(ភ្នំពេញ)៖ ជំងឺហេម៉ូហ្វីលា ឬជំងឺឈាមកម្រកក ជាជំងឺដែលមានតាំងពីកំណើត និងតំណរពូជកើតមកពីឪពុកម្តាយ ជាពិសេសគឺម្តាយតែម្តង ជាអ្នកផ្ទុកជំងឺនេះមកឲ្យកូន ដែលភាគច្រើនទៅលើកូនប្រុស ហើយកូនស្រីជាអ្នកផ្ទុកជំងឺឆ្លងបន្តទៅទៀត។

ជំងឺនេះធ្វើអ្នកជំងឺហើម ជាំ ទៅលើសារពាង្គកាយ ឬបង្កឲ្យមានការហូរឈាមទៅតាមសន្លាក់ ហើយឈឺចាប់ខ្លាំងបំផុតពេលដែលប៉ះពាល់ទង្គិចលើសរីរាង្គអ្នកជំងឺ និងធ្ងន់ធ្ងរបំផុតគឺការហូរឈាម នៅខួរក្បាល។ ម្យ៉ាងវិញទៀត គឺអាចក្លាយឲ្យមានពិការភាព និងបាត់បង់ជីវិតយ៉ាងឆាប់រហ័ស។ នេះជាការលើកឡើងរបស់លោក សែម សុខបញ្ញា ប្រធានសមាគមជំងឺហេម៉ូហ្វីលាកម្ពុជា លើកឡើងនៅក្នុង ទិវាហេម៉ូហ្វីលាពិភពលោក និងសិក្ខាសាលាស្តីពីការព្យាបាលដោយច លនា សម្រាប់អ្នកជំងឺហេម៉ូហ្វីលា រៀបចំធ្វើនៅមន្ទីរពេទ្យកុមារជាតិ នាថ្ងៃទី២៧ ខែមេសា ឆ្នាំ២០១៩។

លោក សែម សុខបញ្ញា បានលើកឡើងថា ទិវាហេម៉ូហ្វីលាពិភពលោក និងសិក្ខាសាលាស្តីពីការព្យាបាលដោយច លនា សម្រាប់អ្នកជំងឺហេម៉ូហ្វីលា រៀបចំឡើងក្រោមការឧបត្ថម្ភគាំទ្រពីមូលនិធិ ណូវ៉ូន័រឌីស ប្រទសស្វីស ក្នុងគោលបំណងនៃនការប ង្កើតទិវានេះឡើង គឺដើម្បីចូលរួមអបអរសាទរ ទិវាហេម៉ូហ្វីលាពិភពលោក ក្នុងការស្វែងរកការគាំទ្រដល់សាធារណជនសម្រាប់ស្វែងយល់ និងគាំទ្របន្ថែម លើជំងឺហេម៉ូហ្វីលា, ដើម្បីបង្រៀនគ្រួសារ និងសាច់ញាតិ និងអ្នកជំងឺស្តីពីការព្យាបាលដោយចលនាសម្រាប់អ្នកជំងឺហេម៉ូហ្វីលា, ពង្រឹងទំនាក់ទំនងរវាងមន្ទីរពេទ្យកុមារជាតិ មន្ទីរពេទ្យកុមារអង្គរ ស មាគមអ្នកព្យាបាលចលនាកម្ពុជា និងសមាគម ហេម៉ូហ្វីលា។

ជាមួយគ្នានោះ លោក សុង សិទ្ធ ប្រធានសមាគមព្យាបាលដោយចលនាកម្ពុជា និងជាតំណាងឲ្យវិជ្ជាជីវៈព្យាបាលដោយចលនា និងគ្រូពេទ្យដោយចលនាទាំងអស់ក្នុងប្រទេសកម្ពុជា បានលើកឡើងថា គិតមកដល់ត្រឹ មចុងខែមេសា ឆ្នាំ២០១៩ គ្រូពេទ្យព្យាបាល ដោយចលនាសរុបទាំងអស់ ៤៧៣នាក់ ដែលបានបញ្ចប់ការសិក្សាក្នុងរយៈពេល៣ឆ្នាំ កម្រិតបរិញ្ញាបត្ររងព្យាបាលដោយចលនា ពីសាកលវិទ្យាល័យ វិទ្យាសាស្រ្តសុខាភិបាល។

