(ភ្នំពេញ)៖ នាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្ដោប្រវេសន៍ ក្រសួងមហាផ្ទៃ នៅថ្ងៃទី០៩ ខែមីនា ឆ្នាំ២០១៩នេះ បានបណ្ដេញជនជាតិបរទេស២០នាក់ ចេញពីប្រទេសកម្ពុជា និងដាក់ក្នុងបញ្ជីខ្មៅហាមចូលប្រទេសកម្ពុជារយៈពេល៣ឆ្នាំ​ ក្រោយចាប់ខ្លួនពាក់ព័ន្ធជាមួយអំពើល្មើសច្បាប់។

លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានប្រាប់អង្គភាព Fresh News ឲ្យដឹងថា ​ជនជាតិ​​បរទេសដែលត្រូវបណ្ដេញចេញ ទាំង​​២០នាក់នោះ មាន​ស្រី​១៤នាក់ រួមមាន៖

*ទី១៖ ជនជាតិចិន​ចំនួន​១៣នាក់ ស្រី​១២នាក់ ពាក់ព័ន្ធករណីប្រកបរបររកស៊ីម៉ាស្សា ដោយខុសច្បាប់នៅខេត្តព្រះសីហនុ និងករណីប្រើប្រាស់​គ្រឿងញៀន។
*ទី២៖ ជនជាតិឥណ្ឌា​ម្នាក់ ពាក់ព័ន្ធករណីលួចស្នាក់នៅខុសច្បាប់ហួសទិដ្ឋាការកំណត់។
*ទី៣៖ ជនជាតិហ្វីលីពីន ចំនួន​០២នាក់ (ស្រី) ពាក់ព័ន្ធករណីលួចស្នាក់នៅខុសច្បាប់គ្មានលិខិតឆ្លងដែន និងហួសទិដ្ឋាការកំណត់។
*ទី៤៖ ជនជាតិស្រីលង្កា ចំនួន​០២នាក់ ពាក់ព័ន្ធករណី​ប្រើប្រាស់ឯកសារក្លែងក្លាយ។
*ទី​៥៖ ជនជាតិឥណ្ឌូនេស៊ីម្នាក់ ពាក់ព័ន្ធករណីលួចស្នាក់នៅខុសច្បាប់គ្មានលិខិតឆ្លងដែន។
*ទី៦៖ ជនជាតិអាមេរិក​ម្នាក់ ពាក់ព័ន្ធករណី​មានសតិមិនប្រក្រតី។

ប្រធាននាយកដ្ឋានរូបនេះ បានបន្ថែមថា ក្រៅពីការបណ្តេញពួកគេឲ្យទៅប្រទេសដើមវិញ សមត្ថកិច្ចកម្ពុជា ដោយដាក់ឈ្មោះពួកគេក្នុងប្រព័ន្ធហាមចូលប្រទេសរយៈពេល៣ឆ្នាំផងដែរ៕​