(បាត់ដំបង)៖ លោកបណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា អញ្ជើញប្រកាសតែងតាំងលោក យី សុងគី ជាប្រធានន្ទីរអប់រំ យុវជន និងកីឡាថ្មីនៅខេត្តបាត់ដំបង ជំនួសលោក ងី សែត ដែលត្រូវចូលនិវត្តន៍។

ពិធីប្រកាសតែងតាំងនេះ បានធ្វើឡើងនៅថ្ងៃទី១០ ខែឧសភា ឆ្នាំ២០១៩នេះ នៅសាលប្រជុំសាលាខេត្តបាត់ដំបង ដោយមានការចូលរួមពីលោក សឿម ប៊ុនរិទ្ធ អភិបាលរងខេត្ត លោក អ៊ុត រី ប្រធានក្រុមប្រឹក្សាខេត្ត តំណាងមន្ទីរអប់រំ ខេត្តប៉ៃលិន ខេត្តបន្ទាយមានជ័យ ខេត្តពោធិ៍សាត់ អភិបាលក្រុងស្រុក ប្រធានមន្ទីរ អង្គភាព នាយក នាយករងអនុវិទ្យាល័យ វិទ្យាល័យ លោកគ្រូ អ្នកគ្រូ មន្រ្តីរាជការនានាជុំវិញខេត្ត ផងដែរ។

លោក ងី សែត ប្រធានមន្ទីរអប់រំចាស់ បានថ្លែងថា វិស័យអប់រំនៅខេត្តបាត់ដំបង មានការរីកចម្រើនខ្លាំងនាពេលបច្ចុប្បន្ន និងមតិប្តេជ្ញាចិត្តរបស់លោក យី សុងគី ប្រធានមន្ទីរអប់រំ យុវជន និងកីឡាខេត្ត ទើបចូលកាន់តំណែងថ្មី ព្រមទាំងមានការប្រគល់ប្រកាសតែងតាំង និងប្រគល់ត្រាដោយលោកបណ្ឌិតសភាចារ្យរដ្ឋមន្រ្តី ហង្ស ជួនណារ៉ុន ផងដែរ។

នាឱកាសនោះដែរ លោក សឿម ប៊ុនរិទ្ធ បានថ្លែងអំណរគុណដល់លោកប្រធានមន្ទីរចាស់ ដែលមានស្នាដៃ បំពេញភារកិច្ចលើការងារអប់រំ បានល្អប្រសើ និងបានបន្សល់ស្នាដៃជាច្រើន ទុកជូនអ្នកជំនាន់ក្រោយបន្តវេណអនុវត្តការងារបន្ត និងសម្តែងអបអរសាទរដល់លោកប្រធានមន្ទីរថ្មី ដែលត្រូវអនុវត្តការងារបន្តវេណទៅថ្ងៃមុខប្រកបដោយប្រសិទ្ធភាពខ្ពស់។

លោកបណ្ឌិតសភាចារ្យ ហង់ ជួនណារ៉ុន បានថ្លែងអំណរគុណដល់លោកប្រធាមន្ទីរចាស់ ដែលបានខិតខំបម្រើការងារជូនជាតិ ក្នុងវិស័យអប់រំអស់រយៈពេល ៣០ឆ្នាំកន្លងមក ហើយត្រូវបានចូលនិវត្តន៍នាពេលនេះ និងត្រូវបានតែងតាំងជាទីប្រឹក្សាក្រសួងអប់រំ យុវជន និងកីឡា បច្ចុប្បន្នផង ព្រមទាំងមានមតិផ្តាំផ្ញើដល់ប្រធានមន្ទីរថ្មីដែលទើបតែងតាំង ត្រូវមានសាមគ្គីភាពផ្ទៃក្នុងល្អ ចេះសហការជាមួយស្ថាប័នពាក់ព័ន្ធ និងដៃគូរ ត្រូវបំពេញការងារបន្តវេណ ក្នុងខណៈស្ថិតក្នុងការកំណែទម្រង់ជាយុទ្ធសាស្រ្តចតុកោណ របស់រាជរដ្ឋាភិបាលដំណាក់កាលទី៤នេះ ឱ្យបានល្អប្រើសើរ និងប្រសិទ្ធភាពធ្វើការងារនេះបន្តទៀតផងដែរ។

លោករដ្ឋមន្រ្តីបានបញ្ជាក់ថា «ក្នុងនាមយើងជាមន្ទីរជំនាញលើវិស័យអប់រំ ត្រូវពង្រឹងដល់គណៈកម្មការគ្រប់គ្រង នៅតាមសាលារៀននានា លោកគ្រូ អ្នកគ្រូ គ្រប់គ្រងសិស្សគ្រប់កម្រិត ជំរុញឱ្យសិស្សមករៀនឱ្យបានទៀងទាត់ ដើម្បីឱ្យសិស្សយើងទទួលបានចំណេះដឹងបានរៀនរហូតដល់ចប់ថ្នាក់មធ្យមសិក្សា ដើម្បីឱ្យសិស្សមានឱកាសបន្តការសិក្សារបស់ខ្លួនទៅតាមជំនាញផ្សេងៗ ទៀតនៅសាកលវិទ្យាល័យ»។

លោកបានបន្តថា កម្រិតមតេយ្យសិក្សាក៏យើងមានគោលការណ៍ពង្រឹងសមត្ថភាពសិស្សពីកម្រិតទាប និងពង្រីកសាលានៅតាមជនបទ ឱ្យបានច្រើននាពេលខាងមុខឆាប់ៗនេះបន្ថែមទៀត ដើម្បីបម្រើសេចក្តីត្រូវការសិស្សទាំងនៅទីក្រុង និងជនបទដាច់ស្រយាល។

លោកបានបន្ថែមថា ក្នុងនាមមន្ទីរអប់រំ និងបុគ្គលិកអប់រំទាំងអស់ ត្រូវសហការជាមួយអាជ្ញាធរ និងសមត្ថកិច្ចមូលដ្ឋាន ពិនិត្យមើលនៅតាមក្លឹបកម្សាន្តនានា កន្លែងលេងហ្គេមប្រើប្រាស់គ្រឿងញៀន ត្រូវទប់ស្កាត់ឱ្យបាន ដើម្បីបញ្ជៀសកុំឱ្យសិស្សញៀនចូលលេង និងប្រើប្រាស់មិនចូលរៀន ហើយត្រូវអប់រំសិស្សឱ្យនាំគ្នាគោរពច្បាប់ចរាចរណ៍ផងដែរ។

នេះជាហេតុផលមួយល្អដល់ការពង្រីក និងបង្កើនធនធានបនុស្សពីស្រទាប់ក្រោមពីថ្នាក់ទាបឡើងទៅជាការសំខាន់បំផុត ព្រោះយុវជនជំនាន់ក្រោយ ជាទំពាំងស្នងឬស្សី បន្តវេណកសាង និងអភិវឌ្ឍន៍ប្រទេសជាតិនាពេលអនាគតផងដែរ។ បន្ទាប់មកលោករដ្ឋមន្រ្តីបានបំពាក់គ្រឿងឥស្សរយស ដល់លោកប្រធានមន្ទីរចាស់ផងដែរ៕