(ភ្នំពេញ)៖ សមាគមរោងចក្រកាត់ដេរនៅកម្ពុជា (GMAC) នៅថ្ងៃទី១០ ខែមីនា ឆ្នាំ២០១៩នេះ បានចេញមកពន្យល់អំពីទិដ្ឋភាពផ្លូវច្បាប់ ជុំវិញករណីវិវាទការងារ នៅ​រោងចក្រ W&D ជាមួយកម្មករដែលទាមទារឲ្យរោងចក្រទូទាត់ប្រាក់បំណាច់អតីតភាពការងារ​ជាកញ្ចប់ នៅក្នុងពេលតែ​មួយ និងឈានដល់ការបញ្ឈប់កម្មករផងដែរ។

សមាគមរោងចក្រកាត់ដេរនៅកម្ពុជា បានអះអាង និងបង្ហាញភស្ដុតាងថា ការបញ្ឈប់កម្មករដែលមិនចូលធ្វើការ នៅរោងចក្រ W&D គឺជារឿងត្រឹមត្រូវតាមផ្លូវច្បាប់ ក្រោមហេតុផលថាកម្មករបានប្រព្រឹត្តកំហុសធ្ងន់ធ្ងរ មិនអនុវត្តតាមដីកាសម្រេចចាត់ចែងបណ្ដោះអាសន្ន ចុះថ្ងៃទី០២ ខែមករា ឆ្នាំ២០១៩។

ការចេញមកបញ្ជាក់របស់ សមាគមរោងចក្រកាត់ដេរនៅកម្ពុជា បានធ្វើឡើងក្នុងសន្និសីទសារព័ត៌មានមួយ នៅព្រឹកថ្ងៃទី១០ ខែមីនា ឆ្នាំ២០១៩នេះ ស្ដីពីវិវាទការងារនៅរោងចក្រ W&D (Cambodia) Co.,Ltd.។ សន្និសីទនេះ ​មានការចូលរួមពីលោកខេន លូ អគ្គលេខាធិការ GMAC លោក កាំង ម៉ូនីកា អគ្គលេខាធិការរង GMAC និងលោក ជីមី ​នាយកគ្រប់គ្រងទូទៅរោងចក្រ W&D និងអ្នកពាក់ព័ន្ធជាច្រើនរូបទៀតផងដែរ។

លោក កាំង ម៉ូនីកា បានបញ្ជាក់យ៉ាងដូច្នេះថា «​ជាការពិត ការបញ្ឈប់កម្មករនិយោជិតដែលមិនចូលធ្វើការ គឺធ្វើតាមនីតិវិធីត្រឹមត្រូវ៖

*​​​នីតិវិធី នៃក្រុមប្រឹក្សាអាជ្ញាកណ្តាល៖ កម្មករដែលបានធ្វើកូដកម្មខុសនីតិវិធីនោះ មិនព្រមចូលធ្វើការ តាមសេចក្តីបញ្ហារបស់ក្រុមប្រឹក្សាអាជ្ញាកណ្តាល ដែលឈានដល់ការស្នើសុំដីការក្សាការពារពីតុលាការ។

*នីតិវិធីតុលាការ ក្រោយពីទទួលបានដីកា រក្សាការពារពីតុលាការ កម្មករនិយោជិតនៅតែបន្តកូដកម្ម​មិនព្រមចូលធ្វើការ ដែលការប្រព្រឹត្តដូច្នេះត្រូវចាត់ទុកជាកំហុសធ្ងន់»។

គួរជម្រាបថា វិវាទការងារនៅរោងចក្រ W & D (Cambodia) Co., Ltd. បានកើតឡើងតាំងពីថ្ងៃទី២៤ ខែធ្នូ ឆ្នាំ២០១៨ រហូតដល់បច្ចុប្បន្ន ដែលកម្មករនិយោជិតចំនួន​១៧២៩​នាក់ បាននាំគ្នា​ធ្វើកូដកម្ម ដើម្បីទាមទារឲ្យរោងចក្រទូទាត់ប្រាក់បំណាច់អតីតភាពការងារ មុនឆ្នាំ២០១៩ ជាកញ្ចប់នៅក្នុងពេលតែ​មួយ និងគណនាប្រាក់បំណាច់អតីតភាពការងារមុនឆ្នាំ២០១៩ ឲ្យដូចនឹងឆ្នាំ២០១៩។

ក្នុងករណីវិវាទនេះ ខាងរោងចក្រ ក៏ដូចជាកម្មករ បានដោះស្រាយ និងព្យាយាមសម្របសម្រួលគ្នាជាបន្ដបន្ទាប់ទៅតាមនីតិវិធីដែលកំណត់ដោយច្បាប់ នៅក្នុងប្រទេសកម្ពុជា។ រហូតដល់​ថ្ងៃទី៣១ ខែធ្នូ ឆ្នាំ២០១៨ សាលាដំបូងរាជធានីភ្នំពេញ បានចេញដីការក្សាការពារ ដោយសម្រេច​បង្គាប់ឲ្យកម្មករ ជាកូដករទាំងអស់​ចូលបម្រើការងារឲ្យបានទៀងទាត់ តាមវេន តាមក្រម តាមតួនាទី និងភារ​កិច្ចរៀងៗខ្លួន ក្នុងរយៈពេល៤៨ម៉ោង គិតចាប់ពីថ្ងៃចេញដីកាសម្រេចនេះ ដោយអនុវត្តឲ្យបានត្រឹមត្រូវ​តាមមាត្រា៣៣៧ នៃច្បាប់ស្តីពីការងារ។

