(ព្រះវិហារ)៖ ក្រសួងទេសចរណ៍ បានសហការជាមួយអង្គការស្វីសខន់ថាក់ រៀបចំពិធីប្រគល់វិញ្ញាបនបត្រដល់សិក្ខាកាមជ័យលាភីចំនួន ៦៥នាក់ ដែលបានបញ្ចប់វគ្គបណ្តុះបណ្តាលកម្មវិធីបង្ហាត់ជំនាញបដិសណ្ឋារកិច្ចនៃសេវាកម្មសណ្ឋាគារ អមដោយពិធីបើកវគ្គបណ្តុះបណ្តាលបង្ហាត់ជំនាញបដិសណ្ឋារកិច្ចនៃសេវាកម្មសណ្ឋាគារ ជំនាន់ទី២ ក្រោមអធិបតីភាពរបស់ លោក ប៉ាក់ សុខុម រដ្ឋលេខាធិការក្រសួងទេសចរណ៍។

កម្មវិធីបង្ហាត់ជំនាញបដិសណ្ឋារកិច្ចនេះ រៀបចំឡើងនារសៀលថ្ងៃទី០២ ខែឧសភា ឆ្នាំ២០១៩ ក្នុងគោលបំណងពង្រឹងសមត្ថភាពអ្នកជំនាញទេសចរណ៍ និងគុណភាពសេវាកម្មទេសចរណ៍ ឲ្យកាន់តែមានប្រសើរឡើង ស្របតាមផែនការយុទ្ធសាស្ត្រអភិវឌ្ឍធនធានមនុស្សក្នុងវិស័យទេសចរណ៍ ឆ្នាំ២០១៧-២០២៥។

វគ្គបណ្តុះបណ្តាលនេះ មានគ្រូជំនាញចុះបង្ហាត់បង្រៀន ទាំងទ្រឹស្តី និងអនុវត្តផ្ទាល់ដោយប្រើប្រាស់ប្រអប់បណ្តុះបណ្តាលអាស៊ាន (MRA) ដល់ម្ចាស់មូលដ្ឋានអាជីវកម្ម និងបុគ្គលិកកំពុងបម្រើការងារ លើផ្នែកចំនួន០៥ រួមមាន៖ ១. សេវាកម្មប្រណីត ២. ភាពជាអ្នកមានវិជ្ជាជីវៈក្នុងវិស័យទេសចរណ៍ ៣. សេវាកម្មម្ហូបអាហារ និងភេសជ្ជៈ ៤. គេហកិច្ច និង ៥. ការិយាល័យជួរមុខ។

វគ្គបណ្តុះបណ្តាលខាងលើ បានប្រព្រឹត្តទៅរយៈពេល៣ខែ នៅតាមមូលដ្ឋានអាជីវកម្ម ភោជនីយដ្ឋាន ផ្ទះសំណាក់ និងសណ្ឋាគារ ស្ថិតក្នុងឃុំស្រអែម ស្រុកជាំក្សាន្ត ខេត្តព្រះវិហារ។

សូមរំលឹកផងដែរថា កាលពីឆ្នាំ២០១៨ កម្ពុជាទទួលបានទេសចរអន្តរជាតិប្រមាណ ៦.២លាននាក់ ក្នុងកំណើន ១០.៧% និងរយៈពេល២ខែ ដើមឆ្នាំ២០១៩នេះ កម្ពុជាទទួលទេសចរអន្តរជាតិជាង ១.២លាននាក់ ក្នុងកំណើន ៩.៣%៕