(ពោធិ៍សាត់)៖ សពពលរដ្ឋខ្មែរម្នាក់ ដែលត្រូវទាហានថៃបាញ់ស្លាប់ ពេលឆ្លងដែនទៅកាប់ឈើគ្រញូង នៅប្រទេសថៃ កាលពីសប្តាហ៍មុននោះ ត្រូវបានកម្លាំងយោធភូមិភាគទី៥ ស្នើសុំភាគីថៃ ដឹកមកកាន់កម្ពុជា នៅថ្ងៃទី០២ ខែឧសភា ឆ្នាំ២០១៩នេះ។ នេះបើតាមការអះអាងរបស់ លោក ចាន់ រដ្ឋា មេបញ្ជាការរងយោធភូមិភាគីទី៥។
សូមបញ្ជាក់ថា ប្រជាពលរដ្ឋខ្មែរ២នាក់ ដែលឆ្លងចូលទឹកដីថៃដោយខុសច្បាប់ ដើម្បីកាប់ឈើគ្រញូង នៅភូមិថានសេង ឃុំឡែមកាត់ ស្រុកមឿង ខេត្តត្រាត ប្រទេសថៃ ត្រូវបានទាហានថៃ បាញ់ស្លាប់ម្នាក់នៅនឹងកន្លែង និងរបួសធ្ងន់ម្នាក់ នៅរសៀល ថ្ងៃទី២៤ ខែមេសា ឆ្នាំ២០១៩។
ជនរងគ្រោះដែលថៃបាញ់ស្លាប់មានឈ្មោះ ម៉ៅ មុំ ភេទប្រុស អាយុ២៦ឆ្នាំ រស់នៅភូមិព្រែកពី ឃុំសំរោង ស្រុកក្រវាញ ខេត្តពោធិ៍សាត់ ត្រូវគ្រាប់កាំភ្លើងត្រង់ចំណុចបោះដៃផុតធ្លុះចូលចុងដង្ហើម។ ចំណែកអ្នករងរបួសធ្ងន់មានឈ្មោះ អាន វិត ភេទប្រុស អាយុ២៤ឆ្នាំ រស់នៅភូមិឃុំជាមួយគ្នា ត្រូវរបួស៣កន្លែងរួមមានត្រង់ប្រអប់ដៃស្តាំ ភ្លៅស្តាំ និងប្រអប់ជើងស្តាំ។ សពជងរងគ្រោះត្រូវបានថៃបញ្ជូនទៅខេត្តច័ន្ទបុរី ដើម្បីធ្វើកោសល្យវិច្ច័យ ចំណែកអ្នករងគ្រោះត្រូវបានបញ្ជូនទៅព្យាបាល នៅមន្ទីរពេទ្យខេត្តត្រាត៕
