(ប៉េកាំង)៖ ចាប់ពីពេលនេះតទៅ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានទទួលគោរមងារថ្មីមួយទៀតនោះគឺ «សាស្ត្រាចារ្យកិត្តិយសផ្នែកទំនាក់ទំនងអន្តរជាតិ» ដែលប្រគល់ដោយសាកលវិទ្យាល័យប៉េកាំង នៅប្រទេសចិន នាល្ងាចថ្ងៃទី២៥ ខែមេសា ឆ្នាំ២០១៩នេះ។

ពិធីប្រគល់ «សាស្ត្រាចារ្យកិត្តិយសផ្នែកទំនាក់ទំនងអន្តរជាតិ» មានការចូលរួមដោយឥស្សរជនចិន អនុរដ្ឋមន្ត្រីក្រសួងអប់រំចិន នាយកសាកលវិទ្យាល័យប៉េកាំង រួមទាំងភ្ញៀវជាតិ និងអន្តរជាតិជាច្រើននាក់។

នៅក្នុងឱកាសទទួលគោរមងារនេះ សម្តេចតេជោ ហ៊ុន សែន ក៏បានទទួលជួប អនុរដ្ឋមន្ត្រីក្រសួងអប់រំចិនផងដែរ។ ពិធីទទួលគោរមងារនេះដែ ក៏មានការទស្សនាការសម្តែងសិល្បៈដោយនិស្សិតសាកលវិទ្យាល័យប៉េកាំង ការស្វាគមន៍របស់នាយកសាកលវិទ្យាល័យប៉េកាំង ការថ្លែងសន្ទរកថារបស់សម្តេចតេជោនាយករដ្ឋមន្រ្តី រួមទាំងពិធីសម្ពោធមជ្ឈមណ្ឌលវិទ្យាស្ថានស្រាវជ្រាវកម្ពុជា (ជានិមិត្តរូប) ថែមទៀត។

លោក យ៉េន យ៉ាត ជានិស្សិតខ្មែរមួយរូបទទួលបានអាហារូបករណ៍កំពុងសិក្សារៀនសូត្រ និងជាអ្នកស្រាវជ្រាវថ្នាក់ក្រោយបណ្ឌិតនៅសាកលវិទ្យាល័យប៉េកាំង។ លោក យ៉េន យ៉ាត បានលើកឡើងថា គោរមងារសាស្រ្តាចារ្យកិត្តិយសដែលសម្តេចនឹងទទួលបានពេលនេះ គឺជាគោរមងារដ៏ខ្ពស់បំផុត ដែលបញ្ជាក់ពីគុណវុឌ្ឍិដ៏ឆ្នើមផ្នែកចំណេះដឹង បទពិសោធន៍ ទេពកោសល្យ និងការចូលរួមចំណែកដ៏ធំធេងរបស់សម្តេចនាយករដ្ឋមន្ត្រីលើជំនាញដឹកនាំ ការបង្រួបបង្រួមជាតិ ការរក្សាសុខសន្តិភាព និងការអភិវឌ្ឍប្រទេសជាតិឱ្យមានកំណើនសេដ្ឋកិច្ចរឹងមាំមកទល់សព្វថ្ងៃនេះ។

«ការផ្តល់ជូនគោរមងារសាស្រ្តាចារ្យកិតិ្តយសនេះ គឺពិតជាសក្តិសមនឹងគុណតម្លៃ ស្នាដៃ និងការលះបង់ដ៏ធំធេងរបស់សម្តេចចំពោះមាតុភូមិកម្ពុជា។ តាមរយៈគោរមងារនេះ សម្តេចនាយរដ្ឋមន្ត្រី ហ៊ុន សែន គឺជាមេដឹកនាំខ្មែរទី១ ដែលនឹងក្លាយជាសាស្រ្តាចារ្យខ្មែរដំបូងគេនៅសាកលវិទ្យាល័យប៉េកាំង។ នេះពិតជាមោទនភាពសម្រាប់ជាតិ ក៏ដូចប្រជាជនកម្ពុជាទាំងមូល»។ លោក យ៉េន យ៉ាត បញ្ជាក់បន្ថែម។

