(ភ្នំពេញ)៖ បុរសម្នាក់បានបើករថយន្ត MAZDA ស្លាកលេខ ខ.ម យ៉ាងលឿនទៅបុកជាមួយរថយន្តកុងតឺន័រចំពីមុខ បណ្ដាលឲ្យក្រឡាប់រថយន្ត រងការខូចខាតយ៉ាងដំណំ តែសំណាងល្អហេតុការណ៍នេះ មិនបណ្ដាលឲ្យមានអ្នករងគ្រោះនោះទេ។
ហេតុការណ៍នេះបានកើតឡើង នៅវេលាម៉ោងជាង១២យប់រំលងអាធ្រាត្រ ឈានចូលថ្ងៃទី២០ ខែមីនា ឆ្នាំ២០១៩ ដែលមានទីតាំងស្ថិតនៅតាមបណ្ដោយផ្លូវ៦០ម៉ែត្រ ស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
ប្រភពព័ត៌មានពីប្រជាពលរដ្ឋ ដែលបានឃើញហេតុការណ៍បានប្រាប់ភ្នាក់ងារព័ត៌មាន Fresh News ឲ្យដឹងថា នៅមុនពេលកើតហេតុ គេឃើញបុរសម្នាក់ទំនងងងុយដេក បើករថយន្តមួយគ្រឿងម៉ាក MAZDA BT-50PRO ពណ៌ត្រេអ៉ី ពណ៌ស្លាកលេខខេមរភូមិន្ទ 02 2-9863 ទិសដៅពីត្បូងទៅជើង លុះមកដល់ចំណុចកើតហេតុស្រាប់ តែរថយន្ត MAZDA បានរេចង្កូតងាកទៅឆ្វេងដៃក៏ជ្រុលទៅបុកចំពីមុខរថយន្តកុងតឺន័រមួយគ្រឿង ពណ៌ស ពាក់ស្លាកស្វាយរៀង 3B-0567 ចំពេញមួយទំហឹងបណ្ដាលឲ្យក្រឡាប់រថយន្ត MAZDA មួយត្រឡប់បណ្ដាលឲ្យរថយន្ដទាំងពីរ រងការខូចខាតយ៉ាងដំណំ។
ក្រោយពេលកើតហេតុរថយន្តទាំងពីរ ត្រូវបានសមត្ថកិច្ចជំនាញធ្វើការស្ទូចយកទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់ចូលខ្លួនមកដោះស្រាយ ទៅតាមផ្លូវច្បាប់នៅពេលក្រោយ៕
