(សៀមរាប)៖ នៅថ្ងៃចន្ទ ៥រោច ខែផល្គុន ឆ្នាំច សំរឹទ្ធស័ក ព.ស.២៥៦២ ត្រូវនឹងថ្ងៃទី២៥ ខែមីនា ឆ្នាំ២០១៩ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យក្រុមការងារ ចុះសួរសុខទុក្ខ និងនាំយកអំណោយផ្តល់ជូនដល់កុមារាឈ្មោះ តែម មឿត អាយុ ១០ឆ្នាំ រងគ្រោះរលាកភ្លេីងពេញខ្លួនដោយសារជនអគតិចាក់សាំងដុត (ដោយចោទថា លួចលុយ ១ម៉ឺនរៀល) កាលពីថ្ងៃទី ២២ ខែមីនា ឆ្នាំ២០១៩ កន្លងទៅនេះ។
កុមារារងគ្រោះរូបនោះ បច្ចុប្បន្នរស់នៅជាមួយឪពុក និងម្តាយមីង ស្ថិតនៅភូមិគោកក្នាំង ឃុំរើល ស្រុកពួក ខេត្តសៀមរាប ពេលនេះកំពុងសម្រាកព្យាបាលនៅមន្ទីរពេទ្យគន្ធបុប្ផាអង្គរខេត្តសៀមរាប។
បន្ទាប់ពីបានចុះសួរសុខទុក្ខ និងផ្តល់អំណោយជូនដល់កុមារារងគ្រោះខាងលេីនេះរួចមក ក្រុមការងារកាកបាទក្រហមកម្ពុជា ដែលមានលោកវេជ្ជ. អ៊ុយ សំអាត នាយកនាយកដ្ឋានគ្រប់គ្រងគ្រោះមហន្តរាយ និងលោកស្រី ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ព្រមទាំងសហការី បានទៅចូលរួមរំលែកទុក្ខជាមួយក្រុមគ្រួសារសព លោក ហ៊ឹម ចាន់ អាយុ ៤១ឆ្នាំ មុខរបររត់តាក់សុី (មានប្រពន្ធឈ្មោះ សុខ ចាន់រឿន អាយុ ៣៨ឆ្នាំ និងកូនក្នុងបន្ទុកចំនួន ៤នាក់) ដែលត្រូវបានក្រុមចោរប្លន់អារកសម្លាប់យករថយន្ត កាលពីថ្ងៃទី១៧ ខែមីនា ឆ្នាំ២០១៩ នៅភូមិបឹងប៉ា សង្កាត់ស្លរក្រាម ក្រុងសៀមរាប ខេត្តសៀមរាប។
ក្រុមគ្រួសាររងគ្រោះទាំង ២ករណីខាងលេីនេះ បានសំដែងក្តីរំភើប និងដឹងគុណយ៉ាងជ្រាលជ្រៅបំផុតចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានគិតគូរ ជួយឧបត្ថម្ភសម្រាលការលំបាក និងផ្ដល់ការលើកទឹកចិត្តដល់ប្រជាពលរដ្ឋរងគ្រោះដោយគ្មានការរើសអើងអ្វីឡើយ។
សូមបញ្ជាក់ថា សម្ភារដែលផ្ដល់ជូនសម្រាប់ក្រុមគ្រួសារកុមាររងរបួសរួមមាន ៖ អង្ករ ៣០គីឡូក្រាម ត្រីខ ១០កំប៉ុង មី ១កេស ឃីត១មាន (មុង ភួយ ក្រមា សារុង អាវយឺត) និងថវិកាមួយចំនួន។
ដោយឡែក សម្ភារចូលបុណ្យសពជនរងគ្រោះរួមមាន ៖ អង្ករ ១០០គីឡូក្រាម ត្រីខ ៥០កំប៉ុង មី ៥កេស ទឹកក្រូច ៥កេស និងបច្ច័យចូលបុណ្យមួយចំនួន៕
