(ភ្នំពេញ)៖ លោកស្រី ងួន សុខា នាយកប្រតិបត្តិមូលនិធិគន្ធបុប្ផាកម្ពុជា តំណាងអគ្គបណ្ឌិតសភាចារ្យ អូន ព័ន្ធមុនីរ័ត្ន ប្រធានក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា នៅថ្ងៃទី២២ ខែមីនានេះ បានទទួលប្រតិភូនៃសមាគមរោងចក្រកាត់ដេរនៅកម្ពុជា (GMAC) ដែលដឹកនាំដោយ លោកឧកញ៉ា វ៉ាន់ ស៊ូអៀង ប្រធានសមាគម ដែលបាននាំមកនូវមូលនិធិសប្បុរសសធម៌ ជាថវិកាចំនួន៥ម៉ឺនដុល្លារអាមេរិក មកប្រគល់ជូនមូលនិធិគន្ធបុប្ផាកម្ពុជា។ ថវិកានេះ បានមកពីការរៀបចំកម្មវិធីជួបជុំប្រចាំឆ្នាំលើកទី២៣ របស់សមាគមរោងចក្រកាត់ដេរនៅកម្ពុជា កាលពីថ្ងៃទី១៩ ខែមករា ឆ្នាំ២០១៩ ។

ក្នុងជំនួបនេះ លោកឧកញ៉ាប្រធានសមាគម បានសម្ដែងនូវសេចក្ដីសោមនស្សរីករាយ ក្នុងការនាំមកនូវវិភាគទានសប្បុរសធម៌ ដែលទទួលបានពីថ្នាក់ដឹកនាំ និងបុគ្គលិកគ្រប់លំដាប់ថ្នាក់ ព្រមទាំងរោងចក្រនានា ដែលបានចូលរួមក្នុងកម្មវិធីជួបជុំប្រចាំឆ្នាំលើកទី២៣នេះ។
លោកឧកញ៉ាប្រធានសមាគមបានលើកឡើងថា ការចូលរួមវិភាគទាននេះ គឺដើម្បីរួមចំណែកតាមរយៈមូលនិធិគន្ធបុប្ផាកម្ពុជា ដែលមានបេសកកម្មក្នុងការស្វែងរកមូលនិធិ សម្រាប់ទ្រទ្រង់ដល់កិច្ចដំណើរការរបស់មន្ទីរពេទ្យគន្ធបុប្ផាទាំងប្រាំទីតាំង នៅក្នុងព្រះរាជាណាចក្រកម្ពុជា។

ជាការឆ្លើយតបទៅនឹងទឹកចិត្តសប្បុរសធម៌ និងរួមចំណែកដ៏ថ្លៃថ្លានេះ លោកស្រី ងួន សុខា បានថ្លែងអំណរគុណយ៉ាងជ្រាលជ្រៅដល់គណៈប្រតិភូ ដែលបានឆ្លៀតពេលវេលាដ៏មមាញឹកមកផ្តល់វិភាគទាននេះ និងក៏បានថ្លែងអំណរគុណយ៉ាងជ្រាលជ្រៅ ជូនចំពោះថ្នាក់ដឹកនាំ និងបុគ្គលិកនៃបណ្តារោងចក្រកាត់ដេរទាំងអស់ ដែលបានចូលរួមកម្មវិធីជួបជុំ និងបានបរិច្ចាគថវិកាជូនមូលនិធិគន្ធបុប្ផាកម្ពុជា។

លោកស្រីក៏បានបន្តលើកទឹកចិត្តដល់ GMAC ឱ្យជួយបន្តផ្សព្វផ្សាយ និងបំផុសចលនាបរិច្ចាគជូនមូលនិធិគន្ធបុប្ផាកម្ពុជា និងស្នើឱ្យបន្តកិច្ចសហការ និងការចូលរួមនេះ ឱ្យបានកាន់តែទូលំទូលាយបន្ថែមទៀត ទៅតាមគ្រប់រូបភាពដែលអាចធ្វើទៅបាន ដើម្បីរួមចំណែកបន្តនិរន្តរភាពនៃកិច្ចដំណើរការរបស់មន្ទីពេទ្យគន្ធបុប្ផា ក្នុងការទទួលពិនិត្យ ពិគ្រោះ និងព្យាបាលកុមារកម្ពុជាប្រកបដោយគុណភាព និងឥតគិតថ្លៃ។

លោកឧកញ៉ាប្រធាន GMAC បានសន្យានឹងនាំមកនូវថវិកាបរិច្ចាគបន្ថែមទៀត និងពិនិត្យលទ្ធភាពនៃកិច្ចសហការនានានៅក្នុងពេលអនាគត ដើម្បីរួមគ្នានាំភាពញញឹមជូនកុមារ ដែលជាអនាគតដ៏ភ្លឺស្វាងរបស់កម្ពុជា៕