(ភ្នំពេញ)៖ បុរសម្នាក់បើករថយន្ត LEXUS 470 លឿនទៅបុករបាំងថ្មពុះចែកទ្រូងផ្លូវ បណ្ដាលឲ្យដាច់កង់រថយន្តម្ខាង ហើយរត់ពីមុខស្ថានទូតវៀតណាម រហូតដល់វិទ្យាល័យបឹងត្របែក ទើបរថយន្តទៅមុខលែងរួច។ ហេតុការណ៍នេះ បានកើតឡើងនៅវេលាម៉ោងជាង៩យប់ ថ្ងៃទី១៩ ខែមីនា ឆ្នាំ២០១៩ ស្ថិតនៅតាមបណ្ដោយផ្លូវព្រះមុនីវង្ស ចំណុចមុខស្ថានទូតវៀតណាម ស្ថិតក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។
ប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញបុរសម្នាក់បើករថយន្តមួយគ្រឿងម៉ាក LEXUS LX470 ពណ៌សពាក់ស្លាកលេខ ភ្នំពេញ 2S-9668 ធ្វើដំណើរតាមបណ្ដោយផ្លូវព្រះមុនីវង្ស ទិសដៅពីជើងទៅត្បូង លុះមកដល់ចំណុចមុខស្ថានទូតវៀតណាម ដោយរថយន្តបើកក្នុងល្បឿនលឿន ក៏ជ្រុលទៅបុករបាំងថ្មពុះចែកទ្រូងផ្លូវ ចំពេញមួយទំហឹងបណ្ដាលឲ្យរលំចំនួន២ផ្ទាំង រងការខូចខាតយ៉ាងដំណំ។
ចំណែកឯរថយន្តបង្កវិញដាច់កង់ម្ខាងហើយមិនបានឈប់នៅកន្លែងកើតហេតុទេ ថែមទាំងបើករត់តាំងពីស្ថានទូតវៀតណាមរហូតដល់ចំណុចមុខវិទ្យាល័យបឹងត្របែក បណ្ដាលឲ្យរថយន្ដទៅមុខលែងរួច។ ភ្លាមៗនោះបុរសដែលជាអ្នកបើកបរបានបើកទ្វារ រថយន្តរត់គេចខ្លួនបាត់ស្រមោលតែម្តង។
ក្រោយពេលកើតហេតុសមត្ថកិច្ចមូលដ្ឋាន បានចុះមកដល់រួចធ្វើការទាក់ទង ទៅសមត្ថកិច្ចជំនាញ ដើម្បីមកធ្វើការវាស់វែងយករថយន្តបង្កខាងលើយកទៅរក្សាទុកនៅការិយាល័យចរាចរណ៍ផ្លូវគោក រាជធានីភ្នំពេញ ដើម្បីរង់ចាំដោះស្រាយគ្នាទៅតាមផ្លូវច្បាប់នៅពេលក្រោយ៕