លោក យ៉េន យ៉ាត បន្តថា «ការផ្តល់គោរមងារសាស្រ្តាចារ្យកិត្តិយសជូនសម្តេចនាយករដ្ឋមន្រ្តីពេលនេះ ក៏សរបញ្ជាក់ផងដែរអំពីចំណងមិត្តភាពដ៏រឹងមាំ និងយូរអង្វែងរវាងប្រជាជន និងប្រទេសទាំងពីរ តាមរយៈកិច្ចសហប្រតិបត្តិការលើគ្រប់វិស័យ ទាំងផ្នែកនយោបាយ សេដ្ឋកិច្ច ពាណិជ្ជកម្ម វប្បធម៌ និងការអភិវឌ្ឍធនធានមនុស្ស»។

លោកចាត់ទុកការទទួលបានគោរមងាររបស់សម្តេចតេជោ ជាសក្ខីភាពនៃគុណសម្បត្តិ និងគុណតម្លៃដ៏ឧត្តុង្គឧត្តមដែលមិនអាចកាត់ថ្លៃបាន ចំពោះការលះបង់ និងការខិតខំប្រឹងប្រែង ដើម្បីបុព្វហេតុជាតិ មាតុភូមិ និងប្រជាជនកម្ពុជា។ និស្សិតខ្មែរកំពុងរៀននៅសាកលវិទ្យាល័យប៉េកាំងរូបនេះ បានលើកឡើងថា ប្រជាជនកម្ពុជា ពិតជាមានសំណាងណាស់ដែលមានមេដឹកនាំប្រកបដោយសមត្ថភាព និងគុណធម៌។

ចាប់ពីអំឡុងឆ្នាំ១៩៩៥ រហូតដល់ឆ្នាំ២០១៩នេះ សម្តេចតេជោ ហ៊ុន សែន ទទួលបានសញ្ញាបត្រកិត្តិយស និងមេដាយកិត្តិយសពីបណ្តាសាកលវិទ្យាល័យនានាសរុបប្រមាណ ១៩ហើយក្នុងរួមមាន៖

១៖ នៅឆ្នាំ១៩៩៥ សម្តេចតេជោ បានទទួលសញ្ញាបត្របណ្ឌិតកិត្តិយសផ្នែកវិទ្យាសាស្ត្រនយោបាយ ពីសាកលវិទ្យាល័យកាលីហ្វ័រញ៉ាខាងត្បូង សម្រាប់ការសិក្សាមុខជំនាញ។

២៖ ឆ្នាំ១៩៩៦ បានទទួលសញ្ញាបត្របណ្ឌិតកិត្តិយសផ្នែកច្បាប់ពីមហាវិទ្យាល័យ វ៉ែសឡេយ៉ិន (Wesleyan) រដ្ឋអាយអូវ៉ា (Iowa) នៃសហរដ្ឋអាមេរិក។

៣៖ ថ្ងៃទី០២ ខែធ្នូ ឆ្នាំ១៩៩៦ សម្តេចតេជោ ហ៊ុន សែន ត្រូវបានបណ្ឌិតសភាសន្តិភាពពិភពលោក (World Peace Academy) ផ្តល់ពានរង្វាន់សន្តិភាពពិភពលោក។ សម្តេចតេជោជាជនទី១ នៅអាស៊ីខាងត្បូង ដែលបានទទួលនូវមហាកិត្តិយសនេះ។ សម្តេចតេជោ ក៏ត្រូវបានបណ្ឌិតសភាសន្តិភាពពិភពលោក ផ្តល់ជូននូវគោរម្យងារចំនួនបីផងដែររួមមាន៖ ១) សម្បតិ្តវប្បធម៌មនុស្សជាតិ (Human Cultural Asset) ២ អគ្គរដ្ឋទូតគោចរដើម្បីសន្តិភាព (Roving Ambassador for Peace) និង ៣) សមាជិកសមាជសន្តិភាពពិភពលោក (World Peace Congressman)។

