(កណ្ដាល)៖ លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃសុក្រ ១៤រោច ខែចេត្រ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី០៣ ខែឧសភា ឆ្នាំ២០១៩ បានអញ្ជើញទៅពិនិត្យ វិទ្យាស្ថានជាតិស្រាវជ្រាវ និងអភិវឌ្ឍន៍វារីវប្បកម្ម សម្តេចតេជោ ហ៊ុន សែន នៅភូមិព្រែកឡុង ឃុំរកាខ្ពស់ ស្រុកស្អាង ខេត្តកណ្តាល។
នាឱកាសនេះ លោកប្រធានវិទ្យាស្ថាន បានជម្រាបជូនលោកជ្រាបថា វិទ្យាស្ថានបានបង្កើតឡើងនៅឆ្នាំ២០១៣ លើផ្ទៃដី ៣០ហិកតា ដោយចែកជាអគាររដ្ឋបាល ស្រះចិញ្ចឹម ស្រះមេពូជ អាងស្តុកទឹក អគារភ្ញាស់ អគារស្នាក់នៅ និងមន្ទីរពិ សោធន៍។ វិទ្យាស្ថានមានកាតព្វកិច្ច ៣សំខាន់ គឺទី១៖ បន្សុត បង្កាត់ពូជ និងអភិរក្សពូជត្រីដែលជិតផុតពូជ ទី២៖ សិក្សាស្រាវជ្រាវពូជ និងផ្សព្វផ្សាយ និងទី៣៖ បណ្តុះបណ្តាលបច្ចេកទេស ដល់ប្រជាកសិករ មន្រ្តី និងនិស្សិត។
ប្រធានវិទ្យាស្ថាន រូបនេះ បានបន្ថែមទៀតថា បច្ចប្បន្នកំពុងធ្វើការសិក្សាស្រាវជ្រាវ បង្កាត់ពូជត្រីដោយចែកចេញជាត្រីផលិតកម្ម មានដូចជាត្រីព្រលូង កាប ឆ្ពិន កន្ធរ កាហែ កាបស កាបក្បាលធំ ទីឡាព្យា និងប្រភេទត្រីស្រាវជ្រាវ មានដូចជាត្រីគ្រំ ក្រាយ ត្រចៀកដំរី និងត្រីខ្យា។
បន្ទាប់ពីបានចុះពិនិត្យវិទ្យាស្ថានរួច លោករដ្ឋមន្រ្តី បានកោតសរសើរ និងវាយតម្លៃខ្ពស់ ចំពោះថ្នាក់ដឹកនាំ និងមន្រ្តីដែលបានខិតខំប្រឹងប្រែង តស៊ូក្នុងស្មារតីទទួលខុសត្រូវ យកចិត្តទុកដាក់សិក្សាស្រាវជ្រាវ និងអភិវឌ្ឍន៍វិទ្យាស្ថាន ឲ្យមានការរីកចម្រើនដែលសាកសមទៅនឹងឈ្មោះថា វិទ្យាស្ថានជាតិស្រាវជ្រាវ និងអភិវឌ្ឍន៍វារីវប្បកម្មសម្តេចតេជោ ហ៊ុន សែន ពិតប្រាកដ។
ជាមួយគ្នានោះ លោករដ្ឋមន្ដ្រី ក៏បានណែនាំ ដល់ថ្នាក់ដឹកនាំ និងមន្រ្តីវិទ្យាស្ថាន លោកសុំឲ្យវិទ្យាស្ថានគិតគូពីការធ្វើពាណិជ្ជកម្ម គឺមានន័យថាបង្កាត់ពូជ ចិញ្ចឹម និងធ្វើអាជីវកម្ម ដើម្បីបង្កើតប្រភពចំណូល យកមកបំពេញបន្ថែម នូវតម្រូវការរបស់វិទ្យាស្ថាន ធ្វើយ៉ាងណាឲ្យវិទ្យាស្ថានមានការវិវឌ្ឍន៍ដោយចិរភាព និងនិរន្តរភាព ជាពិសេសលើកកម្ពស់កំរិតជីវភាព របស់មន្រ្តីវិទ្យាស្ថានឲ្យបានល្អប្រសើរ។
លោកថា គួរស្វែងរកដៃគូជាមួយក្រុមហ៊ុនឯកជន ឬកសិដ្ឋានចិញ្ចឹមត្រី ដើម្បីសហការធ្វើជាអ្នកផ្គត់ផ្គង់កូនត្រីក៏ជាការល្អ។ ត្រូវលើកកម្ពស់សមត្ថភាពមន្ទីរពិសោធន៍ និងបង្កើនការងារស្រាវជ្រាវ និងអភិរក្សបន្ថែមទៀត ជាពិសេសប្រភេទត្រីដែលជិតផុតពូជ និងរួមគ្នាថែរក្សាវិទ្យាស្ថានទាំងមូល ឲ្យបានគង់វង្ស ទុកជាប្រយោជន៍សម្រាប់បម្រើការងារស្រាវជ្រាវវិស័យជលផល និងជាសម្បត្តិរដ្ឋដ៏មានតម្លៃ ទាំងពេលបច្ចុប្បន្ន និងអនាគត។
លោករដ្ឋមន្ដ្រី វេង សាខុន បានបន្ថែមទៀតថា ត្រូវខិតខំស្វែងរកដៃគូមកជួយទាំងថវិកា និងការងារបច្ចេកទេសចិញ្ចឹម និងបង្កាត់ពូជ ដើម្បីបង្កើនកម្រិតបច្ចេកទេសស្រាវជ្រាវ ឲ្យបានសមស្របតាមស្តង់ដារក្នុងតំបន់ ក៏ដូចជាក្នុងពិភពលោក ឈានទៅធ្វើការចិញ្ចឹម ការកែច្នៃ និងនាំចេញផលិតផលត្រីកម្ពុជា ទៅកាន់ទីផ្សារអន្តរជាតិនាពេលអនាគត៕
