(តាកែវ)៖ ទេសរដ្ឋមន្រ្តី គន់ គីម អគ្គលេខាធិការសមាគមអតីតយុទ្ធជនកម្ពុជា អញ្ជើញប្រគល់ផ្ទះចំនួន២០ខ្នង ធ្វើពីថ្ម ប្រក់សង្ក័សី ទំហំ៥ម៉ែត្រ គុណ៥ម៉ែត្រ និងតសំយ៉ាប៣ម៉ែត្រ ជាអំណោយរបស់ សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដែលសាងសង់ ដោយ ឧកញ៉ា វិញ ហួរ ក្នុងនាមសម្តេច តេជោ ហ៊ុន សែន ជូនដល់អតីតយុទ្ធជន ស្ថិតនៅភូមិអូរស្ងើន ឃុំញ៉ែងញ៉ង ស្រុកត្រាំកក់ ខេត្តតាកែវ។
ពិធីប្រគល់នៅថ្ងៃទី១១ ខែ មេសា ឆ្នាំ២០១៩នេះ ក៏មានការអញ្ជើញចូលរួមពី លោក ឯក ក្រិត រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា និង លោកឧកញ៉ា វិញ ហួរ រួមទាំងមន្ត្រីពាក់ព័ន្ធជាច្រើនទៀតផងដែរ។
ក្នុងឱកាសនោះ ទេសរដ្ឋមន្ដ្រី គន់ គីម ក៏បាននាំនូវការផ្តាំផ្ញើសួរសុខទុក្ខពី សម្តេចតេជោ ហ៊ុន សែន ជូនដល់អតីតយុទ្ធជន ដែលរស់នៅទីនេះទាំងអស់គ្នា និងផ្តាំផ្ញើដល់បងប្អូន ដែលទើបបានទទួលផ្ទះថ្មី ត្រូវខិតខំប្រឹងប្រែងរស់នៅក្នុងសង្គមដែលកំពុងរីកចម្រើនមួយនេះជាពិសេស ត្រូវចេះសាមគ្គី ជួយគ្នាពេលមានធុរៈ។ ទេសរដ្ឋមន្រ្តី បានណែនាំឲ្យសមាគមអតីតយុទ្ធជនខេត្ត ចុះពិនិត្យរកមើលសមាជិក ដែលអត់ដី អត់ផ្ទះពិតប្រាកដ ដើម្បីគោរពស្នើសុំសម្តេចតេជោ ហ៊ុន សែន សាងសង់ ជូនបន្ថែមទៀត។
ក្នុងទឹកមុខប្រកបដោយក្តី សប្បាយរីករាយ អតីតយុទ្ធជនទាំអស់ដែលទើបទទួលបានផ្ទះថ្មី តាមរយៈ ទេសរដ្ឋមន្រ្តី គន់ គីម បានសម្ដែងការដឹងគុណយ៉ាងជ្រាលជ្រៅ បំផុតចំពោះ សម្តេចតេជោ ហ៊ុន សែន ដែលជានិច្ចកាលបានគិតគូរពីសុខទុក្ខរបស់ពួកគាត់ ទាំងជីវភាពរស់នៅទាំងសុខភាព ផ្តល់ផ្ទះផ្តល់ដីដល់ពួកគាត់ ដែលមានជីវភាពខ្វះខាត។
លើសពីនេះ បានផ្តល់ប័ណ្ណ ប.ស .ស សម្រាប់ព្យាបាលជំងឺនៅតាមមន្ទីរពេទ្យដោយមិនអស់ប្រាក់ ពួកគាត់បួងសួងជូនពរឲ្យសម្តេចទាំងពីរ ព្រមទាំងក្រុមគ្រួសារ បានសុខសប្បាយ សុខភាពរឹងមាំ ជាពិសេសក្នុងឱកាសឆ្នាំថ្មីប្រពៃណីជាតិខ្មែរខាងមុខនេះ សូមសម្តេចទាំងពី ជួបតែពុទ្ធពរទាំងបួនប្រការ គឺអាយុ វណ្ណៈសុខៈ ពលៈកុំបីឃ្លៀងឃ្លាតឡើយ និងបន្តដឹកនាំប្រទេសកម្ពុជាជារៀងរហូត។
នៅក្នុងឱកាសនោះ ក្នុងនាមសម្តេច តេជោ ហ៊ុន សែន, លោកឧកញ៉ា វិញ ហួរ បាន ឧបត្ថម្ភ ជូនបងប្អូន ដែលទទួលបានផ្ទះ ទាំង២០គ្រួសារ ក្នុងមួយគ្រួសារ ២០ម៉ឺនរៀល , អង្ករ១០០គីឡូក្រាម គ្រឿងឧបភោគ និងសម្ភារប្រើប្រាស់ជាច្រើនមុខទៀត ព្រមទាំងបាន ឧបត្ថម្ភបងប្អូន អតីតយុទ្ធជន ដែលមកចូលរួមក្នុងពិធីនេះ១០០នាក់ ក្នុងម្នាក់ៗ៥ម៉ឺនរៀល៕