៤៖ ថ្ងៃទី ១០ មេសា ឆ្នាំ ២០០១ នាទីក្រុង សេអ៊ូល គណៈកម្មាធិការផ្តល់ពានរង្វាន់ នៃសាលាថ្នាក់ក្រោយឧត្តមសិក្សានៃសាកលវិទ្យាល័យ Dankook ប្រទេសកូរ៉េខាងត្បូង បានសម្រេចជូនសម្តេចតេជោ ហ៊ុន សែន នូវសញ្ញាបត្រកិត្តិយសថ្នាក់បណ្ឌិតផ្នែកវិទ្យាសាស្ត្រនយោបាយ។ ការផ្តល់នេះជាការទទួលស្គាល់នូវការរួមចំណែក ធ្វើឲ្យបានប្រសើរឡើងវិញនូវសន្តិភាព និងស្ថេរភាពនៅកម្ពុជា ការធ្វើឲ្យបានប្រសើរឡើងវិញ ក្នុងទំនាក់ទំនងការទូតរវាងកម្ពុជា និងសាធារណរដ្ឋកូរ៉េ។ ព្រមទាំងការប្រឹងប្រែងរបស់សម្តេច ដើម្បីឲ្យមានសហប្រតិបត្តិការនៅក្នុងតំបន់អាស៊ីខាងកើត។

៥៖ ថ្ងៃទី១៥ ខែវិច្ឆិកា ឆ្នាំ២០០១ សម្តេចតេជោ ហ៊ុន សែន ត្រូវបានប្រគល់សញ្ញាបត្រកិត្តិយសថ្នាក់បណ្ឌិតផ្នែកវិទ្យាសាស្ត្រនយោបាយក្នុងវិស័យទំនាក់ទំនងអន្តរជាតិ ពីសាកលវិទ្យាល័យ «រ៉ាមកំហែង» នៃព្រះរាជាណាចក្រថៃ។

៦៖ ថ្ងៃទី២២ ខែធ្នូ ឆ្នាំ២០០១ ស្រ៊ី ជីនម៉យ នៃមជ្ឈមណ្ឌលសន្តិភាពអន្តរជាតិ បានបំពាក់ជូនសម្តេចតេជោ ហ៊ុន សែន នូវមេដាយ «ការលើកកម្ពស់ពិភពលោកដោយបេះដូងមានភាពតែមួយ» ដើម្បីជាការទទួលស្គាល់នូវសមិទ្ធិផលលើគ្រប់វិស័យ ដែលសម្តេចតេជោ ហ៊ុន សែន សម្រេចបានជាគុណប្រយោជន៍ដល់ប្រជាជន និងប្រទេសកម្ពុជា។ ស្រ៊ី ជីនម៉យ បានរៀបរាប់ពីសម្តេច ហ៊ុន សែន ថាជាឧបករណ៍ដ៏ឧត្តុង្គឧត្តមបំផុត ដែលត្រូវបានព្រះពុទ្ធអង្គជ្រើសបញ្ជូនមកឲ្យជួយសង្គ្រោះប្រជាពលរដ្ឋកម្ពុជារាប់លាននាក់ពីសេចក្តីស្លាប់ ផ្តល់ឲ្យពួកគេនូវការសិក្សា ចំណីអាហារ និងជំរក ឲ្យកសាងសម្រាប់ពួកគេនូវសាលារៀន មន្ទីរពេទ្យ និងប្រឡាយទឹក ហើយនាំកម្ពុជាចូលទៅជាសមាជិកប្រជាជាតិអាស៊ីភាគអាគ្នេយ៍។

៧៖ ថ្ងៃទី០៦ ខែសីហា ឆ្នាំ២០០២ សម្តេចតេជោ ហ៊ុន សែន ត្រូវបានបណ្ឌិតសភាវិទ្យាសាស្ត្រធម្មជាតិដ៏ល្បីល្បាញនៃសហព័ន្ធរុស្ស៉ី ផ្តល់ជូននូវឋានៈជា សមាជិកពេញសិទ្ធិរបស់បណ្ឌិតសភា និងបានបំពាក់ជូននូវមេដាយជាការទទួលស្គាល់ចំពោះស្នាដៃដឹកនាំរបស់សម្តេច ក្នុងការធ្វើឲ្យកម្ពុជាមានសន្តិភាព ស្ថេរភាព និងការអភិវឌ្ឍន៍សង្គម និងសេដ្ឋកិច្ច។

