(ភ្នំពេញ)៖ ស្របពេលដែលប្រមុខរាជរដ្ឋាភិបាលកម្ពុជា បានជំរុញឱ្យគ្រប់ស្ថាប័នរដ្ឋ និងឯកជន បន្តស្វះស្វែងរកមិត្តភក្តិ និងដៃគូពាណិជ្ជកម្ម ក៏ដូចជាវិនិយោគគិនជាតិ អន្តរជាតិ ឱ្យមករកស៉ីនៅកម្ពុជាកាន់តែច្រើន ដើម្បីបន្តកំណើនសេដ្ឋកិច្ចប្រទេស និងលើកកម្ពស់ជីវភាពប្រសើរឡើងរបស់ប្រជាពលរដ្ឋ លោក ឃួង ស្រេង អភិបាលរាជធានីភ្នំពេញ បានស្នើដល់ប្រតិភូនៃព្រឹទ្ធសភាខេត្តស៉ីឈួន ប្រទេសចិន ឱ្យពិនិត្យលទ្ធភាពក្នុងការបញ្ជូនអ្នកវិនិយោគរបស់ខ្លួន មកកម្ពុជាឱ្យបានកាន់តែច្រើន ខណៈដែលកម្ពុជាកំពុងមានសក្តានុពល ដើម្បីវិនិយោគទទួលបានផលចំណេញ។

ការស្នើបែបនេះបានធ្វើឡើងកាលពីរសៀលថ្ងៃទី១៨ ខែមេសា ឆ្នាំ២០១៩ ខណៈដែលលោកអភិបាលរាជធានីភ្នំពេញ បានទទួលជួបពិភាក្សា និងផ្លាស់ប្តូរមតិយោបល់ លើវិស័យពាណិជ្ជកម្ម ទំនាក់ទំនងមិត្តភាព និងទេសចរណ៍ ជាមួយប្រតិភូព្រឹទ្ធសភាខេត្តស៉ីឈួន ដឹកនាំដោយលោក ជុង មាន អនុប្រធានព្រឹទ្ធសភា នៃខេត្តស៉ីឈួន
នៅសាលារាជធានីភ្នំពេញ។ ជំនួបនេះត្រូវបានធ្វើឡើង ដើម្បីជំរុញឱ្យមានការផ្លាស់ប្តូរគណៈប្រតិភូជាន់ខ្ពស់ និងកិច្ចសហប្រតិបត្តិការគ្រប់វិស័យ រវាងកម្ពុជា និងខេត្តស៉ីឈួន ក្នុងអំឡុងពេលដែលលោក និងប្រតិភូមកបំពេញទស្សនកិច្ចរយៈពេល៤ថ្ងៃ គឺចាប់ពីថ្ងៃទី១៧ ដល់ថ្ងៃទី២០ ខែមេសានៅក្នុងព្រះរាជាណាក្រកម្ពុជា។

លោក ឃួង ស្រេង បានថ្លែងថា ប្រទេសកម្ពុជានៅពេលនេះ មានការអភិវឌ្ឍលើគ្រប់វិស័យ ក្រោមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្រ្តី ដោយបានធ្វើឲ្យសេដ្ឋកិច្ចមានការរីកចម្រើនគួរឱ្យកត់សម្គាល់ ពិសេសជីវភាពប្រជាពលរដ្ឋ មានភាពប្រសើរឡើងជាលំដាប់។ តាមរយៈនេះលោក ឃួង ស្រេង បានស្នើឱ្យលោកអនុប្រធានព្រឹទ្ធសភា នាំនូវដំណឹងនេះទៅផ្សព្វផ្សាយដល់ប្រជាជន និងអ្នកវិនិយោគនៅខេត្តស៉ីឈួន ឱ្យមកស្វែងយល់ពីឱកាសវិនិយោគនៅកម្ពុជា ឱ្យបានច្រើនថែមទៀត។

