិតយករូបភាព សមុទ្រជុំវិញខៀវស្រងឹត ព្រោះទីតាំងនេះ ស្ថិតក្នុងភូមិសសាស្ដ្រអំណោយផលល្អ ដូចជា មានព្រៃព្រឹក្សា មានដើមកោងកាងដែលមានជីវៈចម្រុះផ្ដល់នៅផលប្រយោជន៍ប្រព័ន្ធអេកូឡូស៊ី មានឆ្នេរខ្សាច់យ៉ាងល្អស្អាត និងអាកាសធាតុល្អបរិសុទ្ធ៕
