(ភ្នំពេញ)៖ នាយករដ្ឋមន្ត្រីនៃកម្ពុជា សម្ដេចតេជោ ហ៊ុន សែន បានប្រកាសទៅកាន់មន្ទីរពេទ្យរដ្ឋទាំងអស់ត្រូវពិនិត្យ និងព្យាបាលអ្នកធាក់ស៊ីក្លូដោយឥតគិតថ្ងៃ ហើយសម្ដេចបានផ្ដាំផ្ញើដល់អ្នកធាក់ស៊ីក្លូទៀតថា បើមានមន្ទីរពេទ្យរដ្ឋណាមួយយកលុយថ្លៃពិនិត្យ-ព្យាបាល សូមរាយការណ៍ទៅអភិបាលរាជធានីភ្នំពេញ ដើម្បីរកដំណោះស្រាយជូន។
សម្ដេចតេជោនាយករដ្ឋមន្ត្រី ថ្លែងយ៉ាងដូច្នេះក្នុងឱកាសអញ្ជើញសំណេះសំណាល និងស្រស់ស្រូបអាហារជាមួយអ្នកប្រកបរបរធាក់ស៊ីក្លូជាង ៣០០នាក់ នៅមជ្ឈមណ្ឌលកោះពេជ្រ នាថ្ងៃសុក្រ ៣កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៨ ខែមីនា ឆ្នាំ២០១៩។ បើតាមលោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា បច្ចុប្បន្នមូលនិធិស៊ីក្លូមានសមាជិកសរុប ៣២០នាក់។
ប្រមុខដឹកនាំរាជរដ្ឋាភិបាល បានប្រកាសជំរុញឱ្យអ្នកប្រកបរបរធាក់ស៊ីក្លូទាំងអស់ ប្រសិនបើមានជំងឺឈឺថ្កាត់ផ្សេងៗ សូមទៅពិនិត្យ-ព្យាបាលជំងឺនៅមន្ទីរពេទ្យរដ្ឋ ពីព្រោះសម្ដេចបានណែនាំដល់ក្រសួងសុខាភិបាល និងមន្ទីររដ្ឋទាំងនោះហើយថា មិនត្រូវយកលុយថ្លៃពិនិត្យ-ព្យាបាលពីអ្នកធាក់ស៊ីក្លូទេ។
សម្ដេចតេជោ បានបញ្ជាឱ្យអភិបាលរាជធានីភ្នំពេញ លោក ឃួង ស្រេង ត្រូវពិនិត្យតាមដានឱ្យបានដិតដល់អំពីការទទួលសេវាពិនិត្យ និងព្យាបាលជំងឺរបស់អ្នកធាក់ស៊ីក្លូនៅមន្ទីរពេទ្យរដ្ឋនានា តើថាពួកគាត់ទទួលបានការពិនិត្យ និងព្យាបាលដោយឥតគិតថ្លៃ ឬក៏ត្រូវចាប់បង្ខំឱ្យបង់ថ្លៃពិនិត្យ ឬព្យាបាលនៅមន្ទីរពេទ្យរដ្ឋណាមួយ។
សម្ដេចនាយករដ្ឋមន្ត្រី ថ្លែងយ៉ាងដូច្នេះថា «ប្រសិនបើមានការទាមទារថ្លៃពិនិត្យ ព្យាបាលជំងឺពីមន្ទីរពេទ្យរបស់រដ្ឋ (មន្ទីរពេទ្យឯកជន យើងមិនអាចទៅធ្វើបានទេ) ប៉ុន្តែមន្ទីរពេទ្យរដ្ឋទាំងអស់ត្រូវតែផ្ដល់សេវាពិនិត្យ-ព្យាបាលដោយឥតគិតថ្លៃ បើគេហ៊ានទារប្រាក់ សូមផ្ដល់នូវព័ត៌មាននេះមកមូលនិធិ ដើម្បីមូលនិធិនិយាយទៅកាន់ក្រសួងសុខាភិបាល»។
ជាមួយគ្នានោះ សម្តេចតេជោ ហ៊ុន សែន បានថ្លែងអំណរគុណចំពោះក្រុមហ៊ុនថ្មដា ដែលបានឧបត្ថម្ភថវិកាចំនួន ៧ម៉ឺនដុល្លារ ក្នុងមួយឆ្នាំដល់មូលនិធិស៊ីក្លូ ខណៈឧកញ៉ា ទ្រី ភាព ក៏បានឧបត្ថម្ភថវិកាចំនួន ៥ម៉ឺនដុល្លារ។ លើសពីនេះ ឧបនាយករដ្ឋមន្រ្តី ប៊ិន ឈិន ក៏ជួយឧបត្ថម្ភថវិកាចំនួន ៥ពាន់ដុល្លារ ក្នុងមួយឆ្នាំ និងលោក គុយ ស៊ីដឿន ឧបត្ថម្ភថវិកាចំនួន ៤ពាន់ដុល្លារ ផងដែរ។
សូមជម្រាបថា ពិធីសំណេះសំណាល និងស្រស់ស្រូបអាហារនៅព្រឹកថ្ងៃនេះ គឺជាកាយវិការបង្ហាញពីការយកចិត្តទុកដាក់ខ្ពស់មួយ ចំពោះសុខទុក្ខរបស់អ្នកធាក់ស៊ីក្លូ ពីសំណាក់ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន និងថ្នាក់ដឹកនាំ៕
