(ភ្នំពេញ)​៖ លោក ឌឹម សុវណ្ណារុំ សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប បានប្រាប់អង្គភាព ​Fresh News ឲ្យដឹងគិ​តត្រឹមថ្ងៃទី០៩ ខែមីនា ឆ្នាំ២០១៩នេះ ​រយៈពេលបីថ្ងៃ នៃការចុះបញ្ជីគណបក្សនយោបាយឈរឈ្មោះបោះឆ្នោត គឺមានគណបក្សនយោបាយកើនឡើងដល់៧ ដែលបានមកចុះបញ្ជី​ ដោយបន្ថែមគណបក្សសញ្ជាតិកម្ពុជាមួយទៀត។

​លោក ឌឹម សុវណ្ណារុំ បានបញ្ជាក់បន្ថែមថា គណបក្សចំនួន៧ ដែលបានចុះបញ្ជីឈរឈ្មោះបោះឆ្នោតជ្រើសរើសក្រុមប្រឹក្សារាជធានី-ខេត្តនោះ រួមមាន៖ គណបក្សប្រជាជនកម្ពុជា គណបក្សហ្វ៊ុនស៊ុនប៉ិច គណបក្សយុវជនកម្ពុជា គណបក្សខ្មែរសាធារណរដ្ឋ គណបក្សឆន្ទៈខ្មែរ ​គណបក្សរួបរួមជាតិ និងគណបក្សសញ្ជាតិកម្ពុជា។

សូមជម្រាបថា គណៈកម្មាធិការជាតិរៀបចំការបោះឆ្នោត (គជប) បានចាប់ផ្តើមដំណើរការចុះឈ្មោះបោះឆ្នោត សម្រាប់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៣ នៅថ្ងៃទី៤ ខែមីនា ឆ្នាំ២០១៩។

ការចុះឈ្មោះបោះឆ្នោតនេះ មានរយៈ១៣ថ្ងៃ គឺចាប់ផ្តើមពីថ្ងៃទី០៤ ដល់ថ្ងៃទី១៥ ខែមីនា ឆ្នាំ២០១៩ (មានរយៈពេល១៣ថ្ងៃ ដោយមិនរាប់ថ្ងៃអាទិត្យ និងថ្ងៃបុណ្យផ្លូវការ)។ អ្នកបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សានេះ គឺជាសមាជិកក្រុមប្រឹក្សាឃុំ សង្កាត់នៅក្នុងមុខតំណែង ដែលមានសមាជិក សរុបចំនួន ១១,៥៧២នាក់ ទូទាំងប្រទេស៕