លោក សុង សិទ្ធ បានបន្ថែមថា ទិវានេះ ពិតជាមានសារសំខាន់ ដែលបានផ្តល់ឱកាស ដល់បងប្អូន ដែលជាសមាជិក និងក្រុមគ្រួសារ បានជួបជុំគ្នា ព្រមទាំងបានទទួល ចំណេះដឹងថ្មីៗ ក្នុងការថែទាំ ជំងឺរបស់បងប្អូនតាមរយៈ ការធ្វើលំហាត់ព្យាបាលដោយចលនា។ បន្ថែមពីលើនេះ លោក សុង សិទ្ធ បានលើកឡើងថា សមាគមនឹងបន្តកិច្ចសហប្រតិបត្តិការ ជាមួយដៃគូ ក្នុងការទប់ស្កាត់ជំងឺជំងឺហេម៉ូហ្វីលាកម្ពុជា ដើម្បីផ្តល់សេវាចលនាឲ្យមានគុណភាព ប្រសិទ្ធភាព និងសុវត្ថិភាពជូនបងប្អូនដែលមានជំងឺហេម៉ូហ្វីលាក្នុងប្រទេសកម្ពុជា។

បើយោងតាមរបាយការណ៍របស់សហព័ន្ធជំងឺហេម៉ូហ្វីលាពិភពលោក ក្នុងចំណោមមនុស្ស១០,០០០មានតែមួយនាក់ទេ ដែលកើតមកមានជំងឺនេះ ដែលមកពីមូលហេតុតំណរពូជ ៧០% និងកើតឡើងដោយឯកឯង៣០%។ ដូច្នេះនៅលើពិភពលោកមានជំងឺឈាមកម្រកកប្រមាណជា៦,៩លាននាក់ និង៧៥% នៃពួកគេ គឺពុំទាន់បានដឹង ដោយឡែកនៅប្រទេសកម្ពុជា តាមការប៉ាន់ប្រមាណគឺមាន២០០០នាក់ ទូទាំងប្រទេសកម្ពុជា ប៉ុន្តែអ្នកជំងឺមានចំនួនប្រមាណត្រឹម១០០នាក់ ដែលទទួលការ ព្យាបាល និងធ្វើរោគវិនិច្ឆ័យ។

សូមបញ្ជាក់ផងដែរថា ទិវាហេម៉ូហ្វីលាពិភពលោក ត្រូវបានចាប់ផ្តើមក្នុងឆ្នាំ១៩៨៩ ដោយសហព័ន្ធជំងឺហេម៉ូហ្វីលាពិភពលោក ដែលជាអ្នកជ្រើសរើស ដើម្បីឲ្យសហគមមកជួបជុំទាំងអស់គ្នា នៅថ្ងៃទី១៧ ខែមេសា ដែលជាថ្ងៃខួបកំណើតរបស់លោក ហ្វ្រេង ស្មាបែល (Frank Schnabel) ស្ថានិកនៃសហព័ន្ធជំងឺហេម៉ូហ្វីលាពិភពលោក នៅឆ្នាំ១៩៦៣។ ឆ្នាំ២០១៩ គឺជាលើកទី៤ ដែលសមាគមរៀបចំទិវាជំងឺហេម៉ូហ្វីលាពិភពលោកឆ្នាំ២០១៩ ភ្ជាប់ជាមួយនឹងសិក្ខាសាលាស្តីពីការព្យាបាលដោយ ចលនាសម្រាប់ អ្នកជំងឺហេម៉ូហ្វីលា ដែលត្រូវនឹងប្រធានបទនៃទិវាជំងឺហេម៉ូហ្វីលា ពិភពលោកឆ្នាំ២០១៩ «ឈានមួយជំហ៊ានដំបូង ដើម្បីថែទាំសុខភាព» រៀបចំធ្វើនៅថ្ងៃទី២៧ ខែមេសា ឆ្នាំ២០១៩ នៅមន្ទីរពេទ្យកុមារជាតិ និងកម្មវិធីដូចគ្នានៅខេត្តសៀមរាប នាថ្ងៃទី១២ ខែឧសភា ឆ្នាំ២០១៩៕