(ភ្នំពេញ)៖ ម្ចាស់គ្លីនិក «​សួគ៌ា» នៅថ្ងៃទី១៨ ខែមីនា ឆ្នាំ២០១៩នេះ បានចេញមុខជាសាធារណៈ ឆ្លើយតបទៅនឹងការរិះគន់ នៅលើបណ្ដាញសង្គម Facebook តាមប្រព័ន្ធផ្សព្វផ្សាយមួយចំនួនតូច ដែលបានចុះផ្សាយ ចោទថា គ្លីនិក «សួគ៌ា» ព្យាបាលយកតម្លៃថ្លៃ។

បើតាមសម្តីអ្នកគ្រប់គ្រងគ្លីនិក «​សួគ៌ា» ​បានឲ្យដឹងថា តម្លៃសេវា​ដែលអតិថិជនចូលមកពិគ្រោះ និងព្យាបាល គឺមានតម្លៃសមរម្យ មិនថ្លៃដូចការលើកឡើង​នោះឡើយ ហើយកាលពីពេលថ្មីៗនេះ ក្រុមការងារ នៃមន្ទីរសុខាភិបាល បានចុះមកពិនិត្យ​រកមិនឃើញ និងមិនមានការលើកឡើងរបស់អតិថិជនថា ការព្យាបាលយកសេវាថ្លៃនោះទេ។

គ្រប់គ្រងគ្លីនិក រូបនេះ បានបញ្ជាក់ទៀតថា ក្នុងនោះផងដែរ ក្រុមការងារមន្ទីរសុខាភិបាល ក៏ដូចជា​មន្ត្រីជំនាញ បានឲ្យម្ចាស់ទីតាំងធ្វើតារាងបញ្ជាក់តម្លៃឲ្យបានធំ សម្រាប់ឲ្យអតិថិជន​មើលឃើញច្បាស់ និងដាក់តាំង​តារាងនេះ នៅកន្លែងទទួលភ្ញៀវផងដែរ។

បើតាមម្ចាស់គ្លីនិក «សួគ៌ា» បានលើកឡើងទៀតថា បើនិយាយពីបរិស្ថានក្នុងគ្លីនិកគឺល្អ មានបន្ទប់ធំទូលាយបន្ទប់សង្គ្រោះ ហើយក្រុមគ្រូពេទ្យមានវិជ្ជាជីវៈត្រឹមត្រូវ និងមានការរាក់ទាក់ជាមួយអថិតិជន ដែលបានចូលមកពិនិត្យព្យាបាល ក្នុងគ្លីនិកនេះផងដែរ។

សូមបញ្ជាក់ថា ទីតាំងយីហោគ្លីនិក សួគ៌ា ជាកន្លែងពិគ្រោះ និងព្យាបាលដល់ប្រជាពលរដ្ឋទូទៅ​ និងគឺជាទីកន្លែងដែលទុកចិត្ត ​របស់អតិថិជន ក្នុងការព្យាបាល និងពិគ្រោះយោបល់ ដែលធ្វើឲ្យប្រជាពលរដ្ឋផ្តល់ទំនុកចិត្ត លើក្រុមគ្រូពេទ្យ​ ដែលមានជំនាញច្បាស់លាស់។ ទីតាំងគ្លីនិកសួគ៌ា មានអសយដ្ឋានផ្ទះលេខ​២៤០ ផ្លូវលេខ២១៧ (ចម្ការដូង) ស្ថិតនៅភូមិឫស្សីទី២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ៕