៨៖ ថ្ងៃទី០៤ ខែកញ្ញា ឆ្នាំ ២០០២ គណៈកម្មាធិការសហព័ន្ធវិស្វកម្មអាស៊ាន បានសម្រេចផ្តល់ជូនសម្តេចតេជោ ហ៊ុន សែន នូវគោរម្យងារថ្នាក់ខ្ពស់បំផុត និងជាលើកដំបូងរបស់ខ្លួន គឺ «វិស្វករកិត្តិយសដ៏ឧត្តុង្គឧត្តម» ដើម្បីជាការទទួលស្គាល់នូវមនសិការជាតិ និងសមត្ថភាពដឹកនាំក្នុងការបញ្ចប់សង្គ្រាមផ្ទៃក្នុង ការស្តារ និងអភិវឌ្ឍន៍លើគ្រប់វិស័យនៃសង្គមជាតិ និងការបើកលទ្ធភាពអោយបញ្ញវន្តវិស្វកម្មជាតិ បានចូលរួមក្នុងចលនាកសាង និងអភិវឌ្ឍន៍ជាតិ។

៩៖ ថ្ងៃទី១០ ខែមេសា ឆ្នាំ២០០៤ អភិបាល និងព្រឹទ្ធបុរសនៃសាកលវិទ្យាល័យអន្តរជាតិអាយរីស (Irish International University) នៃសហភាពអឺរ៉ុប បានផ្តល់សញ្ញាបត្រថ្នាក់បណ្ឌិតកិត្តិយសផ្នែកវិទ្យាសាស្ត្រនយោបាយ ជូនសម្តេច ហ៊ុន សែន និងដើម្បីជាការទទួលស្គាល់ការរួមចំណែក និងសមិទ្ធិផលជាច្រើន។ សាកលវិទ្យាល័យអន្តរជាតិ អាយរីស ក៏បានផ្តល់ជាកិត្តិយសជូនសម្តេចនូវមេដាយ Excellence 2004។

១០៖ ថ្ងៃទី២១ ខែមីនា ឆ្នាំ២០០៦ ក្នុងដំណើរទស្សនកិច្ចជាផ្លូវការទៅកាន់សាធារណរដ្ឋកូរ៉េ សាកលវិទ្យាល័យ Soon Chun Hyang នាទីក្រុងសេអ៊ូល បានប្រគល់ជូនសម្តេចតេជោ ហ៊ុន សែន នូវសញ្ញាបត្របណ្ឌិតកិត្តិយសទស្សនវិជ្ជាផ្នែកវិទ្យាសាស្ត្រនយោបាយ ដើម្បីគូសបញ្ជាក់ពីការដឹកនាំកសាងប្រទេសឡើងវិញ និងការបូជាអស់ពីកម្លាំងកាយចិត្ត ដើម្បីសន្តិភាព និងវិបុលភាព សម្រាប់កម្ពុជា និងតំបន់អាស៊ីភាគអាគ្នេយ៍ ពិសេសចំពោះការយកចិត្តទុកដាក់ដល់ការបង្កើនទំនាក់ទំនងជាមិត្តភាព ជាមួយសាធារណរដ្ឋ កូរ៉េ។

