​(ភ្នំពេញ)៖ «TADA» ដែលបានបើកដំណើរការ លើកដំបូងនៅសិង្ហបុរី និងមានដើមកំណើត ចេញមកពីប្រទេសសិង្ហបុរី ត្រូវបានបើក​ដំណើរការជាផ្លូវការនៅកម្ពុជា ដោយមានការចូលរួម ជាកិតិ្តយសពីឯកអគ្គរដ្ឋទូតស្ដីទី សាធារណៈរដ្ឋកូរ៉េ នៅរសៀលថ្ងៃទី០៨ ខែឧសភា ឆ្នាំ២០១៩នេះ។ ​ជាមួយគ្នានេះ នាយកប្រតិបត្តិគ្រប់គ្រង ក្រុមហ៊ុន Pi Pay ក្រុមហ៊ុន Alipay ធនាគារ Shinhan និងក្រុមហ៊ុន TVS ក៏មានវត្តមាន នៅក្នុងពិធីចុះហត្ថលេខាលើអនុស្សារណៈយោគយល់គ្នា ​នេះជាដៃគូយុទ្ធសាស្ត្ររបស់ TADA ។ ក្នុងនោះដែរ ក៏មានតំណាងមកពីសភាពាណិជ្ជកម្ម​ កម្ពុជា (CCC) និងដៃគូអ្នកបើករបស់ក្រុមហ៊ុន TADA ចូលរួមអបអរជាកិត្តិយស ក្នុងកម្មវិធីដ៏សំខាន់នេះផងដែរ។

លោក ខេ វូ (Kay Woo) ជាស្ថាបនិក និងជានាយកប្រតិបត្តិរបស់ TADA និង MVL បានថ្លែងថា​ «យើងមានសេចក្តីសោមនស្សរីករាយ ដែលមានដៃគូ និងអ្នកបើកបរដ៏អស្ចារ្យ ដែលគាំទ្រកម្មវិធីកក់ការធ្វើដំណើរ TADA ។ គោលបំណងរបស់យើង​ គឺលើកកម្ពស់ជីវភាពរស់នៅ អ្នកបើកបរឲ្យកាន់តែប្រសើរផ្តល់បទពិសោធន៍ ល្អសម្រាប់អ្នកដំណើរ ក៏ដូចជាការផ្តល់នូវកម្មវិធីកក់ការធ្វើដំណើរ ដែលអាចជឿទុកចិត្តបានប្រកបដោយ ភាពច្នៃប្រឌិតថ្មីសម្រាប់អ្នកប្រើប្រាស់»។

លោក ខេ វូ ​បន្តទៀតថា​ «យើងសូមលើកទឹកចិត្តដល់អ្នកបើកបរទាំងអស់ ដើម្បីទាញយកការចុះឈ្មោះ និងក្លាយជាអ្នកបើកបរជាមួយ TADA ដោយអាចរកប្រាក់ចំណូលបាន១០០ភាគរយ រាល់ការដឹកអ្នក​ដំណើរ។ រាល់ការផ្តល់ជូនពីក្រុមហ៊ុន អ្នកបើកបរអាចទទួលបានទំាងចំណូលល្អប្រសើរ ព្រមទំាងធានាជូនត្រលប់មកវិញ នូវសេវាកម្មដ៏ល្អសម្រាប់អ្នកធ្វើដំណើរ តាមកម្មវិធី TADA»។

លោកបន្ថែមទៀតថា​ «យោងតាមបទពិសោធន៍ជោគជ័យ ពីអ្នកបើកបរនៅប្រទេសសិង្ហបុរី និង​វៀតណាម យើងជឿជាក់ថា នេះជាឱកាសល្អសម្រាប់អ្នកបើកបរនៅកម្ពុជា ក្នុងការចាប់យកអាជីវកម្មជាមួយ TADA។ ពួកយើងមិនមែនជាគូប្រជែងរបស់អាជីវកម្ម​ ដែលមានស្រាប់​នោះទេ តែផ្ទុយទៅវិញ យើងគ្រាន់តែចង់ផ្តល់បន្ថែម​នូវជម្រើសបច្ចេកវិទ្យាថ្មីមួយទៀត សម្រាប់អ្នកបើកបរ និងអ្នកធ្វើដំណើរ»។

លោក Tomas Pokorny នាយកប្រតិបត្តិនៃក្រុមហ៊ុន Pi Pay បានថ្លែងថា​ «ការសហការជាមួយក្រុមហ៊ុនកក់ការធ្វើដំណើរ TADA គឺជាជំហានថ្មីមួយទៀត ស្របពេលដែលមានការលើកទឹកចិត្ត ប្រជាជនកម្ពុជាឲ្យប្រើប្រាស់ សេវាទូទាត់ការធ្វើដំណើរ ដោយមិនប្រើសាច់ប្រាក់កាន់តែច្រើនឡើងៗ នៅក្នុងសម័យឌីជីថលនេះ»។

សូមបញ្ជាក់ថា TADA គឺជាកម្មវិធីកក់ការធ្វើដំណើរថ្មីមួយ ដែលត្រូវបានបង្កើតឡើងដោយក្រុមហ៊ុន MVL Foundation ដោយសន្យាថា នឹងមិនគិតថ្លៃកម្រៃជើងសារពីអ្នកបើកបរ និងផ្តល់នូវប្រូម៉ូសិន​ ពិសេសៗដ៏គួរឲ្យទាក់ទាញ សម្រាប់អ្នកកក់ការធ្វើដំណើរ។ លក្ខណៈពិសេសថ្មីរបស់កម្មវិធីកក់ការធ្វើដំណើរនេះ គឺមុខងារកំណត់ការធ្វើដំណើរ គិតជាគីឡូម៉ែត (TADA APP Meter) និងការហៅជិះតាមផ្លូវ (Seamless Street-hailing) ដែលផ្តល់ភាពងាយស្រួល ដល់អ្នកប្រើប្រាស់ក្នុងការទូទាត់ ថ្លៃធ្វើដំណើរជាមួយនឹងក្រុមហ៊ុន Pi Pay និង Alipay ប្រកបដោយភាពជឿជាក់។

ជាមួយគ្នានេះ ដើម្បីអបអរពិធីសម្ពោធជាផ្លូវការ និងចុះហត្ថលេខាលើអនុស្សារណៈយោគយល់គ្នា ជាដៃគូនៅថ្ងៃនេះ ក្រុមហ៊ុនTADA នឹងប្រកាសពីកម្មវិធីធ្វើដំណើរ ដោយឥតគិតថ្លៃចំនួន១ថ្ងៃ (Free Rides Day) នៅថ្ងៃទី ១០ខែឧសភា ចាប់ពីម៉ោង ៦ព្រឹកដល់ម៉ោង ១១៖៥៩នាទីយប់ (កំណត់ត្រឹម ១២ ០០០រៀល ចំពោះអ្នកជិះដំបូង ២,០០០នាក់) ដោយប្រើលេខកូដប្រូម៉ូសិន​TADANOW។ ក្រុមហ៊ុន TADA ក៏មានថវិកាលើកទឹកចិត្ត សម្រាប់អ្នកបើកបរក្នុងការចាប់ផ្តើម ​អាជីវកម្មដំបូង ក៏ដូចជាអរគុណ​ដល់អ្នកបើកបររបស់ TADA ដែលបានសាកល្បងអាជីវកម្មនេះកន្លងមក៕