(ភ្នំពេញ)៖ នៅចំពោះមុខគណៈកម្មការជំនាញនៃរដ្ឋសភា-ព្រឹទ្ធសភា អង្គការជាដៃគូសហប្រតិបត្តិការជាតិ-អន្តរជាតិ និងភ្ញៀវកិត្តិយសជាតិ-អន្តរជាតិជាច្រើននាក់ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអះអាងថា កម្ពុជាអាចវិវឌ្ឍន៍វិស័យអប់រំក្នុងបរិបទឌីជីថលបាន ដូចបណ្តាប្រទេសអភិវឌ្ឍន៍ហើយ ក៏ប៉ុន្តែគ្រាន់តែប្រទេសនេះនៅខ្វះខាតធនធានតែប៉ុណ្ណោះ។

ការអះអាងរបស់លោករដ្ឋមន្ត្រី បានធ្វើឡើងក្នុងឱកាសដែលក្រសួងអប់រំ យុវជន និងកីឡា បានសហការជាមួយគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភា ឬគណៈកម្មការទី៧ ដើម្បីរៀបចំសិក្ខាសាលាស្តីពី «ការវិវត្តវិស័យអប់រំ ក្នុងបរិបទឌីជីថលក្នុងក្របខណ្ឌសកល និងកម្ពុជា» នៅព្រឹកថ្ងៃទី២២ ខែមេសា ឆ្នាំ២០១៩។

សិក្ខាសាលាដែលត្រូវបានធ្វើឡើង នៅវិមានរដ្ឋសភានេះ គឺជាវេទិកាពិគ្រោះយោបល់មួយដ៏សំខាន់ ក្នុងការទទួលបានធាតុចូលបន្ថែមចែករំលែកបទពិសោធន៍ ចំណេះដឹង ទស្សនាទានចំពោះការអភិវឌ្ឍវិស័យអប់រំនៅកម្ពុជា និងចក្ខុវិស័យទៅអនាគត ក្នុងការត្រៀមខ្លួនរបស់កម្ពុជាឆ្លើយតបទៅនឹងរបត់ថ្មីនៃយុគសម័យឌីជីថល និងបដិវត្តន៍ឧស្សាហកម្មជំនាន់ទី៤ ក្នុងក្របខណ្ឌនៃសង្គមពុទ្ធិ។

លោក ហង់ជួន ណារ៉ុន បានបញ្ជាក់យ៉ាងដូច្នេះថា៖ «ការវិវត្តវិស័យអប់រំក្នុងបរិបទឌីជីថលយើងធ្វើបាន ប៉ុន្តែបរិបទយើងមិនអាចធ្វើទូទាំងប្រទេសបានដែរ ដោយសារខ្វះធនធាន។ ដូច្នេះកន្លែងណាអាចទៅរួច យើងទៅ។ យើងធ្វើបានហើយ នៅស៉ីសុវត្ថិសាលាជំនាន់ថ្មីយើងធ្វើបានហើយ គ្រាន់តែយើងមានកម្រិតមួយ ហើយវិនិយោគប៉ុណ្ណឹងក៏សមរម្យ...»។

លោករដ្ឋមន្ត្រីក្រសួងអប់រំ បានថ្លែងបន្តថា បើកម្ពុជាចង់បានសាលាសតវត្សទី២១ តាមសាលានានាក៏ត្រូវមានគ្រូសតវត្សទី២១ ដែរ។ ក្នុងន័យនេះ លោកចង់ឃើញគ្រូទាំងអស់ ត្រូវពង្រឹងសមត្ថភាពបន្ថែមទៀត ដើម្បីត្រៀមខ្លួនទទួលយកការអភិវឌ្ឍវិស័យអប់រំនៅកម្ពុជា និងចក្ខុវិស័យទៅអនាគតដើម្បីឆ្លើយតប ទៅនឹងរបត់ថ្មីនៃយុគសម័យឌីជីថល និងបដិវត្តន៍ឧស្សាហកម្មជំនាន់ទី៤ ក្នុងក្របខណ្ឌនៃសង្គមពុទ្ធិ។

លោកបញ្ជាក់បន្ថែមថា «យើងត្រូវធ្វើឱ្យសាលាក្លាយទៅជាកន្លែងដែលបង្រៀនសិស្សឱ្យចេះគិត និងចេះដោះស្រាយបញ្ហា លែងជាកន្លែងបង្រៀនឱ្យសុទ្ធតែចាំទៀតហើយ។ ដំណើរយើងទៅមុខ គឺត្រូវពង្រឹងមូលដ្ឋានគ្រឹះ ទាំងមូលដ្ឋានទុន និងមូលដ្ឋានរឹងហើយយើងត្រូវធ្វើពីមួយដំណាក់ កាលទៅមួយដំណាក់កាល និងជាប្រព័ន្ធ»។