១១៖ ថ្ងៃទី២៨ ខែមិថុនា ឆ្នាំ២០០៦ ដោយយល់ និងគោរពចំពោះការរួមចំណែកសំខាន់ៗ ជាច្រើននៅក្នុងវិស័យអប់រំ និងការប្តេជ្ញាប្រកបដោយទំនុកចិត្ត ធ្វើឲ្យមានសុខុមាលភាពជាក់ស្តែងជូនប្រជាជនកម្ពុជា និងការធ្វើឲ្យទំនាក់ទំនងកម្ពុជា និងថៃ មានសភាពប្រសើរឡើង ក្រុមប្រឹក្សានៃសាកលវិទ្យាល័យរាជផាត់បានសម្តេចចៅប្រាយ៉ា បានសម្រេចជាឯកច្ឆន្ទ ប្រគល់ជូនសម្តេចតេជោ ហ៊ុន សែន នូវសញ្ញាបត្របណ្ឌិតកិត្តិយសផ្នែកអប់រំសម្រាប់ការអភិវឌ្ឍន៍មូលដ្ឋាន ជាការទទួលស្គាល់នូវតួនាទីរបស់សម្តេច ក្នុងការអភិវឌ្ឍន៍ប្រទេស តាមរយៈការអប់រំ និងរួមចំណែកពង្រឹងទំនាក់ទំនងល្អ រវាងប្រទេសទាំងពីរ កម្ពុជា-ថៃ។

១២៖ ថ្ងៃទី២៩ ខែមករា ឆ្នាំ២០០៧ យោង ទៅលើការរួមចំណែកដ៏មានតម្លៃ ចំពោះការអភិវឌ្ឍន៍សង្គម និងសេដ្ឋកិច្ចរបស់កម្ពុជា ដែលធ្វើឲ្យមានការអភិវឌ្ឍន៍យ៉ាងលឿន និងលើច្រើនវិស័យ ក្រសួងអប់រំ និងបណ្តុះបណ្តាលនៃសាធារណរដ្ឋសង្គមនិយមវៀតណាម រួមដោយសាកលវិទ្យាល័យជាតិក្រុងហាណូយ ប្រគល់ជូនសម្តេចតេជោ ហ៊ុន សែន នូវសញ្ញាបត្របណ្ឌិតកិត្តិយសផ្នែកអប់រំ។

១៣៖ ថ្ងៃទី២៧ ខែកក្កដា ឆ្នាំ២០០៧ សមាគមអ្នកមានវិញ្ញាបនបត្រការទូតពាណិជ្ជ (ACCD) ទីក្រុងឡុងដ្រ៍ ប្រទេសអង់គ្លេស ជាស្ថាប័នជំនាញអន្តរជាតិដំបូងគេនៃអ្នកការទូតមានវិញ្ញាបនបត្រ សម្រេចទទួលសម្តេចតេជោ ហ៊ុន សែន ឲ្យមានឋានន្តរៈសក្តិ អភ័យឯកសិទ្ធិកិត្តិយស និងឋានៈ ជា «Chartered Diplomat» ដែលមានសិទ្ធជារៀងរហូតបន្ថែមនៅពីក្រោយឈ្មោះ ជាអក្សរ «C Dipl» ជាការឆ្លើយតបទៅនឹងជោគជ័យ និងការសំរេចបានតាមការតម្រូវរបស់ ACCD ប្រកបដោយសុច្ចរិតភាព ការប្តេជ្ញា និងសមិទ្ធិផលលេចធ្លោ នៅក្នុងវិស័យការទូត និងការកសាងសន្តិភាព។

១៤៖ ថ្ងៃទី២១ ខែកញ្ញា ឆ្នាំ២០០៧ ជាថ្មីម្តងទៀត សមាគមអ្នកមានវិញ្ញាបនបត្រការទូតពាណិជ្ជ ផ្តល់ជូនសម្តេចតេជោ ហ៊ុន សែន នូវងារកិត្តិយសជាអ្នកគាំទ្រវិជ្ជាជីវៈការទូតពាណិជ្ជកម្ម។

១៥៖ ថ្ងៃទី០៧ ខែមករា ឆ្នាំ២០០៩ នៅភ្នំពេញ ដោយទទួលស្គាល់ និងវាយតម្លៃខ្ពស់ចំពោះការរួមចំណែកដ៏ថ្លៃថ្លាចំពោះការធ្វើអោយប្រសើរឡើង នូវកិច្ចសហប្រតិបត្តិការសេដ្ឋកិច្ចរវាងសាធារណរដ្ឋកូរ៉េ និងព្រះរាជាណាចក្រកម្ពុជា គណៈកម្មាធិការសាលាឧត្តមសិក្សា នៃសាកលវិទ្យាល័យ Woosuk សម្រេចប្រគល់ជូនសម្តេចតេជោនាយករដ្ឋមន្ត្រី ហ៊ុន សែន នូវសញ្ញាបត្របណ្ឌិតកិត្តិយសផ្នែកសេដ្ឋកិច្ច។