នៅថ្ងៃទី០៤ ខែមករា ឆ្នាំ២០១៩ រោងចក្របានចេញសេចក្តីប្រកាសព័ត៌មាន ស្តីពីការបញ្ឈប់កម្មករចំនួន​១១០៤​នាក់ ដែលបានប្រព្រឹត្តកំហុសធ្ងន់ ដោយសារការមិនអនុវត្តតាមដីកាសម្រេចចាត់ចែងបណ្តោះ​អាសន្នចុះថ្ងៃទី០២ ខែមករា ឆ្នាំ២០១៩ ដែលនៅក្នុងសេចក្តីប្រកាសព័ត៌មាននោះ ក៏មានការជូនដំណឹងដល់កម្មករ ដែលត្រូវបានបញ្ឈប់ទាំងអស់ មកបើកប្រាក់ឈ្នួលចុងក្រោយនៅថ្ងៃទី០៨ ខែមករា ឆ្នាំ​២០១៩​ផងដែរ។

ដោយមានការសម្របសម្រួលពី មន្ត្រីក្រសួងការងារ និងបណ្តុះ​បណ្តាលវិជ្ជាជីវៈ ដែលបានស្នើឲ្យរោងចក្រមានការយោគយល់ទទួលកម្មករនិយោជិត ចូលធ្វើការវិញ​​ នៅថ្ងៃទី០៨ ខែមករា ឆ្នាំ២០១៩​រោងចក្រ​ក៏យល់ព្រមតាមសំណើនោះ ដោយប្រកាសបើកចំហ ហើយប្រជុំផ្សព្វផ្សាយដល់បងប្អូន កម្មករ​ដែលកំពុងធ្វើការ​ព្រមទាំងបិទប្រកាសជាសារធារណៈឲ្យកម្មករនិយោជិត ចូលធ្វើការជាធម្មតា លើកលែងតែកម្មករមួយចំនួនតូចដែលធ្វើការបិទផ្លូវ និងរារាំងកម្មករដទៃទៀត មិនឲ្យចូលធ្វើការប៉ុណ្ណោះ។

រហូតមកដល់បច្ចុប្បន្ននេះ រោងចក្រនៅតែប្រកាសស្វាគមន៍កម្មករទាំងអស់ ចូលមកធ្វើការវិញ លើកលែង​តែកម្មករមួយចំនួនតូច ដែលបិទផ្លូវសារធារណៈ និងបង្កការរារាំងកម្មករឯទៀតមិនឲ្យចូលធ្វើការ​ប៉ុណ្ណោះ ហើយឥឡូវនេះក្នុងចំណោមកម្មករនិយោជិតចំនួន១,៧២៩​នាក់ ដែលបានធ្វើកូដកម្មនោះ មាន​កម្មករនិយោជិត ចំនួន៨១៤នាក់ បានត្រឡប់ចូលធ្វើការវិញ។​

យ៉ាងណាក៏ដោយ សម្រាប់វិវាទការងារមួយនេះ លោក ជីមី នាយកគ្រប់គ្រងទូទៅរោងចក្រ W&D បានអះអាងថា ក្នុងរយៈពេល២ខែ ពោលខែមករា និងខែកុម្ភៈ ខាងភាគីរោងចក្រខាតបង់ទឹកប្រាក់ប្រមាណជាជិត២លានដុល្លារ ដោយបូកបញ្ចូលទាំងការយឺតយ៉ាវក្នុងការដឹកជញ្ជូន និងបាត់បង់អ្នកបញ្ជាទិញនៅក្រៅប្រទេស ចំនួន៣នាក់ ក្នុងចំណោមអ្នកបញ្ជាទឹកសរុប១០នាក់។

នាយកគ្រប់គ្រងរូបនេះ បានគូសបញ្ជាក់ថា រោងចក្រ W&D បានបើកដំណើរការនៅប្រទេសកម្ពុជា តាំងពីឆ្នាំ១៩៩៨ ពោលបានបោះទុនវិនិយោគនៅកម្ពុជា រយៈពេល២២ឆ្នាំមកហើយ ដោយចាប់ផ្ដើមពីកម្មករប្រមាណ៦០០នាក់ រហូតឡើងដល់ជាង១,៧០០នាក់ ហើយរោងចក្រតែងតែគោរព និងអនុវត្តត្រឹមត្រូវនៅតាមច្បាប់ការងារកម្ពុជា និងបទដ្ឋានអន្ដរជាតិនានាផងដែរ មិនដែលមានបញ្ហាអ្វីកើតឡើងនោះទេ ទើបតែពេលនេះប៉ុណ្ណោះ៕​