(សៀមរាប)៖ សមាគមជំងឺហេម៉ូហ្វីលាកម្ពុជា (ជំងឺឈាមកម្រកក) នៅថ្ងៃទី១២ ខែឧសភា ឆ្នាំ២០១៩នេះ បានផ្សព្វផ្សាយចំណេះដឹង ស្តីពីជំងឺឈាមកម្រកក ក្នុងពិធីបើកទិវាជំងឺហេម៉ូហ្វីលាពិភពលោក និងសិក្ខាសាលាស្តីពីការព្យាបាល ដោយចលនាសម្រាប់អ្នកជំងឺហេម៉ូហ្វីលា ក្នុងខេត្តសៀមរាប។

សិក្ខាសាលានេះ ត្រូវបានរៀបចំឡើងក្នុងគោលបំណង៣ រួមមាន៖ ១៖ ដើម្បីចូលរួមអបអរសាទរ ទិវាហេម៉ូហ្វីលាពិភពលោក ក្នុងការស្វែងរកការគាំទ្រ ដល់សាធារណជនសម្រាប់ស្វែងយល់ដឹង និងគាំទ្របន្ថែមលើជំងឺហេម៉ូហ្វីលានេះ, ២៖ ដើម្បីបង្រៀន គ្រួសារ សាច់ញាតិ និងអ្នកជំងឺស្តីពីការព្យាបាលដោយចលនាសម្រាប់អ្នក ជំងឺហេម៉ូហ្វីលា, ៣៖ ពង្រឹងទំនាក់ទំនង រវាងមន្ទីរពេទ្យកុមារជាតិ មន្ទីរពេទ្យកុមារអង្គរ សមាគមអ្នកព្យាបាលដោយចលនាកម្ពុជា និងសមាគមជំងឺហេម៉ូហ្វីលាកម្ពុជា។

ក្នុងឱកាសនោះ លោក សែម សុខបញ្ញា ប្រធានសមាគមជំងឺហេម៉ូហ្វីលាកម្ពុជា បានសំណូមពរដល់សមាជិក ក្រុមគ្រួសារ និងអ្នកជំងឺ ឲ្យមានការចូលរួមជាមួយសកម្មភាពនានារបស់សមាគម ដើម្បីឱ្យសមាគមមាននិរន្តរភាព និងការគាំទ្រពីសាធារណជនកាន់តែខ្លាំងក្លាជាងមុន។

លោកបានបញ្ជាក់បន្ថែមថា សមាគមបានសហការជាមួយមន្ទីរពេទ្យកុមារជាតិ មន្ទីរពេទ្យកុមារអង្គរខេត្តសៀមរាប បញ្ជូនមន្រ្តីចំនួន៥រូប ទៅពង្រឹងសមត្ថភាពលើជំងឺឈាមកម្រកកនៅទីក្រុងឡុងដ៍ ចក្រភពអង់គ្លេសនាពេលកន្លងនេះ ក្រោមការឧបត្ថម្ភពីមូលនិធិហេម៉ូហ្វីលានូវ៉ូណ័រឌីស (NNHF)។ សិក្ខាសាលាថ្ងៃនេះ គឺជាប្រធានបទមួយ ក្នុងចំណោមជំនាញ ដែលបុគ្គលិកនៃមន្ទីរពេទ្យទាំងពីរយកមកចែករំលែក និងបង្រៀនដល់ក្រុមគ្រួសារ និងអ្នកជំងឺ ដើម្បីបង្ការពិការភាពទៅលើគាំងសន្លាក់ សាច់ដុំ និងអរយវៈសម្រាប់អ្នកជំងឺដ៏កម្រនេះ។

ជាមួយគ្នានេះ លោក ផេង វ៉ាន់ អ្នកព្យាបាលដោយចលនានៃមន្ទីរពេទ្យកុមារជាតិ បានលើកឡើងថា ការព្យាបាលដោយចលនា មានសារសំខាន់សម្រាប់ជួយដល់អ្នកជំងឺឈាមកម្រកក ឱ្យគាត់ចៀសផុតពីពិការភាព ដូច្នេះជាការសំណូមពរដល់ក្រុមគ្រួសារ និងអ្នកជំងឺ ការយល់ដឹងពីការព្យាបាលដោយចលនា គឺកាត់បន្ថយពីភាពពិការ។

លោក ស្រេង ស៊ុង ប្រធានអ្នកគាំទ្រជំងឺហេម៉ូហ្វីលាកម្ពុជានៃមន្ទីរពេទ្យកុមារអង្គរ បានលើកឡើងពីវឌ្ឍនភាពក្នុងការជួយដល់អ្នកជំងឺថា បច្ចុប្បន្នភាពនៅតំបន់សៀមរាបនេះ មានអ្នកជំងឺចំនួន ១០៨នាក់ ហើយមន្ទីរពេទ្យកុមារអង្គរ បានសម្រេចនឹងទទួលព្យាបាលអ្នកជំងឺពេញវ័យ តែមិនអនុញ្ញាតឱ្យអ្នកជំងឺពេញវ័យនេះសម្រាក និងស្នាក់នៅក្នុងមន្ទីរពេទ្យទេ។