១៦៖ ថ្ងៃទី០៣ ខែមិថុនា ឆ្នាំ២០០៩ នាក្រុងសេអ៊ូល គណៈកម្មាធិការសាលាឧត្តមសិក្សា នៃសាកលវិទ្យាល័យកូរ៉េ សម្រេចប្រគល់ជូនសម្តេចតេជោ ហ៊ុន សែន ដែលបានបម្រើមនុស្សជាតិយ៉ាងធំធេងជារដ្ឋបុរស និងជាអ្នកនយោបាយនូវសញ្ញាបត្របណ្ឌិតកិត្តិយសផ្នែកវិទ្យាសាស្ត្រនយោបាយ យោងទៅលើតួនាទីដ៏សំខាន់ក្នុងចលនារំដោះកម្ពុជា ការសម្រុះសម្រួលជាតិ និងសន្តិភាព ការរួមវិភាគទានដ៏ធំធេង ឲ្យមានការអភិវឌ្ឍន៍នយោបាយ ការទូត និងសេដ្ឋកិច្ចកម្ពុជា ក៏ដូចជាការពូនជ្រុំ ទំនាក់ទំនងមិត្តភាព និងកិច្ចសហប្រតិបត្តិការ សេដ្ឋកិច្ចរវាង កម្ពុជា និងកូរ៉េ។

១៧៖ ថ្ងៃទី០៩ ខែកញ្ញា ឆ្នាំ២០១៥ ដោយទទួលស្គាល់ និងវាយតម្លៃជាអ្នកដឹកនាំប្រកបដោយគតិបណ្ឌិត អ្នកបង្រួបបង្រួមសន្តិភាព និងអ្នកដឹកនាំកសាងប្រទេសតែមួយគត់នៅលើលោក មានស្មារតី លះបង់ និង សម្រេចបានជោគជ័យដ៏មហិមា ក្នុងការផ្លាស់ប្តូរប្រទេសកម្ពុជា ថ្នាក់ដឹកនាំជាន់ខ្ពស់ និងក្រុមប្រឹក្សាភិបាល នៃសាកលវិទ្យាល័យ លីមកុកវីង អហ្វ គ្រីអេធីវ តិចណូឡូជី នៃ ម៉ាឡេស៊ី បានសម្រេចប្រគល់សញ្ញាបត្របណ្ឌិតកិត្តិយស «ភាពជាអ្នកដឹកនាំឆ្នើម» ជូនសម្តេចតេជោ ហ៊ុន សែន។

១៨៖ ថ្ងៃទី១៥ ខែតុលា ឆ្នាំ២០១៥ ក្នុងដំណើរទស្សនកិច្ចជាផ្លូវការនៅសាធារណរដ្ឋប្រជាមានិតចិន សម្តេចតេជោ ហ៊ុន សែន ត្រូវបានសាកលវិទ្យាល័យក្វាងស៊ី សម្រាប់ប្រជាជាតិ ប្រគល់សញ្ញាប័ត្របណ្ឌិតកិត្តិយសផ្នែកអក្សរសាស្ត្រ ជាការទទួលស្គាល់ចំពោះសមត្ថភាពលេចធ្លោក្នុងការដឹកនាំ ការធ្វើឲ្យឯកភាពប្រទេស និងពូនជ្រុំទំនាក់ទំនងរឹងមាំរវាងចិន និងកម្ពុជា។

១៩៖ កាលពីថ្ងៃទី១៩ ខែមីនា ឆ្នាំ២០១៩ សាកលវិទ្យាល័យគ្រើក (Krirk University) នៅប្រទេសថៃ បានប្រគល់សញ្ញាបត្របណ្ឌិតកិត្តិយសផ្នែកទំនាក់ទំនងនយោបាយជូន សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាផងដែរ៕