(ស្វាយរៀង)៖ លោក ម៉ែន វិបុល អភិបាលខេត្តស្វាយរៀង និងជាប្រធានគណៈបញ្ជាការឯកភាពខេត្តបាន នាព្រឹកថ្ងៃទី១២ ខែមេសា ឆ្នាំ២០១៩ បានប្រកាសចេញនូវវិធានការសំខាន់ៗ ៦ចំណុច ដល់កងកម្លាំងសមត្ថកិច្ចពង្រឹងការការពារសន្តិសុខ និងសុវត្ថិភាពជូនប្រជាពលរដ្ឋ ក្នុងឱកាសបុណ្យចូលឆ្នាំថ្មីនេះ។
សម្ភាៈគ្រឿងឧបគោគបរិភោគ ដែលជាអំណោយដ៏ថ្លៃថ្លា របស់ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងលោកស្រីនិងលោក ម៉ែន វិបុល អភិបាលខេត្តស្វាយរៀង និងលោកស្រីនាឱកាសនោះរួម មាន៖ អង្ករចំនួន ១១៤ បាវ , ទឹកក្រូច ចំនួន ២៦៥ កេស មី ១២៥ កេស ទឹកត្រី ១១៤ យួរ និង ស៊ីអ៊ីវ ចំនួន ១១៤ យួរ ។
គួររំលឹកផងដែរ នេះមិនមែនជាលើកទី ១ ទេ ដែលថ្នាក់ដឹកនាំ តែងតែមានការយកចិត្តទុកដាក់ដល់មន្ត្រីនគរបាលគ្រប់លំដាប់ថ្នាក់ ធ្វើការចែកជូនអំណោយជារៀងរាល់ឆ្នាំ ក្រោមការផ្តួចផ្តើមពីលោកឧត្តមសេនីយ៍ទោ កឹង ឃន ស្នងការនគរបាលខេត្តស្វាយរៀង ។
នាឱកាសបុណ្យចូលឆ្នាំថ្មី និងស្របពេលដែលខេត្តស្វាយរៀង រៀបចំនូវកម្មវិធីសង្ក្រាន្តស្វាយរៀង លោកអភិបាលខេត្តបានមានមតិផ្តាំផ្ញើដល់កងកម្លាំងនូវចំណុចសំខាន់ៗចំនួន ៦ចំណុច រួមមាន៖
១៖ គ្រប់ជំនាញទាំងអស់ដែលឈរជើងគ្រប់គោលដៅ និងអធិការក្រុងស្រុក ប៉ុស្តិ៍រដ្ឋបាល ឃុំសង្កាត់ ត្រូវខិតខំយកចិត្តទុកដាក់ការពារសុវត្ថិភាពជូនប្រជាពលរដ្ឋ។
២៖ កងកម្លាំងទាំងអស់អាចឈប់សម្រាកបានមុនថ្ងៃចូលឆ្នាំមកដល់ ឬក្រោយចូលឆ្នាំ ប៉ុន្តែថ្ងៃចូលឆ្នាំត្រូវប្រមូលផ្តុំកម្លាំងសរុបការពារសន្តិសុខ សុវត្ថិភាពឱ្យបានល្អគ្រប់មូលដ្ឋាននៃខេត្តស្វាយរៀង។
៣៖ ប្រធាន អនុប្រធានការពារសន្តិសុខ សុវត្ថិភាព ថ្ងៃសង្ក្រាន្តត្រូវពង្រឹងឱ្យបានតឹងរឹងបំផុត ដើម្បីត្រៀមលក្ខណៈពិនិត្យគ្រប់មុខសញ្ញាទាំងអស់ដែលចូលក្នុងខេត្តស្វាយរៀង និងចាត់វិធានការភ្លាមៗចំពោះជនទាំងនោះ។
៤៖ ត្រូវបន្តផ្សព្វផ្សាយព័ត៌មាននៅក្នុងផេកហ្វេសបុកស្នងការខេត្ត ឬតាមប្រពន្ធផ្សព្វផ្សាយផ្សេងៗ អំពីការការពារសុវត្ថិភាព ក៏ដូចជាទ្រព្យសម្បត្តិផ្ទាល់ខ្លួនរបស់ប្រជាពលរដ្ឋ និងការផ្តល់ព័ត៌មានត្រឡប់មកដល់កងកម្លាំងភ្នាមៗ ដើម្បីចាត់វិធានការទាន់ពេលវេលា។
៥៖ កម្លាំងនៅតាមមូលដ្ឋានត្រូវឈរជើងគ្រប់គោលដៅសំខាន់ៗ ដូចជា វត្តអារាម និងទីប្រជុំជនជាដើម។
៦៖ ត្រូវបង្កើនបង្គោលដៅបន្ថែមទៀតក្នុងការងារចរាចរណ៍ ដើម្បីការពារសុវត្ថិភាពជូនប្រជាពលរដ្ឋ ក្នុងការកាត់បន្ថយគ្រោះថ្នាក់ចរាចរណ៍ នាឱកាសបុណ្យចូលឆ្នាំថ្មីនេះ៕