គួរបញ្ជាក់ផងដែរថា ជំងឺហេម៉ូហ្វីលា ឬជំងឺឈាមកម្រកក ជាជំងឺដែលមានតាំងពីកំណើត និងតំណរពូជ ដែលកើតមកពីឪពុកម្តាយជាពិសេសគឺម្តាយ ជាអ្នកផ្ទុកជំងឺនេះមកឲ្យកូន ហើយភាគច្រើនទៅលើកូនប្រុស រីឯកូនស្រីជាអ្នកផ្ទុកជំងឺឆ្លងបន្តទៅទៀត។ ជំងឺនេះធ្វើអ្នកជំងឺហើម ជាំ ទៅលើសារពាង្គកាយ ឬបង្កឲ្យមានការហូរឈាមទៅតាមសន្លាក់ ហើយឈឺចាប់ខ្លាំងបំផុតពេល ដែលប៉ះពាល់ទង្គិចលើសរីរាង្គអ្នកជំងឺ និងធ្ងន់ធ្ងរបំផុតគឺការហូរឈាមនៅខួរក្បាល ម្យ៉ាងវិញទៀតគឺអាចក្លាយឲ្យមានពិការភាព និងបាត់បង់ជីវិតយ៉ាងឆាប់រហ័ស។

ជំងឺហេម៉ូហ្វីលានេះ គឺជាជំងឺម្យ៉ាងដែលអាចបណ្តាលឲ្យហូរឈាម។ អ្នកជំងឺហេម៉ូហ្វីលា មិនមានការហូរឈាមលឿនជាងធម្មតានោះទេ ប៉ុន្តែការហូរឈាមនេះ មានរយៈពេលយូរជាងធម្មតា ដោយសារតែឈាម ដែលមានជំងឺហេម៉ូហ្វីលា មិនមានសារធាតុ កត្តាឈាមកកគ្រប់គ្រាន់ (Clotting Factor)។ កត្តាឈាមកក គឺជាប្រូតេអ៊ីនម្យ៉ាងនៅក្នុងឈាម ដែលអាចត្រួតពិនិត្យទៅលើការហូរឈាម។ កត្តាឈាមកកទាំងនេះ មាន១៣កត្តាឈាមកក។

សូមរំលឹកថា ជំងឺហេម៉ូហ្វីលានេះ ត្រូវបានរកឃើញករណីដំបូងនៅឆ្នាំ២០០២ នៅប្រទេសកម្ពុជាក្រោមការជួយផ្នែកបច្ចេកទេសពីលោកស្រី រ៉ូប៊ីន ដេហ្វីននីស (Robyn Devenish) ប្រទេសអូស្រ្តាលី។ នៅក្នុងឆ្នាំនោះ កម្ពុជាពុំមានលទ្ធភាពគ្រប់គ្រាន់ក្នុងការព្យាបាលនៅឡើយ ហើយផលិតដែលប្រើប្រាស់ក្នុងការព្យាបាល គឺឈាមស្រស់។ មកដល់បច្ចុប្បន្ននេះ ការព្យាបាលមានភាពវិវត្តន៍ទៅមុខ ដោយប្រើប្រាស់ឈាមផ្លាសស្មា (Plasma) ក្រាយអូរ (Cryo) និងថ្នាំកត្តាឈាមកក (Factor)។

បើយោងតាមរបាយការណ៍របស់សហព័ន្ធជំងឺហេម៉ូហ្វីលាពិភពលោក ក្នុងចំណោមមនុស្ស១០,០០០មាន តែមួយម្នាក់ទេដែលកើតមកមានជំងឺនេះ ដែលមកពីមូលហេតុតំណរពូជ ៧០% និងកើតឡើងដោយឯកឯង៣០% ដូច្នេះនៅលើពិភពលោក មានជំងឺឈាមកម្រកកប្រមាណជា៦,៩លាននាក់ និង៧៥% នៃពួកគេគឺពុំទាន់បានដឹង។

ដោយឡែកនៅប្រទេសកម្ពុជា តាមការប៉ាន់ប្រមាណគឺមាន៣០០០នាក់ ទូទាំងប្រទេសកម្ពុជា ប៉ុន្តែអ្នកជំងឺមានចំនួនប្រមាណត្រឹម ១០០នាក់ ដែលទទួលការព្យាបាល និងធ្វើរោគវិនិច្ឆ័យ ហើយកន្លែងដែលអាចព្យាបាលជំងឺនេះ គឺនៅមន្ទីរពេទ្យកុមារជាតិ នៅរាជធានីភ្នំពេញ និងមន្ទីរពេទ្យកុមារអង្គរខេត្តសៀមរាប ជាមួយនឹងវេជ្ជបណ្ឌិតតែពីររូបប៉ុណ្ណោះ៕