(ព្រៃវែង)៖ នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ នៅព្រឹកថ្ងៃទី១៦ ខែមីនា ឆ្នាំ២០១៩នេះ បានអញ្ជើញជាអធិបតីភាពក្នុងពិធីបុណ្យផ្ការស្មីសាមគ្គី ដើម្បីប្រមូលបច្ច័យយកទៅកសាងរបងវត្តពោធិ៍អណ្តែត ហៅវត្តទួលតាណាល ស្ថិតនៅភូមិត្រពាំងជ្រើស ឃុំព្រៃស្នៀត ស្រុកពារាំង ខេត្តព្រៃវែង។
ក្នុងឱកាសនោះ នាយឧត្តមសេនីយ៍ វង្ស ពិសេន ក៏បានមានមតិសំណេះសំណាល និងសាកសួរសុខទុក្ខបងប្អូនប្រជាពលរដ្ឋ និងលោកយាយ លោកតាផងដែរ។ នាយឧត្តមសេនីយ៍ថា បើគ្មានសន្តិភាពទេ ក៏គ្មានការអភិវឌ្ឍដូចពេលបច្ចុប្បន្ននេះដែរ។
នាយឧត្តមសេនីយ៍ វង្ស ពិសេន បន្តថា ក្នុងរបប ប៉ុល ពត ៣ឆ្នាំ ៨ខែ ២០ថ្ងៃ ជំនឿសាសនាទាំងអស់ ពិសេសព្រះពុទ្ធសាសនា ត្រូវបានបំផ្លិចបំផ្លាញខ្ទេចខ្ទាំគ្មានសល់ វត្តអារាម ព្រះវិហារ ត្រូវបានប្រែក្លាយជាឃ្លាំង ជារោងបាយ កន្លែងចិញ្ចឹមសត្វ។ ក្នងដំណាក់កាលនោះហើយ គឺមានតែគណបក្សប្រជាជនកម្ពុជា ដែលហ៊ានក្រោកឈរឡើងតស៊ូ និងបូជាអ្វីៗគ្រប់បែបយ៉ាង ដើម្បីរំដោះប្រទេសឱ្យរួចផុតពីរបបខ្មៅងងឹត។
លោកបានបន្ថែមថា ក្រោយថ្ងៃរំដោះ ៧មករា ឆ្នាំ១៩៧៩ ប្រជាជនកម្ពុជា បានវិលត្រឡប់មករួមរស់ជាមួយក្រុមគ្រួសារឡើងវិញ ប្រកបដោយសេចក្តីសោមនស្សរីករាយគ្រប់គ្នា។ លោកក៏បានផ្តាំផ្ញើឲ្យប្រជាពលរដ្ឋទាំងរួមគ្នាការពារសន្តិភាព ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជាផងដែរ ដើម្បីឲ្យប្រទេសជាតិកាន់តែមានការអភិវឌ្ឍកាន់តែខ្លាំង។
នៅក្នុងពិធីនោះដែរ នាយឧត្តមសេនីយ៍ វង្ស ពិសេន បានប្រគេនព្រះសង្ឃ៧អង្គ មានថវិកា៣០លានរៀលសម្រាប់កសាងរបងវត្ត ក្នុងនោះប្រគេនស្លាដក់ និងថវិកា១អង្គចំនួន ១០ម៉ឺនរៀល។ តាជីយាយជី១២០នាក់ ម្នាក់ៗទទួលបានក្រណាត់ស១ដុំ។
ក្រុមកាកបាទក្រហម៥០នាក់ ម្នាក់ៗទទួលបានថវិកា១ម៉ឺនរៀល ក្រុមសហភាពសហព័ន្ធយុវជនកម្ពុជា៥០នាក់ ម្នាក់ៗទទួលបានថវិកា ១ម៉ឺនរៀល ក្រុមកាយរិទ្ធ៥០នាក់ ម្នាក់ៗទទួលបានថវិកា ១ម៉ឺនរៀល មន្រ្តីស្រុក ក្រុមប្រឹក្សាឃុំ មេភូមិ អនុភូមិ សាខា ប៉ុស្តិរដ្ឋបាល ពេទ្យ គ្រូបង្រៀន ប្រជាពលរដ្ឋសរុប ៧២៣នាក់ ម្នាក់ទទួលបានសារុង០១ សិស្សានុសិស្ស ៣៥៧នាក់ ម្នាក់ៗទទួលបាន សៀវភៅ ប៊ិច និងថវិកា២ពាន់រៀល៕
