​(ម៉ូស្គូ)៖ កងនាវារុស្ស៊ីប្រចាំ​តំបន់សមុទ្រខ្មៅ​ រួមជាមួយកង​នាវាតួកគី​បានដឹកនាំការធ្វើ​សមយុទ្ធជើងទឹក​រួមគ្នាមួយក្នុង គោលបំណងអភិវឌ្ឍន៍សមត្ថភាព​អន្តរប្រតិបត្តិការ​ឆ្លើយទៅនឹងហានិភ័យ​នានា នៅលើដែនសមុទ្រខ្មៅ។ នេះបើតាមនាំពាក្យកងនាវារុស្ស៊ី ដកស្រង់ដោយសារព័ត៌មាន Sputnik នៅថ្ងៃសុក្រ ទី០៨ ខែមីនា ឆ្នាំ២០១៩។

នាំពាក្យកង​នាវារុស្ស៊ី លោក អាឡិចហ្សៃ រុលយ៉ូវ (Alexei Rulyov) បានបញ្ជាក់​យ៉ាងដូច្នេះថា «នាវាចម្បាំង​ពីរគ្រឿងមកពីមូលដ្ឋានទ័ព​ជើងទឹករុស្ស៊ី ណូវ៉ូរ៉ូស្ស៊ីយីក (Novorossiysk) ប្រចាំតំបន់សមុទ្រខ្មៅ និងនាវាល្បាត វ៉ាស៊ីលី បាយកូវ (Vasily Bykov) នាវាដោះមីន វ៉ាឡេនទីន ភីគុក (Valentin Pikul) បានចូលរួម​ធ្វើសមយុទ្ធ​ជើងទឹកឈ្មោះ ផាស់សេច (PASSEX) ជាមួយតួកគី​​ក្នុងតំបន់​​សមុទ្រខ្មៅ»។

គួរជម្រាបថា បើតាម​លោក Rulyov កងនាវានៃ​ប្រទេសទាំង ២ នឹងដឹកនាំការ​ធ្វើសមយុទ្ធធ្វើ​ដំណើរឆ្លងកាត់តំបន់​គ្រោះថ្នាក់ ដែលមាន​គ្រាប់មីនបង្កប់ផងដែរ។ វាជាប្រតិបត្តិការមួយ​ដែលបានកើតមានឡើង​បន្ទាប់ ប្រទេសរុស្ស៊ី​បាន​បង្ហាញជំហររក្សា​ការប្តេជ្ញា​ចិត្តរបស់ខ្លួន​កាន់តែខ្លាំង​ក្នុងការការពារកិច្ចសន្យា​ទិញ ប្រព័ន្ធការពារមីស៊ីល ​S-400 ពីប្រទេស​រុស្ស៊ី ចំពោះ​មុខការព្រមានកាន់តែ​ខ្លាំងឡើងៗពី​អាមេរិក និងអង្គការ​ NATO៕