ទោះបីជាយ៉ាងណាក៏ដោយ ដើម្បីឱ្យការវិវត្តវិស័យអប់រំក្នុងបរិបទឌីជីថលដំណើរការបានទូទាំងប្រទេស លោក ហង់ជួន ណារ៉ុន មិនបានបញ្ជាក់ថា ត្រូវចំណាយថវិកាប៉ុន្មាន និងត្រូវប្រើពេលយូរយ៉ាងណានោះឡើយ។ លោកគ្រាន់តែបង្ហើបថា ទីតាំងណាដែលអាចដំណើរការបាន នឹងដាក់ឱ្យដំណើរការតែម្តង។

ទាក់ទងនឹងអង្គសិក្ខាសាលានេះ លោក ហ៊ុន ម៉ានី ប្រធានគណៈកម្មការទី៧ នៃរដ្ឋសភា ជឿជាក់ថា ជាចំណុចចាប់ផ្តើមសម្រាប់ការពិភាក្សាយ៉ាងទូលំទូលាយ ក្នុងការត្រៀមខ្លួនក្នុងវិស័យអប់រំសម្រាប់យុគសម័យឌីជីថល។ ការលើកឡើងជាទស្សនៈ ចំណេះដឹង និងអនុសាសន៍ក្នុងសិក្ខាសាលា នឹងក្លាយជាមូលដ្ឋានក្នុងការពិចារណាបន្ថែមទៀត សម្រាប់អនុវត្តន៍ទិសដៅការងារនាពេលអនាគត នៃវិស័យអប់រំនៅកម្ពុជាផងដែរ។

បើតាមលោក ហ៊ុន ម៉ានី លោកបានអបអរសាទរ និងវាយតម្លៃខ្ពស់ចំពោះលទ្ធផលដ៏ល្អប្រសើរ នៃអង្គសិក្ខាសាលាទាំងមូល ដែលជាគំនិតផ្តួចផ្តើមរបស់រដ្ឋសភានៃកម្ពុជា នីតិកាលទី៦នេះ ក្នុងការបន្តតាមដាន ជំរុញវាយតម្លៃ សហការ ពិភាក្សាជាមួយអង្គនីតិប្រតិបត្តិ ដែលមានក្រសួងអប់រំ យុវជន និងកីឡា ជាសេនាធិការ ដើម្បីចូលរួមចំណែកបង្កើនប្រសិទ្ធភាព និងប្រសិទ្ធផលនៃសេវាសាធារណៈក្នុងវិស័យអប់រំ ក៏ដូចជាការពិភាក្សាអំពីទស្សនៈវិស័យពាក់ព័ន្ធនានា។

ជាមួយគ្នានេះ លោក ងួន ញិល អនុប្រធានទី១នៃរដ្ឋសភា បានអះអាងដែរថា កម្ពុជាក៏បានត្រៀមខ្លួនសម្រាប់ដំណើរឈានទៅយុគសម័យឌីជីថល ដូចដែលយុទ្ធសាស្រ្តចតុកោណដំណាក់កាលទី៤ បានចែងអំពីអាទិភាពការងារសំខាន់ៗ ក្នុងនីតិកាលទី៦នេះ ដែលពាក់ព័ន្ធការលើកកម្ពស់គុណភាពអប់រំ វិទ្យាសាស្រ្ត និងបច្ចេកវិទ្យា និងការរៀបចំខ្លួនសម្រាប់សេដ្ឋកិច្ចឌីជីថល និងការឆ្លើយតនឹងបដិវត្តន៍ឧស្សាហកម្មទី៤។

លោកបន្ថែមថា អង្គសិក្ខាសាលានាពេលនេះ គឺជាវេទិកាមួយដ៏សមស្របមួយ និងត្រូវតាមកាលៈទេសៈ ដើម្បីបង្កឱកាសដល់តួអង្គពាក់ព័ន្ធទាំងឡាយ ក្នុងការចែករំលែកនូវបទពិសោធន៍ល្អៗ ទស្សនទានថ្មីៗ និងការពិភាក្សាផុសផុល ដើម្បីរំលេច និងស្វែងរកនូវគន្លឹះថ្មីៗក្នុងការជួយជ្រោមជ្រែងដល់និស្សិត សិស្សានុសិស្ស មន្រ្តីអប់រំ និងលោកគ្រូអ្នកគ្រូ បើកទូលាយនូវគំនិតថ្មីៗបន្ថែមទៀត និងបង្កើនការយកចិត្តទុកដាក់ទ្វេដង ក្នុងការអភិវឌ្ឍសមត្ថភាព និងចំណេះដឹងដែលអាចឆ្លើយតប ទៅនឹងបរិបទសង្គមនាពេលបច្ចុប្បន្ន និងទៅអនាគត ផ្សារភ្ជាប់នឹងនិន្នាការសកលនៃយុគសម័យឌីជីថល ដែលរាជរដ្ឋាភិបាលកម្ពុជាបាន និងកំពុងកសាងជាមូលដ្ឋានសំខាន់មួយនៃដំណើរអភិវឌ្ឍន៍៕