(ភ្នំពេញ)៖ ជាថ្មីម្តងទៀត ប្រមុខនៃរាជរដ្ឋាភិបាលកម្ពុជា សម្តេចតេជោ ហ៊ុន សែន បានមានប្រសាសន៍ បន្តអំពាវនាវជាថ្មីម្តងទៀតដល់ប្រជាពលខ្មែរ ទាំងអស់ឱ្យចូលរួមធ្វើជំរឿនឱ្យបានគ្រប់ៗគ្នា ហើយការធ្វើជំរឿននេះវាមានសារៈសំខាន់ខ្លាំងណាស់សម្រាប់ការអភិវឌ្ឍប្រទេសជាតិ។

ការបន្តមានប្រសាសន៍អំពាវនាវជាថ្មីរបស់សម្តេចតេជោ ហ៊ុន សែន បានធ្វើឡើងនៅព្រឹកថ្ងៃទី១១ ខែមីនា ឆ្នាំ២០១៩នេះ នៅក្នុងឱកាសដែលសម្តេចបានអញ្ជើញជាអធិបតីភាព ពិធីប្រគល់សញ្ញាបត្រជូន និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULES) ជាង៣ពាន់នាក់ ដែលបានបញ្ចប់ការសិក្សាដោយជោគជ័យ ដែលប្រព្រឹត្តឡើងនៅមជ្ឈមណ្ឌលពិព័រណ៍ និងសន្និបាតកោះពេជ្យ។

នាយករដ្ឋមន្ត្រីនៃកម្ពុជា សម្តេចតេជោ បានមានប្រសាសន៍យ៉ាងដូច្នេះថា៖ «ខ្ញុំព្រះករុណាខ្ញុំ ក្នុងនាមរាជរដ្ឋាភិបាល អំពាវនាវចំពោះប្រជាជនទាំងអស់ ដែលមិនទាន់បានធ្វើជំរឿន បន្តការខិតខំចូលធ្វើជំរឿន ដែលមកដល់ថ្ងៃនេះ គឺនៅសល់តែ៣ថ្ងៃទាំងថ្ងៃនេះ អញ្ចឹងបន្តការចូលធ្វើជំរឿន អ្នកដែលមិនទាន់បានចូលធ្វើជំរឿន ត្រូវផ្តល់កិច្ចសហការ ព្រមពេលវេលាវាជិតដល់ហើយ»។

សម្តេចតេជោ ហ៊ុន សែន បានមានប្រសាសន៍បន្តថា ការធ្វើជំរឿន គឺជាការចាំបាច់ ដើម្បីយើងមានទិន្នន័យគ្រប់គ្រាន់ សម្រាប់ដាក់ចេញជាចក្ខុវិស័យទៅអនាគត ព្រមទាំងងាយស្រួលដល់ការអភិវឌ្ឍ ប្រទេសជាតិរបស់យើងផងដែរ។ ដូច្នេះសូមបងប្អូនប្រជាពលរដ្ឋខ្មែរទាំងអស់ដែលមិនទាន់បាន ធ្វើជំរឿនខិតខំបង្កលក្ខណៈសម្បតិ្តឱ្យមន្ត្រីជំរឿនរបស់យើងបានចូល ទៅកាន់លំនៅដ្ឋានរបស់ខ្លួន ដើម្បីស្រង់ស្ថិតិធ្វើជំរឿនតាមនីតិវិធី នៃការធ្វើជំរឿនផងដែរ។

ប្រមុខនៃរាជរដ្ឋាភិបាលកម្ពុជា បានមានប្រសាសន៍បញ្ជាក់ថា ការធ្វើជំរឿន គឺចង់បញ្ជាក់ឱ្យច្បាស់ថាតើប្រទេសកម្ពុជារបស់យើង មានប្រជាជន ប៉ុន្មាននាក់ ឱ្យច្បាស់ពិតប្រាកដ។ ដោយសព្វថ្ងៃនេះ គឺយើងបានប្រើប្រាស់ជើងលេខដែលបានមកពីមួយផ្នែកក្រសួងមហាផ្ទៃ ពីមន្ត្រីអត្រានុកូលដ្ឋាន ហើយមួយផ្នែកយើងបានមកពីវិទ្យាស្ថានស្ថិតិ របស់ក្រសួងផែនការ មួយផ្នែកយើងបានមកពីមន្ទីរពេទ្យ ក្រសួងសុខាភិបាល អំពីអត្រាកំណើតដែល បានផ្តល់ក្នុងមួយឆ្នាំៗមានទារចាប់កំណើត ដែលតួលេខទាំងនោះមិនខុសឆ្ងាយប៉ុន្មានោះទេ ហើយនៅពេលខាងមុខនេះ រាជរដ្ឋាភិបាលនឹងដាក់ ឱ្យអនុវត្តគោលនយោបាយគាំពារសង្គមសម្រាប់ស្ត្រីមានផ្ទៃពោះ ព្រមទាំងឆ្លងទន្លេផងដែរ។

សម្តេចតេជោ ហ៊ុន សែន បានមានប្រសាសន៍បញ្ជាក់បន្ថែមទៀតថា ការធ្វើជំរឿនប្រជាជនកម្ពុជានេះនឹងអាចឱ្យយើងបានទិន្នន័យ ប្រជាសាស្ត្រពិតប្រាកដរបស់ប្រទេស និងជួយឲ្យរដ្ឋាភិបាលអាចរៀបចំតាក់តែង គោលនយោបាយបានត្រឹមត្រូវ ព្រមទាំងការអនុវត្តកម្មវិធីផ្សេងៗ ឱ្យទទួលបានតុល្យភាព នៃការអភិវឌ្ឍសម្រាប់ប្រជាពលរដ្ឋទូទាំងប្រទេស។ ជំរឿនប្រជាជ​ន គឺជាប្រភពតែមួយគត់ ដែលអាចផ្តល់ទិន្នន័យ ពេញលេញអំពីចំនួនប្រជាជន និងចរិតលក្ខណៈប្រជាជន នៅក្នុងប្រទេស។​ ជំរឿនប្រជាជន គឺអនុវត្តលើវិសាលភាពពេញផ្ទៃប្រទេស ដែលអាចផ្តល់ព័ត៌មានអំពីប្រជាជន ក្នុងមូលដ្ឋាន​រហូតដល់មូលដ្ឋានថ្នាក់ទាបបំផុត ដែលជាតម្រូវការមិនអាចមានប្រភពទិន្នន័យណាមកជំនួសបាន។

សូមជម្រាបថា ប្រទេសកម្ពុជា ធ្លាប់ធ្វើជំរឿន៤លើករួចមកហើយ គឺនៅឆ្នាំ១៩២១, ឆ្នាំ១៩៦២ ឆ្នាំ១៩៩៨ និងឆ្នាំ២០០៨។ ប៉ុន្តែនៅឆ្នាំ១៩២១ ​ធ្វើឡើងដោយអាណាព្យបាលបារាំង មិនមែនជាការធ្វើជំរឿនដោយពិតប្រាកដឡើយ ពីព្រោះគោលបំណងជាចម្បងគឺចង់ដឹងអំពីចំនួនមនុស្សចាប់ពី អាយុ២០ឆ្នាំ ដល់៦០ឆ្នាំប៉ុណ្ណោះ ដើម្បីប្រមូលពន្ធដារ៕