(ភ្នំពេញ)៖ លោក វង សូត រដ្ឋមន្ត្រីក្រសួងសង្គមកិច្ច​ អតីតយុទ្ធជន និងយុវនីតិសម្បទា បានសម្តែងការអបអរសាទរកីឡាករពិការខ្សោយសតិបញ្ញា ដែលទទួលបានមេដាយលំដាប់ថ្នាក់ពិភពលោក ក្នុងការប្រកួតកីឡាជើងឯកពិភពលោក «Special Olympic World Games ABU DHABI 2019» នៅទីក្រុងឌូប៉ៃ ប្រទេសអារ៉ាប់រួម ថ្ងៃទី ១៤-២១ ខែមីនា ឆ្នាំ២០១៩។

បើតាមលោក ឯម ច័ន្ទមករា អគ្គលេខាធិការក្រុមប្រឹក្សាជ​នពិការកម្ពុជា បានថ្លែងប្រាប់អង្គភាពព័ត៌មាន​ Fresh News ឲ្យដឹងថា «លោក វង សូត រដ្ឋមន្ត្រីក្រសួងសង្គមកិច្ច​ អតីតយុទ្ធជន និងយុវនីតិសម្បទា ពិតជាសេចក្តីរំភើបរីករាយ និងអបអរសាទរយ៉ាងខ្លាំងបំផុត ក្រោយទទួលបានដំ​ណឹងថា ក្រុមកីឡាករកម្ពុជា ទទួលបានមេដាយជាច្រើននៅក្នុងព្រឹត្តិការណ៍ប្រកួតកីឡាជើងឯកពិភពលោក »​។

លោក ឯម ច័ន្ទមករា បានបន្ថែមថា អ្វីដែលពិសេសនោះ គឺក្រុមកីឡាករខ្សោយសតិបញ្ញាកម្ពុជាចំនួន១០រូប បានទទួលមេដាយសរុប ចំនួន១០គ្រឿង ក្នុងនោះ មាន​មេដាយមាស ចំនួន៣គ្រឿង មេដាយប្រាក់ ចំនួន៣គ្រឿង និងមេដាយសំរឹទ្ធ ចំនួន៤គ្រឿង សុទ្ធតែជាមេដាយលំដាប់ពិភពលោក។​

រដ្ឋមន្ត្រី វ​ង សូត បានចាត់តាំង លោក សែម ​សុខា រដ្ឋលេខាធិការក្រសួងសង្គមកិច្ច និងលោក ឯម ច័ន្ទមករា អគ្គលេខាធិការក្រុមប្រឹក្សាជ​នពិការកម្ពុជា ជាតំណាងរបស់រដ្ឋមន្រ្តីវ វង សូត អញ្ជើញទៅទទួលបដិសណ្ឋារកិច្ចប្រតិភូកីឡា នៅព្រលានយន្តហោះអន្តរជាតិភ្នំពេញ កាលពីរាត្រី ថ្ងៃទី២២ ខែ​មីនា ឆ្នាំ២០១៩។

ក្នុងទិដ្ឋភាពនៃការទទួលស្វាគមន៍ជ័យលាភី រប​ស់ក្រុមកីឡាករពិការខ្សោយសតិបញ្ញារបស់កម្ពុជា នាពេលនោះក៏មានចូលរួមអបអរសាទរ ពី​ប្រជាពលរដ្ឋ និងអ្នកគាំទ្រ ពីក្រុមគ្រួសារ អាណាព្យាបាល និងអ្នកសារព័ត៌មានក្នុងស្រុក និងក្រៅស្រុក យ៉ាងច្រើនកុះករ។

ជាមួយគ្នានោះ ក៏សង្កេតឃើញថា មានវត្តមាន ​លោកស្រី ហ៊ុន​ ស៊ីណាត ប្អូនស្រីបង្កើតរបស់ សម្តេច​តេជោ ហ៊ុន សែន នាយករដ្ឋមន្រ្តីនៃកម្ពុជា ក្នុងការចូលរួ​មលើកទឹកចិត្ត សម្តែងការសាទរ ជាមួយក្រុមកីឡាករពិការខ្សោយសតិបញ្ញារបស់កម្ពុជាផងដែរ។

យោងតាមអនុក្រឹត្យលេខ ១៤អនក្រ.បក ចុះថ្ងៃទី២៥ ខែមករា ឆ្នាំ២០១៩ ស្តីពីការផ្តល់ប្រាក់រង្វាន់ចំពោះជ័យលាភីជនពិការ ក្នុងការប្រកួតប្រជែងមុខជំនាញ ការប្រកួតកីឡាស្ប៉េស្យាល់អូឡាំពិក និងប្រាក់ឧបត្ថម្ភសម្រាប់គ្រូបង្វិក គ្រូបង្វិកជំនួយ គឺរាជរដ្ឋាភិបាលកម្ពុជាមានគោលការណ៍ឧបត្ថម្ភប្រាក់រង្វាន់សម្រាប់ជ័យលាភីទទួលបានមេដាយមាស មេដាយប្រាក់ និងមេដាយសំរឹទ្ធ ក្នុងការប្រកួតប្រជែងកីឡាស្ប៉េស្យាល់អូឡាំពិក លំដាប់ពិភពលោក រដូវក្តៅលើកនេះដូចខាងក្រោម៖

១-មេដាយមាស ក្នុង១គ្រឿង លំដាប់ពិភពលោក ចំនួន ៣០ ០០០ ០០០រៀល

២-មេដាយប្រាក់ ក្នុង១គ្រឿង លំដាប់ពិភពលោក ២០ ០០០ ០០០រៀល

៣-មេដាយសំរឹទ្ធ ក្នុង១គ្រឿង លំដាប់ពិភពលោក ១៦ ០០០ ០០០រៀល។

គួរបញ្ជាក់ផងដែលថា កាលពីថ្ងៃទី ១៤-២១ ខែមីនា ឆ្នាំ២០១៩ រាជរដ្ឋាភិបាលកម្ពុជា បានបញ្ជូនប្រតិភូកីឡាស្ប៉េស្យាល់អូឡាំពិក ចំនួន១៦រូប ក្នុងនោះមានប្រធានប្រតិភូ ដឹកនាំដោយឯកឧត្តម មាស សារិន និងគ្រូបង្វិកចំនួន២រូប គ្រូជំនួយ២រូប មន្ត្រីពេទ្យ រូប កីឡាករចំនួន៥រូប និងកីឡាការីនី៥រូប។ ប្រទេសដែលបានបញ្ជូនកីឡាករទៅចូលរួមប្រកួតមានចំនួន ១៩០ប្រទេស៕