លោក ជុង មាន ក្នុងឱកាសនោះក៏បានវាយតម្លៃខ្ពស់ ចំពោះការដឹកនាំធ្វើឱ្យរាជធានីមានការរីកចម្រើន ជាពិសេសសំណង់អគារ មជ្ឈមណ្ឌលពាណិជ្ជកម្ម មធ្យោបាយធ្វើដំណើរ និងហេដ្ឋារចនាសម្ព័ន្ធ មានការរីកព្រោងព្រាតយ៉ាងឆាប់រហ័ស។ តបតាមសំណើរ និងសេចក្តីត្រូវការខាងលើ ក្រុមប្រតិភូនឹងនាំនូវដំណឹងដ៏ល្អនេះ ទៅផ្សព្វផ្សាយក៏ដូចជាជំរុញឱ្យអ្នកវិនិយោគខេត្តស៉ីឈួន បន្តមកវិនិយោគនៅកម្ពុជាឱ្យបានច្រើន។

លោក ជុង មាន ក៏បានជម្រាបជូនផងដែរថា ក្នុងពេលនេះក៏មានក្រុមប្រតិភូអ្នកវិនិយោគវ័យក្មេងខេត្តស៉ីឈួនមួយក្រុម បាននិងកំពុងជួបពិភាក្សាជាមួយដៃគូរវិនិយោគកម្ពុជា ដើម្បីស្វែងយល់ពីឱកាសមកវិនិយោគនៅកម្ពុជា។ ជាមួយគ្នានេះ ដើម្បីបំពេញតម្រូវការរបស់អ្នកវិនិយោគ កម្ពុជា និងខេត្តស៉ីឈួន ដែលមានការកើនឡើងជាហូរហែរ រដ្ឋបាលខេត្តស៉ីឈួន មានគម្រោងបង្កើនជើងហោះហើរត្រង់មកកាន់កម្ពុជា ឱ្យបានជារៀងរាល់ថ្ងៃ ខណៈពេលបច្ចុប្បន្នមានការហោះហើរត្រង់ចំនួន ៤ជើងក្នុងមួយសប្តាហ៍។

ប្រធានប្រតិភូបានបញ្ជាក់ថា អនុវត្តnតាមយុទ្ធសាស្រ្តផ្លូវមួយ ខ្សែក្រវ៉ាត់មួយ ប្រទេសចិនមានគោលដៅចាប់យកតំបន់អាស៉ីអាគ្នេយ៍ និងអាស៉ីបូព៌ា ដែលត្រូវជំរុញទំហំពាណិជ្ជកម្ម ជាពិសេសទំហំពាណិជ្ជកម្ម រវាងកម្ពុជា និងខេត្តស៉ីឈួន ឱ្យបានកើនឡើងថែមទៀត ស្របពេលបច្ចុប្បន្នមានតែជាង ២ពាន់លានដុល្លារតែប៉ុណ្ណោះ។

លោកប្រធានប្រតិភូ ក៏បានបញ្ជាក់ពីជំហររបស់រដ្ឋបាលខេត្តស៉ីឈួនថា ខ្លួនបានត្រៀមរួចជាស្រេចហើយ ក្នុងការសម្របសម្រួលដល់គម្រោងនាំផលិតផលពីកម្ពុជាទៅកាន់ខេត្តនេះ។ លើសពីនេះ ក៏បានសន្យាទាក់ទាញអ្នកវិនិយោគឱ្យមកកម្ពុជាបានកាន់តែច្រើន ពិសេសក្រុមហ៊ុនទាំង៧ ដែលបានចុះ MOU ជាមួយកម្ពុជា លើវិស័យទំនាក់ទំនង វប្បធម៌ ទេសចរណ៍ និងហេដ្ឋារចនាសម្ព័ន្ធ រួចហើយនោះ។

លោក ជុង មាន ក៏បានសំណូមពរឱ្យមានការធ្វើទំនាក់ទំនង រវាងមន្រ្តីរដ្ឋបាលរាជធានីភ្នំពេញ និងមន្រ្តីរដ្ឋបាលខេត្តស៉ីឈួន ឱ្យបានយ៉ាងស្អិតរមួត ហើយចង់ឱ្យមានកិច្ចសហប្រតិបត្តិការ រវាងរាជធានីភ្នំពេញនិងទីក្រុងណាមួយនៃខេត្តស៉ីឈួន និងបង្កើនការបណ្តុះបណ្តាល ការអប់រំ វប្បធម៌ និងទេសចរណ៍ ឱ្យបានកាន់តែស៉ីជម្រៅ និងគ្រប់ជ្រុងជ្រោយថែមទៀត៕